Matayo 9 - Ilagano Ipya Lya

Yesu umpija nemehazu

¹ Hunaho akingila mu lyato, ukila ku nkilo, na ushika ku nzengo gwakwe.

² Huna bungʼwenhela nemehazu, alalile ha bulili; Yesu aho ubona kuzunya kwabo, ungʼwila nemehazu giki, Ngʼwana wane, timbaja ngholo; shibi shako shalekejiwa.

³ Huna bamo ba bandiki bubyuhaya mu mioyo yabo giki, Munhu uyu akundukagulaga Mulungu.

⁴ Na Yesu umana maganiko gabo, uhaya giki, Nguno ki ngʼwiganika sha bubi mu ngholo jingʼwe?

⁵ Changu kili he, kuhaya giki, Shibi shako shalekejiwa, nulu kuhaya giki, Bukaga, ushiminze?

⁶ Aliyo mumane giki, Ngʼwana wa munhu ali na budula mu si kulekeja shibi, (hunaho ungʼwila nemehazu giki), Bukaga, ubuche bulili wako, uje kaya.

⁷ Nanghwe ubuka, uja kaya.

⁸ Aliyo aho mabita gali gubona iyi, gukumya, na gunkuja Mulungu, Uyo wali wabinha banhu budula giti ubu.

Yesu ungʼwitana Matayo

⁹ Na aho Yesu ali mu nzila alinga ko, umona munhu igashije ngʼwitobelo, lina lyakwe Matayo, ungʼwila giki, Nilondelage. Nanghwe ubuka, unondela.

¹⁰ Na yubiza giki, aho wali igashije akulyaga mu numba, batobisha bingi na ba shibi biza bigasha hamo na Yesu na bahemba bakwe.

¹¹ Aho Bafarisayo bubona iyi, bubawila bahemba bakwe giki, Nguno ki nangi wingʼwe akulyaga hamo na batobisha na ba shibi?

¹² Aliyo aho Yesu wigwa iyi, ubawila giki, A bapanga bati na nguno ya kunkoba naguji, aliyo abasatile.

¹³ Aliyo jagi, ngʼwilange makulu ga mhayo uyu, Nayejiwa na kuchila kigongo, kitambo yaya; iki natizile kubitana batungilija, aliyo ba shibi bashike mu koya.

Mhayo gwa kudila nzala

¹⁴ Hunaho bahemba ba ngʼwa Yohana Matija biza kuli Wei, buhaya giki, Nguno ki biswe na Bafarisayo tukadilaga nzala nghangala ningi, aliyo bahemba bako batadilaga nzala?

¹⁵ Na Yesu ubawila giki, Biye ba ntoji badula kinahe kupinihala aho ntoji atalali hamo nabo? Aliyo shiku jiliza, aho ntoji alamala kwinjiwa mu bo, hunaho lulu baladila nzala.

Kigemenghejo cha ngʼwenda na mhinda ja makunza

¹⁶ Ati ho munhu uyo usumila kidaso kipya ha ngʼwenda nkulukulu, iki icho chasumilwa ho chutandula ngʼwenda na butanduke waho bongeja.

¹⁷ Hangi banhu batatuulaga minzi ga mizabibu mapya mu mhinda nghulukulu; ulu bita giko mhinda jutanduka, na minzi ga mizabibu gidika, na mhinda jikukenaguka; aliyo bakutuulaga minzi ga mizabibu mapya mu mhinda mhya, hunaho bubili washo shikala shipanga.

Ngʼwana wa Yairo ujuchiwa na nkima wa ngeji upijiwa

¹⁸ Aho walatali ubawila mihayo iyi, wiza nsugi umo, unamya, uhaya giki, Ngʼwana wane ngʼwaniki ali hihi kucha; aliyo nzugu ukantuulile nkono gwako, nanghwe akubiza mpanga.

¹⁹ Na Yesu ubuka unondela hamo na bahemba bakwe.

²⁰ Hunaho nkima uwalasatile ngeji gwa mininga miaka ikumi na ibili, wiza hanuma yakwe, na ubukuumya bukunilo wa ngʼwenda gwakwe;

²¹ Iki akahaya mu moyo gwakwe giki, Ulu nugukuumya ngʼwenda gwakwe duhu, nakupila.

²² Aliyo Yesu ugaluka, umona, ungʼwila giki, Ngʼwana wane, timbaja ngholo; kuzunya kwako kwakupijaga. Na nkima upijiwa kufuma ikanza ilo.

²³ Na aho Yesu wingila mu numba ya nsugi, na ubabona bafuji ba mbilolo, na ibita lyuyoga,

²⁴ Ubawila giki, Ingagi ho: iki ngʼwaniki atachile, aliyo ashutulile duhu. Nabo bunsekela no.

²⁵ Aliyo aho banhu bali bufunyiwa hanze, Wei wingila, undima nkono gwakwe; na ngʼwaniki ubuka.

²⁶ Na lukumo lwa mhayo uyu lukumuka mu si iyo yose.

Baboku babili bupijiwa

²⁷ Na aho Yesu ali mu nzila alinga ko, baboku babili bunondela, bubyuhamuka, buhaya giki, Bebe ngʼwana wa ngʼwa Daudi, utuchile kigongo.

²⁸ Aho ushika mu numba, a baboku bungʼwegela: na Yesu ubawila giki, Angu, ngʼwazunya giki, Nene nadula kwita mhayo uyu? Nabo bungʼwila giki, Ali chene, Seba.

²⁹ Hunaho ukinda ku miso gabo, uhaya giki, Gitumo kuzunya kwingʼwe kuli, ibize chene ku bingʼwe.

³⁰ Huna miso gabo gufumbuka. Na Yesu ubakomeleja na nguzu, uhaya giki, Ilanghanagi, atizumana munhu nulu umo.

³¹ Aliyo boi aho binga, bunkumucha mu si iyo yose.

³² Aho benabo bakwingaga, bungʼwenhela munhu kimumu ali na isamva.

³³ Na aho lyupejiwa isamva, u kimumu ulungalunga; na mabita gukumya, guhaya giki, Itinilonga giki na kamo mu Israeli.

³⁴ Aliyo Bafarisayo buhaya giki, Akupejaga masamva mu budula wa ntale wa masamva.

Yesu ubasatwa banhu

³⁵ Na Yesu wali wipindila mu mizengo yose na magunguli, ubyulanga mu mabilingilo gabo, na ubyulomela evangeli ya butemi na ubyupija bulwile bose na bugokolo bose.

³⁶ Aho ugabona mabita, ubasatwa, iki bali banogoleku na kusalanghana giti ngholo ijiti na ndimi.

³⁷ Hunaho ubawila bahemba bakwe giki, A magesa gene mingi, aliyo batumami bagehu.

³⁸ Kulwa iyi ngʼwikumbilijagi Seba wa magesa abatume batumami mu magesa gakwe.