Shītwa 13 - Ilagano Ipya Lya

Paulo na Barnabas bitanwa na Moyo Ngʼwela kuja ku bana mahanga

¹ Mu kanisa ya mu Antiokia bali bali mo bahangi na balangi, benaba, Barnabas, na Simeoni uyo akitanagwa Nigeri, na Lukio muna Kurene, na Manaeni, uyo wali ulelwa na Ntemi Herode, na Saulo.

² Benabo aho buntumamila Seba na budila nzala, Moyo Ngʼwela uhaya giki, Nikomanijagi Barnabas na Saulo ku nimo uyo nabitanilile.

Lugendo lwa kwandia lwa ngʼwa Paulo mu nimo gwa Seba

³ Huna lulu aho bumala kudila nzala na kulomba bubatuulila makono, bubalaga baje.

⁴ Benabo iki butungʼwa na Moyo Ngʼwela, butulumenhela Selukia; kufuma kwenuko bulinhya itanga kuja Kupro.

⁵ Nabo aho bushika Salamisi, bulomela mhayo gwa Mulungu mu mabilingilo ga Bayudaya; Yohana nanghwe walali hamo nabo wa kubagunana.

Eluma unghangija Paulo; uzungʼwa

⁶ Aho bali bumala kubita ngʼwijinga kushika Pafo, bumona munhu umo, wa mabinda, nghangi mama, Nyudaya, lina lyakwe Bariyesu;

⁷ Ngʼwenuyo walali ho hamo na nsugi Sergio Paolo, munhu wa masala. Ngʼwenuyo wali ubitana Barnabas na Saulo bize ku ngʼwakwe, ukoba kwigwa mhayo gwa Mulungu.

⁸ Aliyo uyo wa mabinda, Eluma (iki lina lyakwe lyushomelejiwa chene) ubahangija, ukoba kunchamya nsugi, aleke kuzunya.

⁹ Aliyo Saulo (hu na ngʼwene Paulo) izulile na Moyo Ngʼwela, unkalalila,

¹⁰ Uhaya giki, Bebe, uyo okalile na bulembalembi bose na buhunga bose, bebe ngʼwana wa Shetani, bebe ngʼwanishi wa butungilija bose, utuleka kuchamya nzila ngololoku ja Seba?

¹¹ Ali lulu lolaga, nkono gwa Seba guli hali bebe, nangho ukubiza moku, utulibona limi kakanza. Haho na haho shungwila wija na giiti; upindilapindila, ukoba munhu wa kundima nkono antongele.

¹² Hunaho nsugi aho ubona iyo yitagwa, uzunya, udedebala kulwa kulanga kwa Seba.

¹³ Aho Paulo na biye bulinhya itanga binga Pafo, bushika Perga ya Pamfulia; aliyo Yohana ubaleka ushoka Yerusalemi.

Paulo ulomela ngʼwibilingilo lya Antiokia ya Pisidia

¹⁴ Aliyo aho bali bubita mu Perga, bushika Antiokia ya Pisidia; bingila ngʼwibilingilo ha lushiku lwa Sabato, bigasha.

¹⁵ Hanuma ya kusongʼwa kwa shilagilo na kwa bahangi, batale ba ibilingilo bufuma munhu kubo, buhaya giki, Badugu bagosha ulu muli na mhayo gwa kubaganikila banhu, nahene hayagi.

¹⁶ Aho Paulo ubuka, ubahungija nkono, uhaya giki, Bagosha ba Israeli, na bingʼwe abo mungʼogohile Mulungu, degelekagi.

¹⁷ Mulungu wa banhu aba ba Israeli wali ubasola bakulugenji biswe, na ubagunguhya banhu aho bali bikala bageni mu si ya Misri, na ubinja boi mu si iyo na nkono gwa budula butale.

¹⁸ Nanghwe wali wiyumilija nabo miaka makumi ane ngʼwipolu.

¹⁹ Huna lulu aho wali umala kugayagaja mahanga mpungati mu si ya Kanani, ubagabila benabo si yabo,

²⁰ Hanuma ya yeniyo ubinha balekanya, miaka giti magana ane na makumi atano, kushisha kuli nghangi Samueli.

²¹ Hunaho bulomba ntemi, na Mulungu ubinha Saulo, ngʼwana wa ngʼwa Kishi, ngosha wa luganda lwa Benjamini, ikanza lya miaka makumi ane.

²² Aho wali ungʼwinja uyo, umucha Daudi wa kubiza ntemi wabo: unkanila, uhaya giki, Namonaga Daudi ngʼwana wa Yese, munhu uyo ngholo yane yuntogwa, uyo akwita yose iyo natogilwe.

²³ Kufuma mu bubyile wa munhu uyu gitumo kwisagija kwali, Mulungu waababukija ba Israeli Mpija u Yesu;

²⁴ Aho Yohana wali watonja kubalomela banhu bose ba Israeli kubatija kwa koya, aho Wei walatali kwiza.

²⁵ Aho Yohana ubyushikilija lugendo lwakwe, uhaya giki, Mukuniganikilaga nene, himba ndi nani? Nene nati Ngʼwene. Aliyo lolagi, Uyo izile hanuma yane, Ngʼwenuyo natigelelilwe kutaligula shilatu sha mhambala jakwe.

