Shītwa 16 - Ilagano Ipya Lya

Timoteo usolwa kuja nabo

¹ Huna ushika Derbe na Lustra; henaho walali ho nghemba umo, lina lyakwe Timoteo, ngʼwana wa nkima Nyudaya nzunya: aliyo ise Ngriki.

² Uyo wali ukanilwa chiza na badugu ba mu Lustra na Ikonio.

³ Ngʼwenuyo Paulo walatogilwe aje hamo nanghwe; na untwala, unsala kulwa nguno ya Bayudaya abo bali mu mapande genayo: iki bose bitegelegije giki, ise ali Ngriki.

⁴ Aho bubyubita mu mizengo yeniyo, bubinha shilagilo isho shalagililwe na batungʼwa na banamhala abali mu Yerusalemi giki, bashidime.

⁵ Giko lulu makanisa gali gubyujamiwa mu kuzunya, nabo biyongeja bukumi wabo buli lushiku.

Paulo witanwa mu kolechiwa kuja Makedonia

⁶ Aho bali bubita mu si ya Frugia na Galatia, iki bakalemejiwa na Moyo Ngʼwela kulungalunga mhayo mu Asia;

⁷ Aho bali butulumenhela Musia, bugema kuja mu Bithunia; na Moyo wa Yesu walatubazunilija;

⁸ Huna bubita mu Musia, butulumenhela Troa.

⁹ Na kolechiwa kwali kungʼwilongela Paulo mu bujiku: Walali ho ngosha wa Makedonia wimila, alingʼwikumbilija, uhaya giki, Kilaga wingile mu Makedonia, utugunane.

¹⁰ Aho wali wamala kubona kolechiwa uku, haho na haho tukoba kuja mu Makedonia, iki tupima nghana giki, Seba watwitanaga biswe kubalomela evangeli.

¹¹ Huna lulu aho tulinhya itanga kwinga Troa, tuja wima kushika Samothraki, ku ntondo tushika Neapoli.

Ba Paulo bushika Filipi

¹² Kwinga kwenuko tushika Filipi, hu gwene nzengo ntale gwa ipande ilo lya Makedonia, boma ya Barumi: twali twikala mu nzengo gwenuyo shiku jimo.

¹³ Ha lushiku lwa Sabato tufuma hanze ya mita, mu nghilimva ya mongo, iki tukiganika kwenuko lili ipande lya kulombela; aho twigasha, tulungalunga na bakima abizile kwibilinga ko.

Nzunya wa kwandia mu si ya Europa

¹⁴ Na nkima umo, lina lyakwe Ludia, njinja wa langi nalaluku, wa nzengo gwa Thuatira, uyo walali namya wa Mulungu, utudegeleka; hu ngʼwene Seba uyigula ngholo yakwe, ayidime mihayo ilihayiwa na Paulo.

¹⁵ Aho wamala kubatijiwa wei na ba ha kaya yakwe, utwikumbilija, uhaya giki, Ulu ngʼwanibonaga ndi ngʼwishigwa kuli Seba, ingilagi ngʼwikale mu kaya yane, nanghwe utuhimbila.

Paulo ugupeja moyo mi muli nkima nchuja

¹⁶ Yubiza ho, aho tukujaga kwipande lya kulombela, umanhya na biswe ngʼwaniki umo uyo walali na moyo gwa kisato, uyo ubyubenhela baseba bakwe sabo ningi kulwa kuchuja.

¹⁷ Ngʼwenuyo wali unondela Paulo na biswe, ubyuhamuka, uhaya giki, Banhu aba bali basese ba Mulungu ali higulya no, abakutulomelaga nzila ya bupiji.

¹⁸ Wita giko shiku ningi. Aliyo Paulo, usatiwa no, ugaluka, uguwila moyo uyo giki, Nakulagilila bebe mu lina lya ngʼwa Yesu Kristo ungʼwinge. Gungʼwinga ngʼwikanza lyenilo duhu.

