Shītwa 22 - Ilagano Ipya Lya

Paulo ubasombolela ba Israeli kapigijiwe kakwe

¹ Bingʼwe bagosha, badugu na bababa, munidegeleke kwitolongola kwane uku ku bingʼwe haha.

² Aho bigwa giki, alilungalunga nabo mu lulimi lwa Kihebrania bikala sele kutinda: nanghwe uhaya giki,

³ Nene hene ndi Nyudaya, naabyalwa mu Tarso ya Kilikia, aliyo nali nukulila mu nzengo uyu, mu magulu ga ngʼwa Gamalieli, nulangwa mu butungilija wa shilagilo sha bakulugenji biswe, nali nah nkomezu no kuli Mulungu, gitumo bingʼwe bose muli lelo iyi:

⁴ Nane nubyubanyajanyaja a ba nzila yeniyi kushisha kubabulaga, nubatunga na kubinha ko mu jela bagosha na bakima.

⁵ Gitumo ngabiji ntale akunikanilaga, na banamhala ba ibanza bose pye, kufuma ku benabo nali nanukula nyaluba ja kuja ku badugu, nuja Damasko, nabenhe abali bali kwenuko kunu Yerusalemi batungilwe, bize binhiwe nsango.

⁶ Yubiza aho nalija mu lugendo, negela Damasko giti limi ntwe gati, kuhayumanila, isana itale lyufuma ngʼwigulu lyunakila linipindije.

⁷ Nugwa pu ha si, nigwa ilaka liliniwila giki, Saulo, Saulo, ukuninyajanyajaga ni buli?

⁸ Nene nushosha giki, Bebe uli nani, Seba? Nanghwe uniwila giki, Nene ndi Yesu wa Nazareti, Uyo ukuninyajanyajaga.

⁹ Nabo abali ball hamo na nene bulibona isana hene, nabo bogoha no, aliyo bali batigwile ilaka lya Ngʼwenuyo alilungalunga na nene.

¹⁰ Nuhaya giki, Nite kinahe, Seba? Seba uniwila giki, Bukaga, uje Damasko; kwenuko ukuwilwa mihayo yose iyo ilagilile bebe kuyita.

¹¹ Aho nali natudula kubona kulwa ikujo lya isana lyenilo, nutongelwa na nkono na benabo abali bali hamo na nene, nushika mu Damasko.

¹² Huna lulu ngosha umo, lina lyakwe Anania, namya ngʼwishigwa mu shilagilo, uyo wali ukanilwa chiza na Bayudaya bose abali bazengile kwenuko,

¹³ Wiza kuli nene, wimila hihi na nene, uniwila giki, Ndugu wane, Saulo, winhiwe kubona. Nane nunola mu kakanza kenako duhu.

¹⁴ Nanghwe uhaya giki, Mulungu wa bakulugenji biswe waakusola bebe umane iyo atogilwe, na kumona Uyo Ntungilija, na kwigwa ilaka ilyafuma mu nomo gwakwe;

¹⁵ Iki ukubiza nkaniji wakwe ku banhu bose, wa yose iyo wamala kwibona na kwigwa.

¹⁶ Ali lulu, ulidila ni ya ki? bukaga, ubatijiwe, oje shibi shako, ulililile lina lya Seba.

¹⁷ Yubiza aho nali nushokanya Yerusalemi, aho nulomba mu hekalu, nubiza mu kolechiwa,

¹⁸ Numona Uyo aliniwila giki, Kangilijaga winge wangu mu Yerusalemi, iki batalanukula bukaniji wako wa kuli Nene.

¹⁹ Nane nuhaya giki, Seba, benabo, ambu, bamanile giki, naabatungaga mu jela na kubatula mu buli ibilingilo abo balikuzunya;

²⁰ Na mininga ga ngʼwa Stefano nkaniji wako aho gali gitwa, nene nane nali nimilile halio, nukazunilija kabulagilwe kakwe, nane nakashilinda shizwalo shabo abali bumulaga.

²¹ Nanghwe uniwila giki, Jaga duhu, iki Nene nakukutuma kule ku bana mahanga.

²² Bundegeleka kushisha mhayo gwenuyu, huna bubucha ilaka lyabo, buhaya giki, Ngʼwinjage munhu ngʼwenuyo mu si; iki itigelile wei kwikala mpanga.

²³ Aho bali buhamuka na kuponanja shizwalo shabo, na busamula lububu higulya,

²⁴ Ntale wa bashilikale ulagila ingijiwe mu numba ya bashilikale, uhaya giki, agengʼwe mihayo yakwe na milanga, amane ni nguno ki balinyogela giko.

²⁵ Aho bumala kuntunga na mikoba, Paulo ungʼwila ntale wa bashilikale igana uyo imilile hihi giki, Angu, ilagilile ku bingʼwe kuntula milanga munhu muna Rumi, uyo atali kulekanyiwa?

²⁶ Aho ntale wa bashilikale igana wigwa iyo, uja kuli ntale wa bashilikale unsombelela giki, Ilanghanage, ulihaya kwita ki? iki munhu ngʼwenuyu ali muna Rumi.

²⁷ Ntale wa bashilikale ungʼwegela, ungʼwila giki, Niwilage, angu, bebe uli muna Rumi? Nanghwe uhaya giki, Ali chene.

²⁸ Ntale wa bashilikale ushosha giki, U nene naabugula buzengo ubu na mpango ntale. Aliyo Paulo uhaya giki, U nene naabyalwa muna Rumi.

²⁹ Haho na baho benabo ubuhaya kungema mihayo yakwe, buneka; na ntale wa bashilikale nanghwe ogoha iki wamana giki, ali muna Rumi, hangi waluntungaga.

³⁰ Ku ntondo, iki utegwa kumana i ya nghana, ni nguno ki wabulwa na Bayudaya, untaligulila, ubalagila bagabiji batale na bose ba ibanza bize, bibilinge hamo, ungʼwenha Paulo, untuula mu butongi wabo.