Shītwa 21 - Ilagano Ipya Lya

Lugendo lwa ngʼwa Paulo kwinga Efeso kuja Yerusalemi

¹ Yubiza aho twali tulekana nabo na kulinhya itanga, tuja wima kushika Kosi, ku ntondo tushika Rodo, kwinga kwenuko tushika Patara.

² Na aho tubona ngalaba iyuhaya kukila kuja Foiniki, twingila mo, tuja.

³ Aho tulilolela Kupro, tulipamila nkono gwa lumoso, tuja kushisha Suria, tukola Turo; iki kwenuko ngalaba yuyikija miligo yayo.

⁴ Aho tubabona bahemba, twikala kwenuko shiku mpungati; benabo bungʼwila Paulo muli Moyo Ngʼwela giki, atizulinha kuja Yerusalemi.

⁵ Aho tumala shiku jenijo, tubuka tuja nabo bose kihamo na bake babo na bana butushindikila kushisha hanze ya nzengo; huna tutuja mazwi ha ngʼwalo, tulomba.

⁶ Aho tumala kwilaga nabo twingila mu ngalaba, aliyo benabo bushoka ku kaya jabo.

⁷ Aho tumala lugendo lwiswe kufuma Turo, tushika Ptolemai; huna tubagisha badugu, twikala hamo nabo lushiku lumo.

⁸ Ku ntondo biswe twali tuli hamo na Paulo tukinga, tushika Kaisaria, twingila mu numba ya ngʼwa Filipo nomeji wa evangeli ya bupiji, uyo walali umo wa benabo mpungati, twikala hamo nanghwe.

⁹ Munhu ngʼwenuyo walali na bana bakwe bane, banhya bibembu, abubyuhanga.

¹⁰ Aho tushinga kwenuko shiku ningi, nghangi umo, lina lyakwe Agabo, utulumenha kufuma Buyadaya.

¹¹ Aho wiza ku biswe, udima shipi gwa ngʼwa Paulo, witunga ngʼwenekele magulu na makono, uhaya giki, Moyo Ngʼwela wahaya giki, Bayudaya abali mu Yerusalemi bakuntunga ngosha u ngʼwenekele wa shipi uyu, nabo bakungʼwinha ko mu makono ga bana mahanga.

¹² Aho twigwa mihayo yeniyi, biswe na benabo ba henaho tungʼwikumbilija atizulinha kuja Yerusalemi.

¹³ Hunaho Paulo ushosha giki, Mulita ki, kulila na kubinza ngholo yane? iki nene namalilile, iti kutungwa gwike, aliyo hangi nulu kucha mu Yerusalemi kulwa nguno ya lina lya Seba Yesu.

¹⁴ Iki ulema kutwigwa, tuhumula, tuhaya giki, Iyo Seba atogilwe yitwe.

¹⁵ Hanuma ya shiku jenijo tutunga shikolo shiswe, tulinha kuja Yerusalemi.

¹⁶ Bahemba bamo ba Kaisaria nabo buja hamo na biswe, bungʼwenha hamo nabo munhu umo lina lyakwe Mnasoni, muna Kupro, nghemba wa kale, uyo tukikale ha ngʼwakwe.

Paulo mu Yerusalemi

¹⁷ Aho tushika Yerusalemi, badugu butwegeleja na buyegi.

¹⁸ Ku ntondo Paulo wingila hamo na biswe kuli Yakobo, na banamhala bose bali bali ho.

¹⁹ Aho umala kubagisha, ubasombolela mihayo yose gumo gumo iyo Mulungu waluyitaga mu bana mahanga mu kwinhilija kwakwe.

²⁰ Aho bigwa iyo, bunkuja Mulungu; huna bungʼwila giki, Ndugu wiswe, ulibona giki, Bayudaya abazunije, ambu, bali shiku shingi, nabo bose bali bakomezu ku shilagilo.

²¹ Nabo bawililwe nghulu jako giki, angu, ukabalangaga Bayudaya bose abali mu bana mahanga balekane na Musa, ulibawila giki, angu, kubasala bana babo yaya, nulu kushiminza mu shimile isho yaya.

