Shītwa 24 - Ilagano Ipya Lya

Paulo mu butongi wa ngʼwa Feliki

¹ Hanuma ya shiku itano Anania ngabiji ntale utulumenha hamo na banamhala bamo, na nungalungi umo, Tertulo; nabo bumanikija gavana mihayo ya ngʼwa Paulo.

² Aho witanwa Tertulo wandia kumula, uhaya giki, Iki biswe tukubonaga mhola ningi muli bebe, na kulwa bulanghani wako mihayo ya bubi ikulonjiwagwa chiza ngʼwihanga ili,

³ Ee, Feliki nkumilijiwa, tukwiyanukulaga yose buli ikanza na buli ipande na kulumba kose.

⁴ Aliyo natizongeja kukunoja, nakwikumbilija utwigwe mihayo mido kulwa bulyehu wako.

⁵ Iki tumona ngosha ngʼwenuyu ali nghala, ngʼwandija wa bugomi mu Bayudaya bose mu si jose, ntongeji ntale wa kazunije ka Banazorayo.

⁶ Hangi wei wali ugema kusosohaja hekalu, huna tundima: twali tutogilwe kunekanya mu shimile sha shilagilo shiswe;

⁷ Aliyo Lusia ntale wa bashilikale ushika, ungʼwinja mu makono giswe na nguzu ningi,

⁸ Ubalagila babuji bakwe giki, bize kuli bebe: nangho ulu ungisilija, bebe ngʼwenekele wadula kumana mihayo yose iyo tulimulila.

⁹ Bayudaya nabo bisangija kumula, buhaya mihayo iyi ili giko.

Mashosho ga ngʼwa Paulo mu butongi wa ngʼwa Feliki

¹⁰ Aho gavana unsonela nkono giki, ahaye, Paulo ushosha giki, Iki namanile bebe uli nekanya wa ihanga ili miaka mingi, nakwitolongola mihayo yane na buyegi kutinda.

¹¹ Iki wadula kumana giki, kufuma aho nali nulinha kuja Yerusalemi kulamya, jitinabita shiku kutinda ikumi na ibili;

¹² Nulu bali batanisangile nakuhalalilaga na munhu mu hekalu, nulu kwita nzambo ngʼwibita, nulu ngʼwibilingilo, nulu mu nzengo;

¹³ Nulu batudula kunikanilija mihayo iyo balinibulila haha.

¹⁴ Aliyo mhayo uyu nagutambula kuli bebe giki, mu Nzila iyo bakuyihayaga ya nyagomi, hi yene nakuntumamilaga Mulungu wa bakulugenji biswe, nayizunije yose yaandikwa mu shilagilo na mu bahangi;

¹⁵ Ndi nako kwisagilwa kuli Mulungu uko boi benekele bakuzunije giki, Kulabiza ho kujuka kwa bafu, kwa batungilija na abati batungilija.

¹⁶ Nane nakwimanilijaga mu mhayo uyu giki, nabize gwa na wiyanguji ubuti na kilingo mu butongi wa Mulungu na wa banhu.

¹⁷ Haha hanuma ya miaka mingi nali niza kubenhela ba ihanga lyane bugabi na sha kufunya.

¹⁸ Mu shenisho bamo ba Bayudaya bafumile Asia bunisanga nejiwa mu hekalu, yali iti ngʼwibita nulu na buyombo.

¹⁹ Shibigelile benabo kubiza ho mu butongi w ako banibule, ulu ninga bali na mhayo kuli nene.

²⁰ Nulu benaba benekele ni bahayage ulu bali bubona buti butungilija muli nene aho nali nimila mu butongi wa ibanza,

²¹ Ulu iti kulwa ilaka ili limo, ilo nuhamuka aho nimilile hagati yabo giki, Kulwa nguno ya kujuka kwa bafu nalekanyiwa mu butongi wingʼwe lelo iyi.

²² Aliyo Feliki, iki witegeleja wima mihayo ya Nzila yeniyi, ubitujatuja, uhaya giki, Lusia, ntale wa bashilikale aho akutulumenha, nakupima mihayo yingʼwe.

²³ Unagila ntale wa bashilikale igana kuninda Paulo, anekele wiyabi, atizunemeja nulu umo wa banwani bakwe kuli tumamila nulu kwiza kuli wei.

Paulo unsombolela Feliki kuzunya gitumo kuli

²⁴ Hanuma ya shiku jimo, Feliki ushika hamo na nke wakwe, Drusilla, u ngʼwene Nyudaya, ungʼwitana Paulo, undegeleka mihayo ya kuzunya ukuli muli Kristo.

²⁵ Aho ungʼwigwilija mihayo ya butungilija, na ya kwilinda, na ya nsango uguhaya kwiza, Feliki udingʼwa boba, ushosha giki, Haha lulu jaga, aho nakubona ngʼwanya, nakukwitana bebe.

²⁶ Nahene wali wisagilwa kwinhiwa feza na Paulo giki, antungule: kulwa iyo umala kungʼwitana nghangala ningi, uhoya nanghwe.

²⁷ Aliyo aho yushila miaka ibili, Porkio Festo udima nimo gwa ngʼwa Feliki; na Feliki, iki walatogilwe Bayudaya bantogwe, uneka Paulo mu butungwa.