Shītwa 14 - Ilagano Ipya Lya

Milimo yabo mu Ikonio

¹ Ikabiza mu Ikonio giki, bali bingila bubili wabo ngʼwibilingilo lya Bayudaya, bulungalunga, nose ibita itale lya Bayudaya na Bagriki buzunya.

² Aliyo Bayudaya abatazunije bubayugulayugula a bana mahanga, bugabihya maganiko gabo babakolwe badugu.

³ Ikanza itale lulu bali bikala ko bulungalunga na bugimu muli Seba, Uyo wali ugukanila mhayo gwa kigongo chakwe, ubinha shimanikijo na sha kukumya shitwe na makono gaho.

⁴ Aliyo bamunhu ba mu nzengo bali bulekana, bangi bubiza ha lwande lwa Bayudaya, na bangi ha lwande lwa batungʼwa.

⁵ Aliyo bana mahanga na Bayudaya hamo na batale babo aho bubatuuliila kubitila sha bubi na kubaponda mawe,

⁶ Boi bitegeleja mhayo uyu, bupelela Lustra na Derbe, mizengo ya mu Lukaonia, na si ibimbikanilwe ho;

⁷ Kwenuko bubyulomela evangeli.

Paulo umpija munhu nsonji mu Lustra

⁸ Na mu Lustra wali wigasha munhu umo, nema wa magulu, walali nsonji kufuma mu nda ya ngʼwa nina, walatinashiminza na kamo.

⁹ Ngʼwenuyo ungʼwigwa Paulo aho alilungalunga, uyo aho unkalalila, umona giki, ali nako kuzunya kwa kupijiwa.

¹⁰ Uhaya na ilaka itale giki, Bukaga, imilaga na magulu gako wima. Nanghwe ujuduka ushiminza.

¹¹ Aho mabita gubona iyo Paulo wita, buhamukila na ilaka lyabo mu Kilukaonia, buhaya giki, Bamulungu batwikiilaga biholile na banhu.

¹² U Barnabas bungʼwilika giki, Zeu; nu Paulo giki, Herme, iki wei walali ntale wa kulungalunga.

¹³ Huna ngabiji wa Zeu uyo hekalu yakwe yali haho na nzengo, wenha nzagamba na ngikili ja mabulabo ha mibita, walatogilwe hamo na mabita kutambila kitambo.

¹⁴ Aliyo batungʼwa, Barnabas na Paulo, aho bigwa iyi, butandula shizwalo shabo, bupela, bingila ngʼwibita, buhamuka,

¹⁵ Buhaya giki, Bagosha, mukwitaga mihayo iyi ni buli? Ambu, na biswe tuli banhu ba nhungwa giti bingʼwe, tulimulomela evangeli giki, muyinhile ngongo mihayo yeniyi ya dalali, mungalukile Mulungu mpanga, Uyo waasema igulu, na si, na nyanza, na shose ishili mo;

¹⁶ Uyo mu shibyalilwe ishaabita, ubaleka bana mahanga bose kushiminzila mu nzila jabo benekele.

¹⁷ Aliyo walatuleka ngʼwenekele atikanilile, iki akitaga ya wiza, akatwinhaga mbula kufuma ngʼwigulu na makanza ga buponi, okaja ngholo jiswe na shiliwa na buyegi.

¹⁸ Nulu buhaya giko, nahene yuba-koya kubalemeja batizubatambila kitambo.

Paulo upondwa mawe mu Lustra

¹⁹ Huna lulu Bayudaya bali biza kufuma Antiokia na Ikonio; nabo bubahuhuta banhu, bumponda mawe Paulo, bungwesela hanze ya nzengo, biganika giki, wachaga.

²⁰ Aliyo bahemba aho bimila bampindije, ubuka wingila mu nzengo, na ku ntondo winga hamo na Barnabas kuja Derbe.

Batungʼwa bushokanya umo babitilile; bujamya bazunya; bubakoma banamhala

²¹ Alio bali bumala kulomela evangeli mu nzengo uyo, na kwita bahemba bingi, bushokanya Lustra, na Ikonio, na Antiokia.

²² Bubajamya bupanga wa bahemba, bubakomeleja kwiyumilija mu kuzunya, hangi gitumo shitwigelelilwe kuwingila butemi wa Mulungu mu nzila ya kuluhiwa kwingi.

²³ Aho bali bumala kubakomelela banamhala buli kanisa, na bulomba hamo na kudila nzala, bubatuula ho kuli Seba, Uyo banzunije.

²⁴ Nabo bubita mu Pisidia, bushika Pamfulia.

²⁵ Aho bumala kulomela mhayo mu Perga, butulumenhela Atalia;

²⁶ Kufuma uko bulinhya itanga kuja Antiokia, uko bali balombelwa kigongo cha Mulungu kulwa nimo uyo bagushikiligije.

²⁷ Aho bali bushika bubabilinga ba kanisa, bubasombolela mihayo yose iyo Mulungu uyitilila hamo nabo, hangi gitumo waabigulilaga bana mahanga luwigi lwa kuzunya.

²⁸ Bikala kwenuko shiku ningi hamo na bahemba.