Shītwa 10 - Ilagano Ipya Lya

Kornelio ubona kolechiwa

¹ Walali ho munhu mu Kaisaria, lina lyakwe Kornelio, ntale wa ibita lya bashilikale igana ilikitanagwa giki, lya Italia.

² Walali munhu ngʼwishigwa mu kulamya, hangi uyo angʼogohile Mulungu na ba mu kaya yakwe bose, ngabi wa shikolo shingi ku banhu, hangi ubyunomba Mulungu gwa gwa gwa.

³ Ngʼwenuyo akamona malaika wa Mulungu mu kolechiwa hape, yali ili saa ya kenda ya limi, wingila kuliwe, na ungʼwila giki, Kornelio.

⁴ Nanghwe aho unkalalila, ogoha no, uhaya giki, Ni kinahe, Seba? Nanghwe ungʼwila giki, Kulomba kwako na bugabi wa shikolo shako shalinhaga kubiza chizukijo mu butongi wa Mulungu.

⁵ Na haha tumaga banhu kuja Yopa, banjile Simoni, uyo akitanagwa Petro.

⁶ Ngʼwenuyo ashikilile hali umo Simoni, mpaji wa makunza, numba yakwe ili haho na nyanza, ngʼwenuyo akukuwila iyo ikwigelile bebe kwita.

⁷ Aho malaika uyo ulungalunga na Kornelio winga, wei ubitana batumami bakwe ba mu kaya babili, na nshilikale ngʼwishigwa mu kulamya wa mu benabo bakuntumamilaga gwa gwa gwa;

⁸ Nanghwe aho umala kubatambulila mihayo yose, ubatuma Yopa.

Petro ubona kolechiwa

⁹ Ku ntondo, aho balija mu lugendo, na begela hihi ku nzengo, Petro ulinha kwigulya ha numba kulomba, yali ili saa ya katandatu.

¹⁰ Hunaho utuba no walatogilwe kulya: aliyo aho bali batali bulonja shiliwa, kuhayumanila ufelwa;

¹¹ Nanghwe ubona igulu likundukile, na kiseme kilika kuli wei, chali kili giti ngʼwenda ntale no, gutungilwe ku nana jago ine; gwichiwa ha si;

¹² Mugati yago jali jili mo mbika jose mu si ja shinhu sha magulu ane, ndimu, shinwele, sha kwigwesa, na noni ja hape.

¹³ Huna ilaka liza kuli wei giki, Bukaga, Petro, bulagaga ulye.

¹⁴ Aliyo Petro uhaya giki, Yaya, Seba; iki natinalya kinhu cha bubi nulu kisoso, na kamo yaya.

¹⁵ Na ilaka liza kuli wei hangi lukangala lwa kabili, lyuhaya giki, Icho Mulungu wamala kucheja, utakihayage cha bubi.

¹⁶ Mhayo gwenuyu gwitwa giko nghangala idatu: huna lulu kiseme chenicho chanukulwa ngʼwigulu.

¹⁷ Aho Petro uzwangana no mu moyo gwakwe, himba kuli kinahe kolechiwa uko walukubonaga, kuhayumanila, banhu abatumilwe na Kornelio, bagisilijaga numba ya ngʼwa Simoni, bimila ha mita.

¹⁸ Buhamuka, bakubujaga ulu Simoni, uyo akitanagwa Petro, ashikilile mo.

¹⁹ Aho Petro walatali widedekanya ya kolechiwa, Moyo ungʼwila giki, Lolaga, bagosha badatu balikukoba.

²⁰ Bukaga lulu, wike, uje nabo, utiziganilija, iki Nene nabatumaga.

²¹ Petro wika ku bagosha abali butungʼwa kuli wei na Kornelio, uhaya giki, Nene ndi ngʼwenuyo mulinikoba; ngʼwizaga kulwa nguno ki?

²² Buhaya giki, Kornelio ntale wa bashilikale igana, munhu ntungilija, uyo angʼogohile Mulungu, hangi uyo akanililwe chiza na ihanga lyose lya Bayudaya, ngʼwenuyo wali ulagilwa na malaika ngʼwela kumutumila nhungʼwa, uje ku kaya yakwe, akigwe mihayo hali bebe.

²³ Huna lulu ubitana bingile na ubegeleja. Ku ntondo ubuka uja nabo, na bamo ba badugu ba mu Yopa buja nanghwe.

Petro mu Kaisaria

²⁴ Ku ntondo bungi bali bingila mo mu Kaisaria. Kornelio walabalindilile, wali wababilinga baduguye na bimane biye.

²⁵ Aho Petro uhaya kwingila, Kornelio umanya nanghwe, ungwila ku magulu, unamya.

