Shītwa 1 - Ilagano Ipya Lya

Yesu ubitegeleja batungʼwa mihayo ya butemi wa Mulungu

¹ Kitabo cha kwandia naachita, E, Theofilo, cha iyo yose Yesu wali wandia kuyita na kulanga,

² Kushisha lushiku ulo waanukulwa ngʼwigulu, aho wali wamala kubalagila muli Moyo Ngʼwela a batungʼwa abo wali wabakoma:

³ Hangi hanuma ya kuluhiwa kwakwe wiyolecha kubo mu shimanikijo shingi giki, ali mpanga, ubyubilongela shiku makumi ane, ulungalunga nabo mihayo ya butemi wa Mulungu:

⁴ Aho wali wibilinga nabo, ubalagila batizufuma mu Yerusalemi, aliyo balindile kwisagija kwa ngʼwa Baba, uko ngʼwali ngʼwakwigwile kuli Nene.

⁵ Iki Yohana wali ubatija na minzi, aliyo bingʼwe mukubatijiwa na Moyo Ngʼwela hanuma ya shiku ngehu.

⁶ Kulwa iyo aho bali bibilinga, bumuja, buhaya giki, Seba, ulibashokeja ba Israeli butemi ngʼwikanza ili?

⁷ Ubawila giki, Yene iti yingʼwe kumana makanza nulu kajile ka miaka, isho Baba waashituula mu budula wakwe ngʼwenekele.

⁸ Aliyo mukwanukula budula, aho Moyo Ngʼwela alangʼwiziilaga, ningʼwe mukubiza bakaniji bane mu Yerusalemi, na mu Buyudaya yose, na mu Samaria, na kushisha ku mhelo ya si.

Yesu waanukulwa ngʼwigulu

⁹ Aho wamala kuhaya mihayo iyi, aho balolile, ubuchiwa kwigulya; na ilunde lyungʼwanukula kwinga mu miso gabo.

¹⁰ Aho batali bukalalila ngʼwigulu, aho Wei akujaga, kuhayumanila bagosha babili bimila haho nabo, bazwalile shizwalo shape,

¹¹ Nabo buhaya giki, Bingʼwe bagosha ba Galilaya, Mukwimilaga mulilangamila ngʼwigulu ni buli? Yesu Ngʼwenuyu uwanukulwa kufuma ku bingʼwe kuja ngʼwigulu, aliza hangi giko, gitumo mulimonela ajile ngʼwigulu.

Bahemba bushoka Yerusalemi

¹² Hunaho bushoka kuja Yerusalemi kwinga ku lugulu lukitanagwa Lwa Mizeituni, ululi hihi na Yerusalemi, giti lugendo lwa ha Sabato.

¹³ Aho bali bingila bulinha mu chumba cha gorofa, umo biikalaga Petro, na Yohana, na Yakobo, na Andrea, Filipo na Tomaso, Bartolomayo na Matayo, Yakobo, ngʼwana wa ngʼwa Alfayo, na Simoni Zelote, na Yuda nduguye wa ngʼwa Yakobo.

¹⁴ Benabo bose bubyukomela na moyo gumo mu kulomba, hamo na bakima na Mariamu, nina wa ngʼwa Yesu, na bana ba ngʼwawe.

Matiya usolwa kubiza ntungwa

¹⁵ Na mu shiku jenijo, Petro akimila hagati ya badugu (bukumi wabo kihamo, bali giti igana na makumi abili), uhaya giki,

¹⁶ Badugu, yigelile Shandikwa shishikilijiwe, isho Moyo Ngʼwela, mu nomo gwa ngʼwa Daudi, wali utonja kunghaya Yuda, uyo wali ubiza ntongeji wa benabo abali bundima Yesu.

¹⁷ Iki wali wabalilwa wa mu biswe, hangi wali wanukula ngabo gwa mu butumami ubu.

¹⁸ Ngʼwenuyo, lulu, ugula ngunda na mhela ya buhunga wakwe; nanghwe ukubunghila, utanduka, na bula wakwe bose bufuma.

¹⁹ Gumanika hape ku bose abazengile mu Yerusalemi; kushisha nose ngunda gwenuyo gukitanwa mu lulimilwabo giki, Akeldama, makulu gaho giki, ngunda gwa mininga.

²⁰ Iki yaandikwa mu kitabo cha Zaburi giki, Wikalo wakwe leke bubize saka, na munhu atizuzenga mo; hangi giki, Bulindi wakwe ungi abudime.

²¹ Kulwa iyo, kufuma mu bagosha abo bakadimanaga na biswe shiku jose ijo Seba Yesu wiingilaga na kufuma mu biswe,

²² Kwandia mu kubatija kwa ngʼwa Yohana, kushisha lushiku ulo aho waanukula kwigulya kwinga mu biswe, kufuma mu benabo yigelile umo abize nkaniji hamo na biswe mu kujuka kwakwe.

²³ Huna lulu bubatuula ho babili, Yusufu, akitanagwa Barsaba, lina lyakwe lingi Yusto, na Matiya.

²⁴ Huna bulomba, buhaya giki, Bebe, Seba, Uyo umanile ngholo ja bose, ungʼoleche umo, uyo wankomaga, mu benaba babili,

²⁵ Adime ngabo mu butamami ubu na butungʼwa, ubo Yuda wali ububihya ugwa, aje ku wikalo wakwe.

²⁶ Huna bubatubigija mbale, na mbale yungwila Matiya; nanghwe ubalanijiwa hamo na batungʼwa ikumi na umo.