²² Ali gisi ili kinahe lulu? Libilinga litukija kwibilinga, iki bakwigwa giki, bebe wizaga.

²³ Kulwa iyo itaga uyo tulikuwila: tuli na bagosha bane abilahilile kilahilo.

²⁴ Batwalage benabo, wiyeje hamo nabo, ubakuulile boi, bamogwe mitwe yabo: huna lulu bose bakumana giki, nghulu jose ijo bawililwe ja kuli bebe, jiti ja nghana; aliyo giki, bebe ngʼwenekele ukushiminzaga wima, ukushidimaga shilagilo.

²⁵ Aliyo ya bana mahanga abazunije, twali twabandikila, tulekanya giki, batizudima mihayo yeniyo, aliyo bilanghane benekele ku shinhu shafunyiwa ku shikolile, na ku mininga, na ku sha kunigwa, na ku bujingi.

²⁶ Hunaho Paulo ubatwala bagosha benabo, ku ntondo wiyeja hamo nabo, wingila mu hekalu, olecha kashikiligije ka shiku ja kwejiwa, kushisha aho kitambo kifunyiwe kulwa buli munhu wabo.

Bayudaya bugema kumulaga Paulo, upijiwa na bashilikale

²⁷ Aho shiku mpungati jali jili hihi kushila, Bayudaya abafumile Asia, aho bumona ali mu hekalu, bubayugula banhu bose, bundima na makono,

²⁸ Buhamuka giki, Bagosha ba Israeli, gunanagi: ngʼwenuyu ali munhu uyo akubasugaga bose hose hose kugomela ihanga lyiswe na shilagilo, na ipande lyenili, hangi kutinda iyi, wabenha Bagriki mu hekalu, walisosohajaga ipande lyenili lyela.

²⁹ Iki hali bamona Trofimo muna Efeso ali hamo nanghwe mu nzengo, biganika giki, Paulo akangʼwenha mu hekalu.

³⁰ Nzengo gose guyonzomoka, na banhu bugidinga bibilinga hamo; bundima Paulo, bungwesa bumfunya hanze ya hekalu; haho na baho nzwigi julugalwa.

³¹ Aho bukoba kumulaga, mihayo yushika kuli ntale wa ibita lya bashilikale giki, Yerusalemi yose yabizaga na wiyuguji.

³² Haho na haho ubatwala bashilikale na batale babo, ubikiila alipela. Aho bumona uyo ntale wa bashilikale na bashilikale bakwe, boya kuntula Paulo.

³³ Hunaho ntale wa bashilikale wegela, undima, ulagila atungwe na minyololo ibili: ubuja uyo ni nani, hangi witaga ki.

³⁴ Bamo ngʼwibita buhamuka kingi, na bangi kingi: nanghwe walatudula kumana i ya nghana kulwa buyombo, ulagila atwalwe mu numba ya bashilikale.

³⁵ Aho ushika ha malinhilo yubiza giki, walabuchiwe na bashilikale kulwa bukali wa ibita.

³⁶ Iki banhu bingi bunondela, bakuhamukaga giki, Ngʼwinjage ngʼwenuyo.

³⁷ Aho uhaya kwingijiwa mu numba ya bashilikale, Paulo ungʼwila ntale wa bashilikale giki, Nazunilijiwa kukuwila mhayo? Nanghwe uhaya giki, Umanile Kigriki?

³⁸ Angu, bebe uti uyo muna Misri, uyo mu shiku jabitile wali wita bugomi, wali ubatwala mu bu bagosha benabo shiku shine a babulagi?

³⁹ Aliyo Paulo uhaya giki, Nene ndi Nyudaya wa Tarso ya Kilikia, nzengi wa nzengo nkumuku, nakwikumbilija unizunilije kulungalunga ku banhu.

⁴⁰ Aho unzunilija, Paulo wimila ha malinhilo, ubahungija nkono; aho bufulika du, ulungalunga mu lulimi lwa Kihebrania, uhaya giki,