Shītwa 15 - Ilagano Ipya Lya

Halali mu kanisa kulwa kusalwa

¹ Huna lulu banhu bali butulumenha kufuma Buyudaya, biza bubyubalanga a badugu giki, Mutudula kupijiwa ulu mutusalwa giti chimile cha ngʼwa Musa umo kili.

² Paulo na Barnabas aho bali bilwisha na kwihalalija nabo na nguzu, badugu bulomana giki, Paulo na Barnabas na bichabo bangi balinhe kuja Yerusalemi ku batungʼwa na banamhala kulwa mhayo gwa halali yeniyi.

³ Aho bushindikilwa lulu na ba kanisa, bubyubita mu Foiniki na Samaria, bubyusombola kugaluchiwa kwa bana mahanga: nabo bubayeja badugu bose no no no.

⁴ Aho bali bushika Yerusalemi begelejiwa na ba kanisa na batungʼwa na banamhala, bubasombolela mihayo yose iyo Mulungu uyitilila hamo nabo.

⁵ Aliyo bamo ba Kazunije ka Bafarisayo abazunije, bimila buhaya giki, Shigelile kubasala na kubalagila kudima shilagilo sha ngʼwa Musa.

Longʼwe mu Yerusalemi; mhayo gwa ngʼwa Petro

⁶ Huna batungʼwa na banamhala bibilinga kugulola chiza mhayo gwenuyu.

⁷ Aho kubiza ho kwihalalija kwingi, Petro wimila, ubawila giki, Badugu bagosha, ambu bingʼwe mumanile gitumo Mulungu wali usola mu biswe mu shiku ja kwandia giki, bana mahanga bigwe mhayo gwa evangeli mu nomo gwane, huna bazunye.

⁸ Mulungu nanghwe, Uyo ajimanile ngholo, ubakanila, iki ubinha Moyo Ngʼwela gitumo waatwinha na biswe;

⁹ Nanghwe walatitile solanya hagati ya biswe na boi, ujeja ngholo jabo kulwa kuzunya.

¹⁰ Mulingema Mulungu ni buli lulu, na kutuula ikondejo mu nhingo ja bahemba, ilo bakulugenji biswe nulu biswe twali tuduma kulibucha?

¹¹ Aliyo biswe twazunya giki, tukupijiwa kulwa kigongo cha ngʼwa Yesu Kristo giti na boi.

Mhayo gwa ngʼwa Barnabas na Paulo

¹² Huna lulu bose ba libilinga bufulika du, bubadegeleka Barnabas na Paulo balisombola shimanikijo na sha kukumya isho Mulungu uyitilila hamo nabo mu bana mahanga.

Mhayo gwa ngʼwa Yakobo

¹³ Hanuma aho benabo bufulika, Yakobo ushosha uhaya giki, Badugu bagosha, nidegelekagi.

¹⁴ Simeoni wasombolaga gitumo Mulungu wali wandia kubalola bana mahanga, abasole banhu mubo ba ku lina lyakwe.

¹⁵ Na mihayo ya bahangi yigwindanya chene: gitumo yaandikwa giki,

¹⁶ Hanuma ya mihayo iyi nakushoka kuyizenga hangi i numba ya ngʼwa Daudi, iyigwile; nakuzenga hangi bukenaguku wayo, na kuyimilija;

¹⁷ Giki, abasaga ho mu banhu bankobe Seba, na bana mahanga bose abo bitanililwe lina lyane, wahaya Seba, Uyo akitaga mihayo iyi yose.

¹⁸ Shitile shakwe shose shumanwa na Mulungu kufuma kwandia kwa si.

¹⁹ Kulwa iyi nene nalekanya giki, tutizubakoyakoya abo balingalukila Mulungu kufuma mu bana mahanga;

²⁰ Aliyo tubandikile giki, bikomanye na migilo ya kwitongeleja ku shikolile, na bujingi, na sha kunigwa, na mininga.

²¹ Iki kufuma shiku ja kale mu buli nzengo Musa ali nabo abalomela mihayo yakwe, yusongʼwa buli Sabato mu mabilingilo.

Nyaluba ya longʼwe ku ba kanisa mu bana mahanga

²² Hunaho batungʼwa na banamhala hamo na ba kanisa bose yubatoga kubakoma bagosha ba mubo, na kubatuula Antiokia hamo na Paulo na Barnabas; ha bene Yuda uyo akitanagwa Barsabas na Silas, bagosha batale mu badugu;

²³ Butuma mu nkono gwabo, bandika giki, Batungʼwa na banamhala na badugu ku badugu biswe ba mu bana mahanga abo muli mu Antiokia na Suria na Kilikia, twamugisha.

²⁴ Iki twigwaga giki, bichiswe bamo abali bufuma ku biswe baamukoyakoyaga na mihayo yabo, bumuzwanja bupanga wingʼwe; benabo tutabalagilile chene:

²⁵ Biswe twibilingile bose kihamo, yatutoga kubakoma bagosha mu biswe na kubatuma ku bingʼwe hamo na batogwa biswe Barnabas na Paulo,

²⁶ Banhu abiiyinha ko bupanga wabo kulwa lina lya Seba wiswe Yesu Kristo.

²⁷ Kulwa iyo twabatuma Yuda na Silas, abo benekele bakumusombolela mihayo yeniyi na milimo yabo.

²⁸ Iki yantoga Moyo Ngʼwela na biswe giki, tutizumutuulila nigo ntale kukila mihayo iyi iyigelile giki,

²⁹ Ngʼwikomanye na isho shafunyiwa mu shitambo ku shikolile, na mininga, na sha kunigwa, na bujingi; isho ulo ngʼwi komanya musho m ukwita chiza. Ngʼwikale mhola.

³⁰ Huna lulu aho bulagwa, bu ja Antiokia; na aho bumala kubabilinga banhu bose, bubinha i nyaluba.

³¹ Aho bumala kuyisoma, buyega kuhva kulungujiwa kwenuku.

³² Yuda na Silas nabo, iki na bene bali bahangi, bubakomeleja badugu na mihayo mingi, na kubajamya.

³³ Aho bali budila ko ikanza, bulagwa mu mhola na badugu bashoke ku benabo bali bubatuma.

³⁴ Aliiyo yuntoga Silas kushinga kwenuko.

³⁵ Paulo na Barnabas bali bikala mu Antiokia, bubyulanga na kulomela mhayo gwa Seba kihamo na bangi bingi.

Lugendo lwa kabili lwa Paulo mu nimo gwa Mulungu

³⁶ Hanuma ya shiku jimo Paulo akangʼwila Barnabas giki, Tushoke hangi tukabalole badugu biswe mu buli nzengo umo twali twalomela mhayo gwa Seba, tumane umo bali.

³⁷ Barnabas wigongeja kuntwala nabo Yohana uyo akitanagwa Marko:

³⁸ Aliyo Paulo wali upima iti chiza kuntwala nabo uyo akabaleka uko Pamfulia, hangi walatajile hamo nabo ku milimo.

³⁹ Yubiza ho kwilemelwa kutale kushisha bulekana benekele na benekele, Barnabas untwala Marko, ulinhya itanga kuja Kupro;

⁴⁰ Aliyo Paulo unsola Silas ubuka kuja aho ulombelwa kigongo cha Mulungu na badugu.

⁴¹ Ubita mu Suria na Kilikia, ubajamya ba kanisa.