Shītwa 17 - Ilagano Ipya Lya

Paulo ulomela mu Thesalonika

¹ Aho bali bumala kubita mu Amfipoli na Apolonia, bushika Thesalonika, umo lyali lili ibilingilo lya Bayudaya:

² Na Paulo gitumo chimile chakwe kili wingila mo kubo, wibugilija nabo ya mu Shandikwa Sabato idatu.

³ Ubakundulila na ufubola giki, shingʼwigelelilwe Kristo kuluhiwa na kujuka mu bafu; hangi giki, Yesu, Uyo namulomelela, u Ngʼwene Kristo.

⁴ Na bamo mubo buzunya, budimana na Paulo na Silas; na mu Bagriki a balamya ba Mulungu bingi no, na bakima batale nabo bali bati bagehu.

⁵ Aliyo Bayudaya abatazunije bali budingʼwa na wilu, biyenhela bagosha bahunga bamo ba nhungwa mbi, nabo aho bulibilinga ibita bita nsambo mu nzengo; buyipindya numba ya ngʼwa Yasoni, bubakoba babafunye hanze ku banhu.

⁶ Aho bali batubasanga, bungwesa Yasoni na badugu bamo ku butongi wa basugi ba nzengo, buhamuka giki, Aba bayugulile si bashikaga na kunu;

⁷ U Yasoni wabegelegije, hangi boi bakwitaga wanishi ku shilagilo sha Kaisari, buhaya giki, angu, ali ho ntemi ungi, Ngʼwene Yesu.

⁸ Bubakoyakoya banhu na batale ba nzengo aho bigwa mihayo yeniyi.

⁹ Nabo aho bali bumala kumpya funge u Yasoni na biye, bubalekela baje.

Paulo ulomela mu Beroya

¹⁰ Haho na haho badugu bubatuma Paulo na Silas bujiku baje Beroya; nabo aho bushika ko bingila ngʼwibilingiio lya Bayudaya.

¹¹ Benabo bali bali ba wiza kutinda a ba mu Thesalonika, iki bugwanukula mhayo na kukalalwa kose, buli lushiku bakukobaga mu Shandikwa, babone ulu mihayo iyi ili giko.

¹² Kulwa iyo bingi ba benabo buzunya; hangi bakima Bagriki abakujiwa, na bagosha nabo bali bati bagehu.

¹³ Aliyo aho Bayudaya ba Thesalonika bali bumana giki, mhayo gwa Mulungu gukulomelagwa na Paulo na mu Beroya, bushika nu kwene bubayombya mabita.

¹⁴ Haho na haho badugu buntuma Paulo aje kushika ku nyanza: aliyo Silas na Timoteo bali bikala ko.

Paulo mu Athene

¹⁵ Abo abali bunshindikila Paulo buntwala kushika Athene; nabo aho bumala kwanukula kilagilo cha kuli Silas na Timoteo giki, banguhe kwiza kuli wei, huna buja.

¹⁶ Aho Paulo wali ubalindila mu Athene, usatwa no mu moyo gwakwe aho ubona nzengo gokalile na shikolile sha kulamiwa.

¹⁷ Kulwa iyo wibugilija ngʼwibilingilo na Bayudaya na banhu bishigwa mu kulamya, na mu nghungʼwano buli lushiku nabo abibona nanghwe.

¹⁸ Aliyo bamo ba basimbi ba masala ba mu Baepikurio, na Bastoiko, bunsanga. Bangi buhaya giki, Wanyibubu uyu atogilwe kuhaya ki? Bangi giki, Ulu wangemela, ali nsomboji wa bamulungu bageni, iki walubalomelaga mihayo ya ngʼwa Yesu na bujuko.

¹⁹ Huna lulu bundima, bunt wala ko Areopago, buhaya giki, Angu, twadula kukamana kalangile aka kapya, ako ulikahaya bebe?

²⁰ Iki ukwenhaga mihayo migeni mu matu giswe; tutogilwe kumana lulu makulu ga mihayo yeniyi.

²¹ (Iki bana Athene bose na bageni abazengile mo batayegelaga mihayo yingi, ulu iti kuwila nulu kwigwa mhayo mpya.)

Lulomelo lwa ngʼwa Paulo mu Athene

²² Huna lulu Paulo wimila hagati ya Areopago, uhaya giki, Bingʼwe bagosha ba Athene, nakumubonaga mu mihayo yose mulidakila kalamije.

²³ Iki aho nuyelayela, nakushilolaga i sha kalamije shingʼwe, nubona ngʼwalilo ugwandikilwe giki, KULI MULUNGU ATAMANAGWA. Ngʼwenuyo mukanamyaga mu butumana, hu Ngʼwene lulu namufubolela bingʼwe.

²⁴ Mulungu Uyo waashisema si na shinhu shose ishili mo, iki Wei ali Seba wa igulu na si, atikalaga mu hekalu ja kubejiwa na makono;

²⁵ Nulu atatumamilagwa na makono ga banhu giti ugayiwa kinhu chose chose, iki Wei ngʼwenekele akabinhaga bose bupanga, na miuyi na shinhu shose;

²⁶ Nanghwe waabeja buli ihanga lya banhu na mininga gamo, bikale ha si yose, ubalongeja makanza agahelilwe na kale, na mimbi ja wikalo wabo;

²⁷ Giki bankobe Seba, ulu hamo bambabashebabashe na kumona, aliyo nahene ati kule na buli munhu wa mu biswe:

²⁸ Iki muli Wei tuli bapanga, tukushiminzaga, hangi tuli ho bapanga; gitumo bamo ba batungi ba mihayo bingʼwe baahaya, Iki na biswe tuli bubyile wakwe.

²⁹ Iki tuli bubyile wa Mulungu lulu, shitatwigelile biswe kuwiganika bumulungu wakwe giki, wikolile na zahabu nulu feza nulu iwe, i kinhu kipunzile na bubeja na bubamhija wa munhu.

³⁰ A makanza genayo ga butumana Mulungu ubitiila kugalola, aliyo i haha akubalagilaga banhu bose hose hose giki, boye;

³¹ Iki waatuula ho lushiku mulo alabalekanya mo ba mu si mu butungilija, muli munhu Uyo waantuula ho, nanghwe waabinha banhu bose bumani gete iki waanjucha mu bafu.

³² Aho bigwa mihayo ya kujuka kwa bafu, bangi bubyeda; bangi buhaya giki, Tukukudegeleka bebe hangi mu mhayo uyu.

³³ Giko Paulo winga mugati yabo uja.

³⁴ Aliyo bagosha bamo budimana nanghwe, buzunya: mu benabo walali mo Dionusio, muna Areopago, na nkima umo lina lyakwe Damari, na bangi hamo nabo.