²⁶ Badugu bagosha, bana ba kibyalilwe cha ngʼwa Abrahamu, nabo mu bingʼwe mungʼogohile Mulungu; mhayo gwa bupiji wenubu gwaatungʼwa ku bingʼwe.

²⁷ Iki abo bazengile Yerusalemi, na batale babo, iki bali batamanile Wei, nulu na malaka ga bahangi ayo gakasomagwa buli Sabato, bali bugashikilija aho bunekanya nsango.

²⁸ Nabo nulu bali batubona i nguno ya kumulagila, nahene bunomba Pilato giki, abulagwe.

²⁹ Aho bali bumala kushikilija mihayo yose iyo yaandikwa ya kunghaya Wei, bunsungula ku linti, buntuula mu kigila.

³⁰ Aliyo Mulungu unjucha mu bafu;

³¹ Nanghwe waabilongelaga shiku ningi benabo abali bufuma Galilaya hamo nanghwe kulinha kuja Yerusalemi, ha bene bakaniji bakwe haha ku banhu.

³² Na biswe tukumulomelaga evangeli giki, u kwisagija uko wali ubisagija bakulugenji biswe,

³³ Mulungu waatushikiligija biswe bana babo, aho unjucha Yesu; gitumo yaandikwa mu Zaburi ya kabili giki, Bebe uli Ngʼwana wane, Nene nakubyalaga Bebe lelo iyi.

³⁴ Hangi giki, waanjucha mu bafu, atizushoka hangi mu kubola, gwene uguhaya giki, Nakungʼwinha bingʼwe shigongo sha ngʼwa Daudi, shela na sha nghana.

³⁵ Kulwa iyo uhaya ngʼwipande lingi hangi giki, Utunekanija Ngʼwela wako abone kubola.

³⁶ Iki u Daudi, aho wali wamala kubagunana ba kibyalilwe chakwe, gitumo Mulungu atogilwe, ushutula akatuulwa hamo na bakulugenji bakwe, nanghwe ubona kubola.

³⁷ Aliyo Ngʼwenuyo Mulungu waanjucha, walatabonile kubola.

³⁸ Kulwa iyo, imanike ku bingʼwe, badugu bagosha, giki, Muli munhu Ngʼwenuyu mukulomelagwa kulekejiwa kwa shibi;

³⁹ Hangi muli Ngʼwenuyu buli munhu uyo anzunije utungiligijiwa mu mihayo yose iyo ngʼwali mutudula kutungiligijiwa mu shilagilo sha ngʼwa Musa.

⁴⁰ Kulwa iyo ilanghanagi itizumushikiila iyo yaahayiwa mu bahangi giki,

⁴¹ Lolagi, bingʼwe badalahi, kumyagi, mushile, iki Nene nakwitaga nimo mu shiku jingʼwe, nimo uyo bingʼwe mutuguzunya na hado, nulu munhu umusombolela gete.

⁴² Aho Bayudaya bufuma ngʼwibilingilo, bana mahanga bubikumbilija giki, balomelwe mihayo iyi ha Sabato yingi.

⁴³ Aho kwibilinga kusambala, Bayudaya bingi na a bagaluki bishigwa mu kulamya bubalondela Paulo na Barnabas; benabo bubalungalungila, bubakomeleja kwiyumilija mu kigongo cha Mulungu.

Bayudaya busondagula iyo yalomelwa na Paulo

⁴⁴ Ha Sabato yingi, hihi bose ba nzengo bali bibilinga hamo kudegeleka mhayo gwa Mulungu.

⁴⁵ Aho Bayudaya bugabona mabita, bokala na wilu, buyihalalija mihayo iyo ikuhayiwagwa na Paulo, buhalalila na kusondagula.

Paulo na Barnabas bubashikila bana mahanga

⁴⁶ Hunaho Paulo na Barnabas bulungalunga na bugimu, buhaya giki, Shali shigelile mhayo gwa Mulungu gulomelwe ku bingʼwe tame; aliyo iki ngʼwagupamila kungi, na ngʼwibala benekele mutigelelilwe bupanga butushila, lolagi, twabagalukila bana mahanga.

⁴⁷ Iki Seba waatulagila chene giki, Nakutuulaga Bebe hubiza isana lya ku bana mahanga, ubize wa bupiji kushisha ku mhelo ya si.

⁴⁸ Bana mahanga aho bigwa iyi, buyega, bugukuja mhayo gwa Seba, nabo bose baatuulwa ho ku bupanga butushila buzunya.

⁴⁹ Hu yene mhayo gwa Seba gwali gutangʼanha mu si yeniyo yose.

Batungwa bupejiwa; bupelela Ikonio

⁵⁰ Aliyo Bayudaya bubatwalanija bakima bishigwa mu kulamya na ba ikujo, na banhu batale ba nzengo, bububukija Paulo na Barnabas kunyajanyanja, bubapeja binge mu mimbi jabo.

⁵¹ Nabo bubakomagulila lububu lwa ku mhambala jabo, bushika Ikonio.

⁵² Aliyo bahemba bali bokala na buyegi na Moyo Ngʼwela.