Shītwa 2 - Ilagano Ipya Lya

Bahemba bangʼwa Yesu busamijiwa Moyo Ngʼwela

¹ Aho lushiku lwa Pentekote lwali lushika, bali bubiza bose kihamo ngʼwipande limo.

² Kuhayumanila chali chiza kifutumo kufuma ngʼwigulu giti kifutumo cha nyaga gwa nguzu no, guyokaja numba yose umo bali bigashije.

³ Jubilongela ndimi jugabanika giti ndali ja moto; nalo lwigasha ha buli umo wabo.

⁴ Huna bose bokajiwa na Moyo Ngʼwela, bandia kulungalunga na ndimi jingi, gitumo Moyo wali ubinha kujilungalunga.

⁵ Mu Yerusalemi bali bazengile mo Bayudaya, banhu bishigwa, ba mu buli ihanga ilili hasilili ya igulu.

⁶ Aho kifutumo chenicho chali chiza, banhu bingi bibilinga, buzwangana, iki buli munhu ubigwa balilungalunga mu lulimi lwakwe.

⁷ Bose budedebala na bukumya, biwila boi bike giki, Angu, aba bose abalilungalunga bati Bagalilaya?

⁸ Tukwigwaga kinahe lulu buli munhu mu lulimi lwiswe ulo twaabyalilwa mo?

⁹ Baparthi na Bamedi na Baelamiti na bazengi ba Mesopotamia, na Buyudaya, na Kapadokia, Ponto na Asia,

¹⁰ Frugia na Pamfulia, Misri, na mapande ga Libia hihi na Kurene, na bageni abufuma Rumi, Bayudaya na bagaluki,

¹¹ Bakrete na Baarabu, tukubigwaga balilungalunga mu ndimi jiswe Shitwa shitale sha Mulungu.

¹² Budedebala bose na butawatawa, biwila boi bike giki, Mihayo iyi ili kinahe?

¹³ Aliyo bangi bubagimba kichilu, buhaya giki, Bakolagwa na minzi ga mizabibu mapya.

Lulomelo lwa ngʼwa Petro ha lushiku lwa Pentekote

¹⁴ Aliyo Petro, wimila hamo na benabo ikumi na umo, uhamuka higulya na ilaka lyakwe, ubahabulila giki, Bingʼwe bagosha Bayudaya, na bingʼwe bose aba muzengile Yerusalemi, managi iyi, na tegagi matu ku mihayo yane:

¹⁵ Iki aba batakolilwe, gitumo bingʼwe muliganikila; iki ili gwike saa ya kadatu ya limi;

¹⁶ Aliyo mhayo uyu guli uyo gwaahayiwa na nghangi Yoeli giki,

¹⁷ Hangi ilabiza mu shiku ja ku mhelo, Mulungu uhaya, nalabasamija bamibili bose Moyo wane, na bana bingʼwe bagosha na bakima balahanga, na bana bingʼwe basumba balabona kolechiwa, na banamhala bingʼwe balalota shiloti:

¹⁸ Chene na mu shiku jenijo nalabasamija basese bane bagosha na bakima Moyo wane, nabo balahanga;

¹⁹ Na nene nalafunya sha kukumya higulya ngʼwigulu, na shimanikijo hasilili mu si, mininga, na moto, na kuzuka kwa lyochi;

²⁰ Limi bugaluchiwa hubiza giiti, na ngʼweji kubiza mininga, aho lutali kwiza lushiku lwa Seba, lwenulo lutale na lukumuku.

²¹ Na ilabiza giki, uyo ose alalililila lina lya Seba, alapijiwa.

²² Bingʼwe bagosha ba Israeli, igwagi mihayo iyi: U Yesu wa Nazareti, ngosha olechiwa ku bingʼwe na Mulungu mu Shitwa sha budula na sha kukumya na shimanikijo, isho Mulungu ubyushita muli Wei hagati ya bingʼwe, gitumo bingʼwe benekele mumanile:

²³ Ngʼwenuyo uwali winhiwa ko gitumo kasigilile na kamanile ka Mulungu kufuma kale umo kaali, bingʼwe mukandima na makono ga bagomi, mukankema ha nsalaba, ngʼumulaga.

²⁴ Ngʼwenuyo Mulungu unjucha, utungula busungu wa kucha: iki yali itudulika Wei umiilwe nako.