Paulo na Silas buluhiwa, buponyiwa mu jela

¹⁹ Aho baseba bakwe bubona giki, kwisagilwa kwabo kwa kupandika sabo kwashilaga, bubadima Paulo na Silas, bubagwesanja mu nghungʼwano ku butongi wa batale;

²⁰ Aho bumala kubenha ku basugi, buhaya giki, Banhu aba bakukoyakoyaga no nzengo gwiswe, iki bali Bayudaya,

²¹ Bakulomelaga shimile isho shili sha ngilo ku biswe kushanukula, nulu kushita, iki biswe tuli Barumi.

²² Huna banhu bose bububukila kihamo, na basugi aho bubatandaguja na kuzuja shizwalo shabo, bulagila batulwe mhanga.

²³ Aho bumala kubatula milanga mingi, bubaponya mu jela, bunagila nindi wa jela kubalinda no;

²⁴ Ngʼwenuyo, iki wanukula kilagilo giko, ubaponya mu numba ya mugati, na ubatunganija magulu gaho ngʼwitungilo.

Nindi wa jela ugaluka hubiza nzunya

²⁵ Aho bujiku hagati Paulo na Silas bakulombaga na kungʼwimbila Mulungu mimbo ga bulumbi a batungwa bangi balibadegeleka.

²⁶ Kuhayumanila, yubiza ho nyahinga nhale kushisha nose musingi gwa jela gunegenyiwa: haho na haho nzwigi jose jiguka, na nhendele ja bose jutaliguka.

²⁷ Nindi wa jela aho umisha, na ubona nzwigi ja jela jigukile, usopola lilushu, wendibulaga ngʼwenekele, iki wiganika a batungwa bapelaga.

²⁸ Aliyo Paulo uhamuka na ilaka itale, uhaya giki, Utiziyitila ngʼwenekele kibi; iki biswe bose tuli aha.

²⁹ Ulomba tala jenhwe, ukolobela mugati, ugwa ha si mu butongi wa ngʼwa Paulo na Silas, alidetema.

³⁰ Huna ubafunya hanze, uhaya giki, Baseba, shinigelelilwe nite ki napijiwe?

³¹ Nabo buhaya giki, Nzunyage Seba Yesu Kristo, nangho ukupijiwa, u bebe na ba mu kaya yako.

³² Huna lulu bunomela mhayo gwa Seba, wei na banhu bose ba mu kaya yakwe.

³³ Nanghwe ubatwala mu saa yeniyo ya bujiku, uboja malonda gaho; ubatijiwa u wei na bose bakwe haho na haho.

³⁴ Ubatwala higulya mu numba yakwe, ubatengela shiliwa, uyega no hamo na ba kaya yakwe bose, iki wamala kunzunya Mulungu.

Kutaligulilwa kwa ngʼwa Paulo na Silas

³⁵ Aho wali wangaluka, basugi butuma bashilikale batale, buhaya giki, Bataligulilage banhu benabo baje.

³⁶ Nindi wa jela unsombolela Paulo mihayo yeniyo giki, Basugi batumaga mhayo giki, Mutaligulilwe. Nahene lulu, fumagi, muje mu mhola.

³⁷ Aliyo Paulo ubawila giki, Batutulile milanga hape mu miso ga banhu, aho tutali kulekanyiwa nsango a biswe tuli Barumi, hangi batuponyaga mu jela; i haha hu batogilwe kutuponya hanze mu mbisila; I yaya, aliyo ni bizage benekele, batufunye hanze.

³⁸ Bashilikale batale bubasombolela basugi mihayo yeniyi; nabo bogoha no aho bigwa giki, bali Barumi.

³⁹ Nabo biza, bubikumbilija, na aho bumala kubafunya hanze bubiyandila giki, binge mu nzengo gwabo.

⁴⁰ Aho bufuma mu jela, bingila mu kaya ya ngʼwa Ludia; nabo aho bibona na badugu, bubalunguja, huna buja.