Matayo 7 - Ilagano Ipya Lya

Kulekanya kwa bubi gitumo kuli

¹ Mutizulekanya, mutizulekanyiwa ningʼwe.

² Iki na kulekanya uko mukulekanyaga bingʼwe ningʼwe mukulekanyiwa chene: na ngelekelo iyo mukugelekelaga nayo, ningʼwe mukugelekelwa chene.

³ Kulwa nguno ki ulikalola kapalala akali mu liso lya nduguyo, aliyo utiganikaga ngamba uguli mo mu liso lyako bebe?

⁴ Nulu ukungʼwila kinahe nduguyo giki, Leka nakwingije kapalala akali mu liso lyako, aliyo Iola, ngamba guli mo mu liso lyako bebe?

⁵ Ngʼwibeleja bebe, injaga tame ngamba uguli mo mu liso lyako, hunaho ukubona chiza kwinja kapalala akali mo mu liso lya nduguyo.

⁶ Mutizujinha mva icho kili chela, nulu mutizuponya lulu jingʼwe ku butongi wa ngurube, jitizujipandagila hasilili ya magulu gajo, na jitizumugalukila kumutema.

⁷ Lombagi, na mukwinhiwa: kobagi, na mukubona: komagulagi, na mukwigulilwa.

⁸ Iki buli munhu uyo ulomba, wanukula; na uyo ukoba, ubona; na uyo ukomagula, akwigulilwa.

⁹ Nulu munhu nani mu bingʼwe, ulu ngʼwana wakwe unomba ngati, akungʼwinha iwe?

¹⁰ Nulu unomba ndilo, akungʼwinha nzoka?

¹¹ Ulu bingʼwe aba muli ba bubi, mumanile kubinha bana bingʼwe shinhu sha wiza, angu, Singʼwe ali ngʼwigulu atutinda no kubinha shinhu sha wiza abunomba?

¹² Kulwa iyo, iyo yose mutogilwe banhu bangʼwitile bingʼwe, mubitile nabo giko; iki hu gwene shilagilo na bahangi.

Nzila ibili

¹³ Bitilagi mu mita mpine, iki mita guli ngali na ipalapala lya kuja mu kuyagala lyene igali, nabo ababitila mo bene bingi.

¹⁴ Iki mita guli mpine, na ipalapala lya kuja mu bupanga lyene ipine, nabo abalibona bene bagehu.

¹⁵ Ilanghanagi ku bahangi bamama, abiza ku bingʼwe mu shizwalo sha ngholo, aliyo mugati bali mhuge nghali.

¹⁶ Aliyo mukubamanija ku matwajo gabo. Angu, banhu bakayobaga mizabibu ku mihwa, nulu matwajo ga ntini ku mababanzazu?

¹⁷ Giko buli nti gwa wiza gukatwajaga matwajo ga wiza; aliyo buli nti gwa bubi gukatwajaga matwajo ga bubi.

¹⁸ Nti gwa wiza gutudula kutwaja matwajo ga bubi, nulu nti gwa bubi gutudula kutwaja matwajo ga wiza.

¹⁹ Buli nti ugututwajaga matwajo ga wiza gukengʼenhwa, na guponyiwa mu moto.

²⁰ Kulwa iyo mukubamanija ku matwajo gabo.

Kwita kukilile kuhaya

²¹ Iti uyo ose akuniwilaga giki, Seba, Seba, alingila mu butemi wa ngʼwigulu; aliyo uyo akwitaga iyo atogilwe Baba ali ngʼwigulu.

²² Bingi balaniwila mu lushiku ulo giki, Seba, Seba, angu, twali tutuhangila mu lina lyako, na kupeja masamva mu lina lyako, na mu lina lyako, angu, twali tutita Shitwa shingi sha kukumya?

²³ Hunaho nalabawila hape giki, Natali kumumana na kamo: ingagi ho hali Nene, bingʼwe abo mukwitaga ya bugomi.

Misingi ibili

²⁴ Kulwa iyo uyo ose akwigwaga mihayo yane iyi, na kwiyita, nakungʼwikolanija na munhu wa masala, uyo akazenga numba yakwe ha itale;

²⁵ Na mbula yutula, na mihumo yusela, na miyaga yuhemba, nasho shuyitula numba yeniyo; nayo itagwile: iki yaazengwa ha itale.

²⁶ Na uyo ose akwigwaga mihayo yane iyi, na kwiyita yaya, akwikolanijiwa na munhu mbuuli, uyo akazenga numba yakwe ha maseni:

²⁷ Na mbula yutula, na mihumo yusela, na miyaga yuhemba, nasho shuyitula numba yeniyo; nayo yugwa: na kugwa kwayo kwali kutale no.

²⁸ Na yubiza aho Yesu akamala mihayo iyi, mabita ga banhu gudedebala kulwa kulanga kwakwe:

²⁹ Iki wali ubalanga kina munhu ali na budula, iti kina bandiki yaya.