Shītwa 27 - Ilagano Ipya Lya

Paulo utuulwa Rumi, atungilwe

¹ Aho yupingʼwa giki, shitwigelile kulinhya itanga kuja Italia, bungʼwinha ko Paulo na batungwa bamo bangi mu makono ga ntale umo wa bashilikale igana, lina lyakwe Yulio, wa ibita lya Augusto.

² Aho twingila mu ngalaba ya Adramutio, iyuhaya kusingija mu mapande ga ha mialo ya Asia, tulinhya itanga, Aristarko muna Makedonia wa Thesalonika walali hamo na biswe.

³ Ku ntondo tukola Sidoni: Yulio ungʼwitila Paulo chiza, unzunilija kuja ku banwani biye, anukule kugunanwa.

⁴ Kufuma kwenuko tulinhya itanga, tusingija musilili ya Kupro, iki miyaga yali yutufumila ku butongi.

⁵ Aho tubita mu nyanza ya lwande lwa Kilikia na Pamfulia, tushika Mura, nzengo gwa Lukia.

⁶ Kwenuko ntale wa bashilikale igana uyisanga ngalaba ya Aleksandria ijile Italia; utwingija mo biswe.

⁷ Tuja hado hado shiku ningi nose, tushika Knido na makoye no, iki nyaga gwali gutushokeleja tusingija musilili ya Krete tulolelile Salmone;

⁸ Twikilimbija hihi na ngʼwalo na makoye no kushisha tushika kwipande limo likitanagwa Bukolelo wa Wiza; hihi na henaho gwali nzengo gwa Lasea.

⁹ Aho ikanza itale lyali lyabita, na lugendo lwa mu nyanza lubiza lwa kwihiga, iki shiku ja kudila nzala jali jabita, huna Paulo ubahugula,

¹⁰ Ubawila giki, Bagosha, nabona giki, lugendo lwenulu lukubiza na ngulala na kujimija kwingi, kuti kwa shikolo na ngalaba gwike, aliyo kwa bupanga wiswe hangi.

¹¹ Aliyo ntale wa bashilikale igana ungʼwigwa ngobi na ngʼwenekele wa ngalaba kutinda mihayo iyo yali yuhayiwa na Paulo.

¹² Na iki bukolelo wali buti wa wiza wa kwikala ho mu shiku ja mbeho, bingi mubo bulomana kulinhya itanga kwinga kwenuko, ulu yudulika kushika Foiniki, na kwikala uko mu shiku ja mbeho, hu wene bukolelo wa Krete, ubulolelile ibano-ngʼweli, na dakama-ngʼweli.

¹³ Aho nyaga gwa dakama guhwehweta chiza chiza, biganika giki, bupandika umo balupimaga, buzubula nanga, bikilimbija hihi na Krete.

Makoye matale mu nyanza

¹⁴ Kakanza kado nyaga gwa nguzu, ugukitanagwa Eurakulo, gufuma ko, guyitula ngalaba.

¹⁵ Aho ngalaba yupelengechiwa, nayo yali itudula kugulola nyaga, twileka, tutwahva.

¹⁶ Tuja musilili ya kajinga kakitanagwa Klaudo, tubiza na makoye matale kulitunga lyato;

¹⁷ Aho bali bumala kulilinhya, butumamila bugunani, buyitunga ngalaba buyigobya ngoye musilili yayo; bogoha batizutinya mu maseni ga Surtisi, bicha itanga, butwalwa giko duhu.

¹⁸ Aliyo iki twali tubucliabuchiwa no na nyaga ntale, ku ntondo bandia kuponya shikolo mu nyanza;

¹⁹ Na lushiku lwa kadatu tuponya shikolo na makono giswe benekele.

²⁰ Aho limi nulu masonda shali shitutwakila shiku ningi, na nyaga ntale no gubyutukoya, nose kugaya kwisagilwa kose kwa kupijiwa kwiswe.

Paulo ubafumbulila kapigijiwe kubo umo bakupigijiua

²¹ Aho jubiza shiku ningi na kulya yaya, hunaho Paulo wimila hagati yabo uhaya giki, Bagosha, shali shingʼwigelile kunigwa nene, na kukija kulinhya itanga kwinga Krete; ni mutabonile ngulala iyi na kujimija uku.

