Shītwa 23 - Ilagano Ipya Lya

Paulo mu butongi wa ibanza

¹ Paulo ubakalalila a ba ibanza, uhaya giki, Badugu bagosha, nakikalaga mu butongi wa Mulungu ndi na wiyanguji bose wa wiza na kushisha lelo.

² Huna ngabiji ntale Anania ubalagila abo bimilile hihi nanghwe kuntula nomo gwakwe.

³ Hunaho Paulo ungʼwila giki, Mulungu alihaya kukutula bebe ndugu iyibililwe swakala; u bebe wigashije kunilekanya gitumo shilagilo shili, nangho ulilagila natulwe, aliyo italagililwe chene.

⁴ Nabo abimilile hihi buhaya giki, Aga, ulingʼolomya ngabiji ntale wa Mulungu?

⁵ Paulo uhaya giki, Nali natamanile badugu bane giki, ali ngabiji ntale; iki gwaandikwa giki, Utizunghaya kibi ntale wa banhu bako.

⁶ Aliyo aho Paulo umana giki, lwande lumo bali Basadukayo, na lungi bali Bafarisayo, uhamuka ngʼwibanza giki, Badugu bagosha, nene ndi Mfarisayo, ngʼwana wa Mfarisayo: kulwa nguno ya kwisagilwa kwa kujuka kwa bafu nalilekanyiwa.

⁷ Aho umala kuhaya giko, kubiza ho kwilemelwa kwa Bafarisayo na Basadukayo, na kwibilinga kugabanika.

⁸ Iki Basadukayo bakahayaga giki, kujuka kuli nduhu, nulu malaika, nulu moyo; aliyo Bafarisayo bakuyitambulaga bubili wayo.

⁹ Yubiza ho yombo nhale; na bandiki ba lwande lwa Bafarisayo bimila, bilwisha, buhaya giki, Tutabonaga kibi chose muli munhu uyu; aliyo ulu moyo nulu malaika wali walungalunga nanghwe, tutizulwa na Mulungu.

¹⁰ Aho kubiza ho kwilemelwa kutale, ntale wa bashilikale, iki ogoha Paulo atizutandagulwa nabo, ulagila bashilikale biike bakanghulumule mugati yabo, bangʼwenhe mu numba ya bashilikale.

Seba untimbya ngholo Paulo

¹¹ Bujiku wenubo Seba wimila hali wei, uhaya giki, Timbyaga ngholo Paulo: iki wanikanilaga mihayo yane mu Yerusalemi, giko shikwigelile bebe kukanila na mu Rumi.

Bayudaya bisigila bumulaga Paulo

¹² Aho yubiza dilu, Bayudaya bisigilila hamo, bitungila na kizumo, buhaya giki, Kulya yaya nulu kungʼwa yaya kushisha aho tumulaga Paulo.

¹³ Benabo abali bilahila bulagane ubu bali bali banhu kutinda makumi ane.

¹⁴ Nabo buja ku bagabiji batale na banamhala, buhaya giki, Kwizuma, twitungila na kizumo kitale giki, Tu tulo ja kinhu kushisha aho tumulaga Paulo.

¹⁵ Kulwa iyo lulu, bingʼwe hamo na ba ibanza manikijagi ntale wa bashilikale antulumenhaje kwiza ku bingʼwe, giti mulihaya kumana chiza mihayo yakwe: na biswe twamalilaga kumulaga aho atali kwegela.

¹⁶ Aliyo ngʼwipfa wa ngʼwa Paulo aho wigwa wibandiji wabo, wiza, wingila mu numba ya bashilikale, unsombolela Paulo mihayo yeniyo.

¹⁷ Paulo ungʼwitana ntale umo wa bashilikale igana, uhaya giki, Ntwalage nsumba ngʼwenuyu kuli ntale wa bashilikale; iki ali na mhayo gwa kungʼwila.

¹⁸ Huna lulu untwala, ungʼwenha kuli ntale wa bashilikale, uhaya giki, Paulo ntungwa wali wanitana, unilomba giki, Nangʼwenhe nsumba uyu kuli bebe, angu, ali na mhayo gwa kukuwila.

¹⁹ Ntale wa bashilikale undima nkono, bisunda ha mhujo, umuja giki, Uli na mhayo ki gwa kunisombolela?

²⁰ Uhaya giki, Bayudaya balomanaga kukulomba, angu, untulumenhye Paulo ntondo kwibanza, giti balihaya kubuja chiza mihayo yakwe.

²¹ Aliyo bebe utizubazunilija: iki bagosha babo ba kutinda makumi ane balingʼwibandila, abamala kwitungila na kizumo giki, kulya yaya nulu kungʼwa yaya kushisha aho bumulaga; na haha bamalilaga, balilindila kwisagija kwako.

²² Huna lulu ntale wa bashilikale unekela nsumba aje, unghana giki, Utizungʼwila munhu nulu umo giki, wanimanikijaga mihayo yeniyi.

Paulo utungʼwa Kaisaria kuli Feliki

²³ Nanghwe ubitana babili ba mu batale ba bashilikale igana, uhaya giki, Balonjagi bashilikale magana abili, baje kushika Kaisaria, na bashilikale badamhiji ba falasa makumi mpungati, na ba machimu magana abili, bamalile mu saa ya kadatu ya bujiku;

²⁴ Hangi jenhwe nzobe jimalilile, bandamhije ho Paulo, bantwale mhola kuli Feliki u gavana.

²⁵ Wandika nyaluba ili giki;

²⁶ Klaudio Lusia kuli gavana nkumilijiwa Feliki, nakugisha.

²⁷ Ngosha ngʼwenuyu wali wadimilwe na Bayudaya, wali wenda kubulagwa nabo, nushika na ibita lya bashilikale, numpija, iki nitegeleja giki, ali muna Rumi.

²⁸ Iki nali natogilwe kumana nguno yabo ya kumulila, nuntulumenhya kwibanza lyabo;

²⁹ Nubona giki, alibulwa ya mabujo ga mu shilagilo shabo, aliyo nubona ati na mhayo gwa kubulwa ugwigelelilwe kucha nulu kutungwa.

³⁰ Aho nufubolelwa giki, Bayudaya busigana kungʼwibandila ngosha uyu, haho na haho nantuma kuli bebe, nubalagila na babuji bakwe bahaye mihayo yakwe mu butongi wako. Wikale mhola.

³¹ Kulwa iyo bashilikale buntwala Paulo gitumo bali balagilwa, bungʼwenha bujiku kushisha Antipatri.

³² Ku ntondo bubaleka abadamhiji ba falasa kuja hamo nanghwe, nabo bushokanya ku numba ya bashilikale:

³³ Benabo aho bushika Kaisaria, nabo bungʼwinha gavana i nyaluba, nu Paulo buntuula mu butongi wakwe.

³⁴ U gavana aho umala kwisoma nyaluba, ubuja ali wa chalo ki; na aho witegeleja giki, ali wa Kilikia,

³⁵ Uhaya giki, Nakukwigwa mihayo yako chiza aho babuji bako nabo bakushika; ulagila alindwe ngʼwilekanijo lya ngʼwa Herode.