Shītwa 20 - Ilagano Ipya Lya

Paulo mu Makedonia na Griki

¹ Huna lulu aho buyombo bushila, Paulo ubitana bahemba na wilaga nabo, ubuka kuja Makedonia.

² Aho umala kubita mu mapande genayo, na kubakomeleja na mihayo mingi, ushika mu si ya Bagriki.

³ Ushinga ho mieji idatu. Iki Bayudaya busigana kuntega aho wei wali uhaya kulinhya itanga kuja Suria, usola mhayo gwa kushokanya mu nzila ya Makedonia.

⁴ Abali bu ja hamo nanghwe kushika Asia bene aba, Sopateri, muna Beroya, na Aristarko na Sekundo bana Thesalonika; na Gayo, muna Derbe, na Timoteo; na Tukiko na Trofimo, bana Asia.

⁵ Benabo iki bali batonga, butulindila biswe mu Troa.

Paulo mu Proa; unghimbucha Eutuko

⁶ A biswe tulinhya itanga kwinga Filipi hanuma ya shiku ja migati iti na kibimbya, tukashika kubo uko Troa mu shiku itano; tudila ko shiku mpungati.

⁷ Ha lushiku lwa kwandia lwa mfungo, aho bahemba bibilingile hamo kumeganya migati, Paulo ubalomela, wali uhaya kwinga ko ku ntondo; ushinga mu bulomeji wakwe kushisha yubiza bujiku hagati.

⁸ Jali jili ho tala ningi mu gorofa ya higulya, umo bibilingilile mo.

⁹ Nsumba umo, lina lyakwe Eutuko, wali igashije ngʼwidilisha, utindwa tulo nhale; aho Paulo ulomela ikanza itale, nsumba iki uhewa tulo, ugwa kufuma ku gorofa ya kadatu ya higulya, ubuchiwa achile.

¹⁰ Paulo wika ungwila, unkumbata, uhaya giki, Mutayogage iki bupanga wakwe butali mo muli wei.

¹¹ Hunaho ulinha hangi, na aho umala kumeganya migati, na kulya, na kuhoya ikanza itale kushisha dilu, giko winga ko.

¹² Bungʼwenha nsumba ali mpanga, kulungujiwa niyo no.

¹³ Aliyo biswe, twali tutonga kuja ku ngalaba, tulinhya itanga kuja Asso, kwenuko twali tuhaya kungʼwanukula Paulo; iki wali walagila chene, wei ngʼwenekele uhaya kuja lwa magulu.

¹⁴ Aho utusanga biswe mu Asso, tungʼwanukula, tuja, tushika Mitulene.

¹⁵ Huna tulinhya itanga kwinga kwenuko, ku ntondo tushika tulilolela Kiosi; ku ntondo bungi tukola mu Samosi, twikala mu Trogulio; ku ntondo bungi iyo tushika Mileto.

¹⁶ Iki Paulo upima gild, abitiile Efeso giki, atizudila mu Asia; iki wali wikangilija, ulu yudulika, wei abize mu Yerusalemi lushiku lwa Pentekote.

Paulo vilaga na Banamhala ba kanisa ya Efeso

¹⁷ Kufuma Mileto utuma nhungʼwa kuja Efeso, ubitana banamhala ba kanisa.

¹⁸ Aho bali biza kuli wei, ubawila giki, Bingʼwe mumanile gitumo naabizaga makanza gose hamo na bingʼwe kufuma lushiku lwa kwandia aho nushika mu Asia,

¹⁹ Nubyuntumamila Seba mu kwidokeleja kose na shisoji shingi, na kugengʼwa ukwaii kuniziila kulwa busigani wa Bayudaya;

²⁰ Gitumo nali natishishimulwa kumusombolela mhayo gose ugungʼwigelelilwe, na kumulanga hape mu miso ga banhu na buli kaya buli kaya,

²¹ Nubyubakanila Bayudaya na Bagriki ya koya kuli Mulungu, na kuzunya kuli Seba wiswe Yesu Kristo.

²² Na haha, lolagi, nene naja Yerusalemi natungilwe mu moyo, natamanile mihayo iyo ikunipandikila kwenuko;

²³ Ulu iti uyo Moyo Ngʼwela akutukanilaga mu buli nzengo uhaya giki, kutungwa na kuluhiwa shilinilindila.

²⁴ Aliyo natubala yeniyi, nulu natububala bupanga wane buli kinhu cha mpango kuli nene, nashikilije lugendo lwane na buyegi, na kwinhilija uko naanukula hali Seba Yesu, kuyikaniia evangeli ya kigongo cha Mulungu.

²⁵ Na haha, lolagi namanile giki, bingʼwe bose abo nubyuyelayela mu bingʼwe kumulomela butemi wa Mulungu, mutalanibona bushu wane hangi.

²⁶ Kulwa iyo namukanila bingʼwe lelo iyi giki, nene nelaga mu mininga ga banhu bose.

²⁷ Iki nali natishishimulwa kumulomela kalongeje kose ka Mulungu.

²⁸ Ilanghanagi bingʼwe benekele lulu, na idale lyose ilo Moyo Ngʼwela waangʼwita bingʼwe ku biza balanghani balyo, kuyilisha kanisa ya Mulungu, iyo waayigula na mininga gakwe ga ngʼwenekele.

²⁹ Iki nene namanile giki, hanuma ya kwinga kwane mhuge nghali jikwingila mu bingʼwe, jitalalichila kigongo i lidale;

³⁰ Hangi kufuma mu bingʼwe benekele balabuka banhu, balabyulungalunga mihayo igomagomile ya kubaduta bahemba hanuma yabo.

³¹ Kulwa iyo ikalagi miso, ngʼwizukwe giki, miaka idatu bujiku na limi nali natalekile kunganikila buli munhu na shisoji.

³² Na haha namutuula ho kuli Mulungu, na ku mhayo gwa kigongo chakwe, uyo gwadula kumuzenga na kungʼwinha wingiji mu benabo bose abeejiwa.

³³ Nali natikumva feza, nulu zahabu, nulu shizwalo kuli buli munhu ose.

³⁴ Bingʼwe benekele mumanile giki, makono genaya gaatumamaga kubona isho nugayiwa nene na benabo abali hamo na nene.

³⁵ Naangʼolekejaga kalolelo mu mihayo yose gitumo shingʼwigelile bingʼwe kutumama giko, kubagunana bagokolo, na kuyizukwa mihayo ya Seba Yesu, iyo uhaya Wei ngʼwenekele giki, Ili ya lubango kwinha kutinda kwanukula.

³⁶ Aho akamala kuhaya mihayo yeniyi utuja mazwi, ulomba hamo nabo bose.

³⁷ Nabo bose bulila no, bungwila Paulo mu nhingo, bumbipa no,

³⁸ Bupinihala no kutinda kulwa mhayo gwenuyo uguhaya giki, batalamona bushu wakwe hangi. Nabo bunshindikila kushisha ku ngalaba.