²⁶ Aliyo Petro umucha, uhaya giki, Imilaga, nene nane ndi munhu duhu.

²⁷ Aho ulungalunga nanghwe, wingila, ubasanga bingi bibilingile.

²⁸ Ubawila giki, Bingʼwe mumanile giki, ili ya ngilo kuli munhu Nyudaya kwisangija na munhu wa ihanga lingi nulu kungʼwegela; aliyo Mulungu wanolekejaga giki, natizunghaya munhu ose giki, wa bubi nulu nsoso.

²⁹ Kulwa iyo, aho nali nizilwa, hu yene nizaga, natalemile yaya. Nabuja lulu giki, Ngʼwanitanilile ku mhayo ki?

³⁰ Kornelio uhaya giki, Lelo jabitaga shiku ine kufumila aho nudila nzala kushisha saa iyi; na mu saa ya kenda naalombaga mu numba yane, kuhayumanila, munhu wimilile mu butongi wane, ali na shizwalo shilabangizu,

³¹ Uhaya giki, Kornelio, kulomba kwako kwigwiwagwa, na bugabi wa shikolo shako wizukagwa mu butongi wa Mulungu.

³² Kulwa iyo, tumaga banhu kuja Yopa, ukangʼwitane Simoni, uyo akitanagwa Petro ize aha; ashikilile mu numba ya ngʼwa Simoni, mpaji wa makunza haho na nyanza; uyo aho wiza akulungalunga nangho.

³³ Haho na haho lulu, nutuma banhu kuli bebe; nangho witaga chiza iki wiza. Nahene lulu biswe bose tuli ho aha mu butongi wa Mulungu, twiyigwe yose iyo walagilwa na Mulungu.

Lulomelo lwa ngʼwa Petro mu numba ya ngʼwa Kornelio

³⁴ Huna Petro wasamya nomo gwakwe, uhaya giki, Nghana nitegeleja lulu, Mulungu ati nsolanya wa banhu.

³⁵ Aliyo mu buli ihanga lyose uyo ungʼogoha, na akwitaga ya butungilija, uzunilijiwa nanghwe.

³⁶ Mhayo uyo Wei waatuma ku bana ba Israeli, kubalomela evangeli ya mhola muli Yesu Kristo, (Ngʼwenuyo ali Seba wa bose):

³⁷ Mhayo gwenuyo na bingʼwe mumanile, uyo gwali gukumuchiwa mu Buyudaya yose, kwandija mu Galilaya, hanuma ya kubatija uko Yohana wali ukulomela;

³⁸ Gitumo Mulungu wali ungʼwitiila Yesu wa Nazareti Moyo Ngʼwela na budula; Uyo waapindilaga, akwitaga ya wiza na kubapija bose abali biboneelwa na Shetani; iki Mulungu ubiza hamo nanghwe.

³⁹ Na biswe tuli bakaniji ba mihayo yose iyo wali wiyita mu si ya Bayudaya na mu Yerusalemi; Uyo bali bumulaga, bunsunga ku linti.

⁴⁰ Ngʼwenuyo Mulungu waanjucha ku lushiku lwa kadatu, na ungʼwelekeja hape,

⁴¹ Iti ku banhu bose, aliyo ku bakaniji abali basolwa kale na Mulungu, chene ku biswe, abo twaalyaga na tungʼwa hamo nanghwe, aho wali wamala kujuka.

⁴² Nanghwe waatulagila biswe kubalomela banhu, na kukanila hape giki, Ngʼwenuyo ali Uyo waatuulwa na Mulungu abize nekanya wa bapanga na bafu.

⁴³ Kuli Wei bahangi bose bunkanila giki, mu lina lyakwe buli munhu uyo wanzunya akwanukula kulekejiwa kwa shibi.

Bana mahanga bitiilwa Moyo Ngʼwela, huna bubatijiwa

⁴⁴ Aho Petro walatali ulungalunga mihayo yeniyi, Moyo Ngʼwela ubikiila bose abo baligwa mhayo gwenuyo.

⁴⁵ Nabo abasalilwe abali bazunya, budedebala, bose abo bali biza na Petro, iki cha kwinhiwa cha Moyo Ngʼwela chusamijiwa na ku bana mahanga.

⁴⁶ Iki bubigwa bakulungalungaga na ndimi jingi, na kunkumilija Mulungu. Hunaho Petro ushosha giki,

⁴⁷ Munhu ose wadula kubalemeja minzi, aba batizubatijiwa, benabo banukulaga Moyo Ngʼwela giti biswe?

⁴⁸ Huna ulagila babatijiwe mu lina lya ngʼwa Yesu Kristo. Hunaho bungʼwikumbilija ikale nabo shiku ndo.