Matayo 5 - Ilagano Ipya Lya

Yesu ulomela mu lugulu. A ba lubango

¹ Aho ubona mabita, ulinha mu lugulu: na aho wigashije ha si, bahemba bakwe bungʼwegela;

² Aho wasamya nomo gwakwe ubalanga, uhaya giki,

³ Bali ba lubango a bahabi ba mu moyo: iki butemi wa ngʼwigulu wene wabo.

⁴ Bali ba lubango abali na bupina: iki benabo balalungujiwa.

⁵ Bali ba lubango a bafula: iki benabo batingila si.

⁶ Bali ba lubango abakutubaga na kukolwa nota kukumbula butungilija: iki benabo baligutiwa.

⁷ Bali ba lubango abakuchilaga kigongo: iki benabo balachilwa kigongo.

⁸ Bali ba lubango a bela mu ngholo: iki benabo balamona Mulungu.

⁹ Bali ba lubango a babeja ba mhola: iki aho balitanwa bana ba Mulungu.

¹⁰ Bali ba lubango abaluhiwagwa kulwa nguno ya butungilija: iki butemi wa ngʼwigulu wene wabo.

¹¹ Muli ba lubango bingʼwe aho banhu balamusukilija, na kumuluhya, na kumuhaya mihayo yose ya bubi mu bulomolomo, kulwa nguno yane.

¹² Yegagi, sangabalagi no: iki mhela yingʼwe ili nhale no ngʼwigulu; iki giko bali bubaluhyaluhya bahangi abali batonga, aho bingʼwe mutali.

Shikolanigije sha bahemba

¹³ Bingʼwe muli munu gwa si: aliyo ulu munu gwasukaga, gulanoniwe na ki? Gutigelile hangi ku nimo gose aliyo kuponyiwa hanze na kupandagilwa na banhu.

¹⁴ Bingʼwe muli isana lya ba mu si. Nzengo ugwazengwa ha lugulu gutudula kushikijiwa.

¹⁵ Nulu batubacha tala, na kuyituula igubanikigije na ikililijo, aliyo kuyituula ha ikindikilo lya tala; na yubakila bose abali mu numba.

¹⁶ Giko isana lyingʼwe lyakage ku butongi wa banhu; babone Shitwa shingʼwe sha wiza, bankuje Singʼwe ali ngʼwigulu.

Kifubolelwe cha shilagilo

¹⁷ Mutiziganika giki, Nene nali niza kwinja ho shilagilo nulu bahangi; Nene natizile kwinja ho, aliyo kushikilija.

¹⁸ Iki nghana namuwila giki, Kushisha igulu na si shilabita, nulu nuguta imo, nulu kadone kamo katalinga ku shilagilo, kushisha yose ilabiza ho.

¹⁹ Kulwa iyo munhu ose uyo akwinja kilagilo kimo cha ishi shido, na kubalanga banhu giko, alitanwa ndo kutinda mu butemi wa ngʼwigulu; aliyo munhu ose uyo akushita na kushilanga, ngʼwenuyo alitanwa ntale mu butemi wa ngʼwigulu.

²⁰ Iki namuwila giki, Butungilija wingʼwe, ulu butukila butungilija wa bandiki na Bafarisayo, mutalingila na hado mu butemi wa ngʼwigulu.

Bubulagi umo buli

²¹ Ngʼwigwaga gwali guhayiwa ku bakulugenji giki, Utalizubulaga: na munhu ose uyo ubulaga aligelelwa nsango.

²² Aliyo Nene namuwila giki, Munhu ose uyo wandakila nduguye na nguno yaya, aligelelwa nsango: na munhu ose uyo ungʼwila nduguye giki, Raka, aligelelwa ngʼwibanza itale: na munhu ose uyo uhaya giki, Mbuuli bebe, aligelelwa Gehena ya moto.

