Shītwa 26 - Ilagano Ipya Lya

Paulo mu butongi wa ngʼwa Agripa

¹ Hunaho Agripa ungʼwila Paulo giki, Wazunilijiwa kuhaya mihayo yako. Huna lulu Paulo utama nkono gwakwe, witolongola giki,

² Nalibona ndi na lubango, Ee Ntemi Agripa, iki nahaya kwitolongola mu butongi wako lelo iyi, mu mihayo yose iyo nalibulilwa na Bayudaya:

³ Kutinda no, iki bebe uli mani no wa shimile shose na mabujo ishili mu Bayudaya: kulwa iyo nakwikumbilija unidegeleke na kwiyumilija.

⁴ Bayudaya bose bamanile kashiminzile kane kufumila mu buyanda wane, gitumo kali kali kufuma kwandia ngʼwihanga lyane mu Yerusalemi,

⁵ Benabo banimanile kufuma kale, ulu batogilwe bukanila, giki, naali Mfarisayo gitumo kali kazunije ka dini yiswe akali wima kutinda.

⁶ Na haha nimilaga aha nalilekanyiwa kulwa nguno ya kwisagilwa kwa kwisagija uko Mulungu wali wabinha bakulugenji biswe;

⁷ U kwisagija kwenuko ngʼanda jiswe ikumi na ibili jilisagilwa kukushikila, jikutumamilaga Mulungu na bukomezu bujiku na limi. Na nene nalibulwa na Bayudaya, Ee Ntemi Agripa, kulwa kwisagilwa uku.

⁸ Ni buli lulu ngʼwapima guli mhayo ugutudula kuzunyiwa, ulu Mulungu wabajucha bafu?

⁹ Na nene nghana nali niganika mu moyo gwane giki, shinigelile kwita mihayo mingi ya wilemelwa na lina lya ngʼwa Yesu wa Nazareti.

¹⁰ Hangi nali nita chene mu Yerusalemi: nali nubyubatunga a bela bingi mu jela, iki nali nanukula budula kufuma ku bagabiji batale; hangi aho bakubulagagwa, nuzunilija nane.

¹¹ Hangi nubinha nsango nghangala ningi mu mabilingilo gose, nubahadikija kunduka Mulungu; nubapelanilwa no giti ndi nsaji, nubanyajanyaja nulu kushisha ku mizengo ya bugeni.

¹² Mu yeniyo aho nali nuja Damasko ndi na budula na kulagilwa kufuma ku bagabiji batale,

¹³ Limi ntwe-gati, Ee Ntemi, mu nzila nubona isana lyufuma ngʼwigulu, ilikilile kwaka kwa limi, lyunakila, linipindije mapande gose, u nene nabo abali bushiminza hamo na nene.

¹⁴ Aho tugwa ha si bose, nigwa ilaka nulungalunga mu lulimi lwa Kihebrania, lyuniwila giki, Saulo, Saulo, ulininyajanyaja ni buli? Ili kilambu kuli bebe kupanda milambi ku someke.

¹⁵ Nuhaya giki, Bebe uli nani, Seba? Seba uhaya giki, Nene ndi Yesu Uyo bebe ukuninyajanyajaga.

¹⁶ Aliyo bukaga, na magulu gako wima, iki nakwilongelaga bebe kulwa nguno iyi giki, nakutuule ho ubize ntumami na nkaniji wa mihayo iyo wayibonaga, na wa mihayo iyo nakukwilongelela mo;

¹⁷ Giki, nakukupija mu banhu bako, na mu bana mahanga, abo nalikutuma kubo,

¹⁸ Ukabafumbule miso gaho, bagaluke kwinga mu giiti bingile ngʼwisana, na kwinga mu budula wa ngʼwa Shetani bashike kuli Mulungu, banukule kulekejiwa kwa shibi na wingiji mu benabo beejiwa kulwa kuzunya ukuli muli Nene.

¹⁹ Huna yene, Ee Ntemi Agripa, nali natulema kwigwa kolechiwa kwenuko kwa ngʼwigulu;

²⁰ Aliyo nali nandia kubalomela abo ba mu Damasko, na mu Yerusalemi, na mu si yose ya Buyudaya, na ku bana mahanga giki, boye na kungalukila Mulungu, na kwita Shitwa ishigelelilwe koya.

²¹ Kulwa nguno ya mihayo yeniyo, Bayudaya bali Chunidima nali nali mu hekalu, bugema kunibulaga.

²² Huna lulu iki nali nupandika kugunanwa kufuma kuli Mulungu, nakimilaga na kushisha lelo iyi, nubyukanila ku bado na batale, natahayaga mhayo gungi ulu iti iyo bahangi na Musa baahayaga ilabiza ho;

²³ Giki, shigelile Kristo kuluhiwa, na kubiza wa kwandia wa kujuchiwa mu bafu, abalomele isana banhu bakwe na bana mahanga.

²⁴ Aho witolongola mu mihayo yeniyi, Festo uhaya na ilaka itale giki, Paulo, wasalaga; kwilanga kwako kwingi kuli-kugalucha kubiza nsaji.

²⁵ Paulo uhaya giki, Natasalile, Ee Festo nkumilijiwa; aliyo nakuhayaga mihayo ya nghana na ya masala mashikanu.

²⁶ Iki Ntemi amanile mihayo yeniyi, huna yene nalilungalunga nanghwe na bugimu; iki namanile no giki, kuduhu mhayo nulu gumo mu yeniyi ugwibisile kuli wei, iki mhayo gwenuyu gwali gutitilwe ha mhujo.

²⁷ Ntemi Agripa, wabazunya bahangi? Namanile giki, wabazunya.

²⁸ Agripa ungʼwila Paulo giki, Mu mihayo mido ulinikongakonga kunita kubiza Nkristo.

²⁹ Paulo uhaya giki, Nanomba Mulungu giki, nulu mu mido, nulu mu mingi, iti bebe wike aliyo na benabo bose abalinigwa lelo iyi, babize giti nene umo ndi, kuleka minyololo iyi.

³⁰ Aho wali wamala kuhaya yeniyi Ntemi ubuka, na gavana na Bernike, nabo abigashije hamo nabo.

³¹ Bisunda ha mhujo, bilunjalunja benekele na benekele buhaya giki, Munhu ngʼwenuyu atitaga mhayo nulu gumo ugwigelelilwe kucha nulu minyololo.

³² Agripa ungʼwila Festo giki, Munhu ngʼwenuyu ni wadula kutaligulilwa, ulu ni walatalililile akalekanyiwe na Kaisari.