²⁵ Iki Daudi waanghaya mihayo yakwe giki, Nubyumona Seba mu butongi wane shiku jose, iki ali ho ku nkono gwane gwa bulyo, natizunegenyiwa.

²⁶ Kulwa iyo ngholo yane yuyega, na lulimi lwane lukasangabala; hangi, mili gwane nago gulikala mu kwisagilwa,

²⁷ Iki utubuleka bupanga wane uko kulimu, nulu utumfunya Ngʼwela wako abone kubola.

²⁸ Wanimanikigije nzila ja bupanga; ukunokaja na buyegi mu miso gako.

²⁹ Badugu bagosha, leka namuwile hape i ya ngʼwa nkulugenji ntale wiswe u Daudi giki, Wei wali ucha, ujikwa, nacho kigila chakwe kili ho ku biswe kushisha lelo iyi.

³⁰ Aliyo iki wei walali nghangi, nanghwe walamanile giki, Mulungu unahilila kilahilo giki, Mu bubyile wa mu nkimbili gwakwe, mu kimili alamucha Kristo kwigasha ngʼwisumbi lyakwe lya butemi;

³¹ Iki wali utonja kuyibona iyi, waakuhaya kujuka kwa ngʼwa Kristo giki, Bupanga wakwe wali butulekwa kulimu, nulu mili gwakwe gwali gutubona kubola.

³² Ngʼwenuyo Yesu, Mulungu waanjucha, na biswe bose tuli bakaniji ba mhayo uyu.

³³ Iki Wei waagunguhiwa ku nkono gwa bulyo gwa Mulungu, nanghwe wamala kwanukula kuli Ise kwisagijiwa kwa Moyo Ngʼwela, wakisamijaga iki, icho mulikibona na kuchigwa.

³⁴ Iki Daudi walatalinhile ngʼwigulu, aliyo wei ngʼwenekele uhaya giki, SEBA akangʼwila Seba wane giki, Igashaga ku nkono gwane gwa bulyo,

³⁵ Kushisha nalabatuula banishi bako babize ipandilo lya magulu gako.

³⁶ Kuhva iyo, numba ya ba Israeli bose bamane gete gete giki, Mulungu waangʼwita Yesu, Ngʼwenuyo bingʼwe ngʼwali ngʼunkoma ha nsalaba, abize Seba na Kristo.

Banhu 3,000 buzunya

³⁷ Aho buyigwa iyi, buchingʼwa mu ngholo, bungʼwila Petro na batungʼwa bangi giki, Badugu bagosha twite kinahe lulu?

³⁸ Petro ubawila giki, Oyagi, mubatijiwe buli munhu wa mu bingʼwe mu lina lya ngʼwa Yesu Kristo kulwa kulekejiwa kwa shibi shingʼwe; ningʼwe mukwanukula cha kwinhiwa cha Moyo Ngʼwela.

³⁹ Iki kwisagijiwa uku kuli ku bingʼwe, na ku bana bingʼwe, na ku abo bose abali kule, bose abo Seba Mulungu wiswe akubitana.

⁴⁰ Ubakanilila na mihayo yingi mingi, na ubakomeleja, uhaya giki, Ipijagi kwinga mu kibyalilwe iki ichigomagomile.

⁴¹ Nabo abali bugwanukula mhayo gwakwe na buyegi bubatijiwa, lwise lwene bongejiwa kubo banhu giti 3,000. Shitile sha kanisa ya kwandia

⁴² Nabo bubyukomela mu kilangile cha batungʼwa, na mu kusangila, na mu kumeganya ngati, na mu kulomba.

⁴³ Buli munhu udingʼwa na lyogohya, na sha kukumya shingi na shimanikijo shali Shitwa na batungʼwa.

⁴⁴ Bose abuzunya, bubiza kihamo, busangila mu shinhu shabo shose;

⁴⁵ Nabo bujinja sabo jabo na shikolo, bushigabanhya ku bose, gitumo kugayiwa kwa buli munhu umo kwali kuli.

⁴⁶ Bukomela buli lushiku na moyo gumo mu hekalu, na kumeganya ngati kuja buli kaya buli kaya, bubyanukula shiliwa shabo na busangabazu na ngholo ndyehu.

⁴⁷ Bubyunumba Mulungu, bubyubayeja banhu bose; Seba ongeja ku kanisa buli lushiku abo bubyupijiwa.