²² Nahene lulu namuganikila timbyagi ngholo; iki kutalabiza kujimija bupanga nulu bumo mu bingʼwe, aliyo kwa ngalaba gwike.

²³ Iki bujiku wenubu malaika wa Mulungu, Uyo nene ndi wakwe, hangi Uyo nakuntumamilaga, wali wimila hihi na nene,

²⁴ Uhaya giki, Utizogoha Paulo, shikwigelile kwimila mu butongi wa Kaisari; na lolaga, Mulungu wakwinhaga bebe bose abali hamo nangho mu lugendo.

²⁵ Kulwa iyi, bagosha, timbyagi ngholo: iki nanzunya Mulungu, giki, ikubiza giko gitumo nawililwe nene.

²⁶ Aliyo shitwigelile kuponyiwa ngʼwijinga limo.

²⁷ Bujiku wa ikumi na bune aho bushika, tubyutwalwa kunu na kunu mu nyanza ya Adria, bujiku hagati batwaji ba ngalaba bali biganika begela ku si numu:

²⁸ Bupima bushimu wa minzi, bubona buli shita makumi abili; buja hado ho bupima hangi, bubona buli shita ikumi na shitano.

²⁹ Iki bogoha batizupamilwa mu mapande ga shiganga, buponeja nanga ine kufuma ku bugobelo, bukumbula wagaluke.

³⁰ Batwaji ba ngalaba aho bali bukoba kupela kwinga mu ngalaba, nabo bicha lyato mu nyanza bugemela giti balihaya kuponya nanga ja ku lulimi,

³¹ Paulo ungʼwila ntale wa bashilikale igana, na bashilikale giki, Ulu benaba batikala mu ngalaba, mutudula kupijiwa.

³² Huna lulu bashilikale bujibuta ngoye ja lyato, bulilekela ligwe.

³³ Aho lyuhaya kubiza dilu, Paulo ubakomeleja bose balye, uhaya giki, Lelo lushiku lwa ikumi na ine mulindilile na kudila nzala, mutalile kinhu.

³⁴ Kulwa iyi namukomeleja mulye shiliwa: iki ili ya ku bupiji wingʼwe: iki lutalajimila luywili nulu lumo ku ntwe gwa munhu ose mu bingʼwe.

³⁵ Aho umala kuhaya yeniyi, usola ngati, unumba Mulungu mu butongi wa bose; ugumeganya, wandia kulya.

³⁶ Huna lulu bose butimbya ngholo, nabo bulya shiliwa.

³⁷ Bose aba twali tuli mu ngalaba, twali tuli banhu magana abili na makumi mpungati na batandatu.

³⁸ Aho biguta, buyibupya ngalaba, buponeja ngano mu nyanza.

Ngalaba yubinzaguka; banhu bupila

³⁹ Aho yubiza dilu, bali batuyimana i si; aliyo bubona ikondo limo ilili na ngʼwalo gwa luseni, bulomana kuyikoja ngalaba henaho ulu yudulika;

⁴⁰ Nabo bujibuta ngoye ja nanga bujileka mu nyanza, bujiteja ngoye ja magobelo; bulinhya itanga lya ku butongi lya kudima nyaga, belema kuja ha ngʼwalo.

⁴¹ Iki bali bushikila ha lwande aho jisangigije nyanza ibili, buyikoja ngalaba umo; na lulimi lwa ngalaba lwifufunika ho lwikala lutunegenaga, aliyo bugobelo wandia kubinzagulwa, kuhva nguzu ja mahuli.

⁴² Kulomana kwa bashilikale kwali kuli giki, bababulage batungwa, atizujiha nulu umo wabo na kupela.

⁴³ Aliyo ntale wa bashilikale igana iki walatogilwe kumpija Paulo, ubalemeja batizita gitumo bulomana kwita; ubalagila abo abudula kujiha, batonge kwiponeja mu nyanza, bashike ku si numu;

⁴⁴ Nabo abasaga ho, bangi ha mbawa, na bangi ha shinhu shingi sha mu ngalaba; yubiza giko bose bupila bushika ku si numu.