Shītwa 11 - Ilagano Ipya Lya

Petro ubasombolela Bayudaya kapigijiwe ka bana mahanga

¹ A batungʼwa na badugu abali bali mu Buyudaya bali bigwa giki, bana mahanga nabo bagwanukulile u mhayo gwa Mulungu.

² Aho Petro ulinha kuja Yerusalemi, abo abasalilwe buhalalila nanghwe,

³ Buhaya giki, Bebe wali wingila ku banhu abatasalilwe, na ulya nabo.

⁴ Aliyo Petro wandia kubasombolela mu kwihela, uhaya giki,

⁵ Nali nali mu nzengo gwa Yopa nakulombaga, na mu kufelwa nubona kolechiwa, kiseme kilika, chali kili giti ngʼwenda ntale, gutungilwe ku nana jago ine, gwichiwa kufuma ngʼwigulu, nago gwika kuli nene:

⁶ Aho nugukalalila, nidedekanya, nubona shinhu sha mu si sha magulu ane, ndimu, shinwele, sha kwigwesa, na noni ja hape.

⁷ Huna nigwa ilaka likuniwilaga giki, Bukaga Petro; bulagaga, ulye.

⁸ Nane nuhaya giki, Yaya, Seba; iki kinhu cha bubi nulu kisoso kitiningila mu nomo gwane.

⁹ Aliyo ilaka lyunishokeja lukangala lwa kabili kufuma ngʼwigulu giki, Icho Mulungu wamala kucheja, utakihayage cha bubi.

¹⁰ Mhayo gwenuyu gwali g witwa nghangala idatu, huna lulu shose shudutilwa hangi higulya ngʼwigulu.

¹¹ Kuhayumanila, banhu badatu bimila mu butongi wa numba umo nali nali, batumilwe kuli nene kufuma Kaisaria.

¹² Na Moyo uniwila kuja nabo natiziganilija. Badugu aba batandatu nabo buja hamo na nene, na twingila mu numba ya munhu ngʼwenuyo:

¹³ Nanghwe utusombolela gitumo wali umona malaika mu numba yakwe, uwali wimila, ungʼwila giki, Tumaga banhu kuja Yopa, banjile Simoni, uyo akitanagwa Petro.

¹⁴ Uyo akukuwila mihayo iyo ukupijiwa nayo, u bebe na kaya yako yose.

¹⁵ Aho nali nandia kulungalunga, Moyo Ngʼwela ubikiila, gitumo utwikiila biswe kwandia.

¹⁶ Nali nizukwa mhayo gwa Seba, gitumo akahaya giki, Yohana wali ubatija na minzi hene, aliyo bingʼwe mulabatijiwa na Moyo Ngʼwela.

¹⁷ Ulu Mulungu wabinha boi cha kwinhiwa icho, gitumo utwinha biswe, abo twaanzunya Seba Yesu Kristo, nene lulu, nali nani wa budula wa kunghangija Mulungu?

¹⁸ Aho bigwa mihayo iyi, bufulika, huna bunkumilija Mulungu, buhaya giki, Nahene Mulungu waabinha na bana mahanga koya kwa kushika mu bupanga.

Bazunya bandia kwitanwa Bakristo mu Antiokia

¹⁹ Benabo lulu abali basalanghanyiwa kulwa kunyajanyajiwa ukwali kubiza ho kulwa mhayo gwa ngʼwa Stefano, buja lugendo nose bushika Foiniki na Kupro na Antiokia, bali batunomela munhu ose mhayo numho ku Bayudaya bike.

²⁰ Aliyo bamo ba benabo bali bali banhu ba Kupro na Kurene, nabo aho bushika Antiokia bulungalunga na Bagriki, bulomela evangeli ya Seba Yesu.

²¹ Na nkono gwa Seba gwali guli hamo nabo: banhu bingi buzunya, bungalukila Seba.

²² Huna lukumo lwabo lushika mu matu ga ba kanisa ya mu Yerusalemi: nabo buntuma Barnabas aje ko Antiokia:

²³ Ngʼwenuyo aho ushika ko na ubona kigongo cha Mulungu, uyega; ubakonieleja bose giki, Badimane na Seba mu buhandikiji wa ngholo.

²⁴ Iki wei walali munhu wa wiza, uyo izulile na Moyo Ngʼwela na kuzunya; na banhu bingi Yiyongeja kuli Seba.

²⁵ Huna Barnabas winga uja Tarso kunkoba Saulo;

²⁶ Nanghwe aho umala kumona, ungʼwenha Antiokia. Ikabiza, bubizibilinga hamo na kanisa ngʼwaka ngima, na bubalanga banhu bingi: kwenuko Antiokia bahemba bali bandia kwitanwa giki, Bakristo.

Bazunya bana mahanga bubatumila ba kanisa mu Buyudaya i sha kubagunana

²⁷ Mu shiku jenijo bahangi bali butulumenha kufuma Yerusalemi bushika Antiokia.

²⁸ Umo wabo, lina lyakwe Agabo, wali wimila, ubamanikija mu budula wa Moyo giki, yahaya kubiza ho nzala nhale mu si jose; iyo ikabiza ho mu shiku ja ngʼwa Klaudio Kaisari.

²⁹ Huna lulu bahemba bulagana kubatumila badugu abazengile mu Buyudaya sha kubagunana, buli munhu gitumo isho walali nasho.

³⁰ Bali bita giko, bubatumila banamhala mu makono ga Barnabas na Saulo.