²³ Kulwa iyo ulu ufunya cha kwinha chako ku ngʼwalilo, na uko wizukwa giki, nduguyo ali na mhayo na bebe,

²⁴ Lekaga uko cha kwinha chako ku butongi wa ngʼwalilo, jaga, wisangije na nduguyo tame, hunaho wize, ufunye cha kwinha chako.

²⁵ Wisangije wangu na muji wako aho utali nanghwe mu nzila; muji atizukwinha ko kuli nekanya wa nsango, na nekanya wa nsango atizukwinha ko kuli nshilikale, nangho uponyiwe mu jela.

²⁶ Nghana nakuwila giki, Utalafuma mo, kushisha ukukula senti ya kumalija.

Bushihya umo buli

²⁷ Ngʼwigwaga gwali guhayiwa ku bakulugenji giki, Utizushihya:

²⁸ Aliyo Nene namuwila giki, Munhu ose uyo wankamilija nkima kungʼwikumva, wamala kushihya nanghwe mu ngholo yakwe.

²⁹ Ulu liso lyako lya bulyo lyukwipamya, ulikobole mo, na uliponye kule na bebe: iki ili hambuhambu kuli bebe, ibudika limo lya mabudika gako likenaguke, kutinda mili gwako gose kuponyiwa mu Gehena.

³⁰ Na ulu nkono gwako gwa bulyo gukwipamya, ugubute, na uguponye kule na bebe: iki ili hambuhambu kuli bebe ibudika limo lya mabudika gako likenaguke, kutinda mili gwako gose kuponyiwa mu Gehena.

³¹ Hangi gwali guhayiwa giki, Munhu ose uyo akulekana na nke wakwe, angʼwinhe cheti ya kulekanila;

³² Aliyo Nene namuwila giki, Munhu ose uyo ulekana na nke wakwe, ulu iti kulwa nguno ya bujingi, wangʼwitaga nkima kubiza nshihiwa; na munhu ose uyo untola ngʼwenuyo walekagwa washihaja.

Kalungalungile ka nghana umo kali

³³ Hangi ngʼwigwaga gwali guhayiwa ku bakulugenji giki, Utizilahila ya bumama, aliyo unshikiligijage Seba shilahilo shako;

³⁴ Aliyo Nene namuwila giki, Mutizulahila na hado yaya; nulu igulu, iki lyene isumbi lya Mulungu;

³⁵ Nulu si, iki yene ipandilo lya mhambala jakwe; nulu Yerusalemi, iki lyene linzengo lya Ntemi ntale.

³⁶ Nulu utizilahila ntwe gwako, iki utudula kugalucha luywili lumo lubize lwape nulu lwapi.

³⁷ Aliyo kilungalungile chingʼwe kibize, Ee, ee; Yaya, yaya: iki yose iyukila iyi yafuma kuli uyo mi. Ishigelile ku banishi

³⁸ Ngʼwigwaga gwali guhayiwa giki, Liso kulwa liso, na lino kulwa lino:

³⁹ Aliyo Nene namuwila giki, Mutizilwisha na uyo wa bubi; aliyo munhu ose uyo akukupala lupi ha itama lya bulyo, ungalukije na lingi.

⁴⁰ Na uyo atogilwe kukubula kukutagija nghanjo yako, unekele na nguto gwako.

⁴¹ Na munhu ose uyo akukuhadikija kuja mailo imo, jaga nanghwe ibili.

⁴² Uyo ukulomba ngʼwinhage; na uyo atogilwe kulya shiili kuli bebe, utizungʼwinhila ngongo.

⁴³ Ngʼwigwaga gwali guhayiwa giki, Ulantogagwe nzenganwa ngʼwiyo, na kunkolwa ngʼwanishi wako:

⁴⁴ Aliyo Nene namuwila giki, Batogagwi banishi bingʼwe, basungulilagi lubango abamuzuma, bitilagi chiza abamukolwa, balombelagi abalingʼwikomya na abamuluhyaluhya;

⁴⁵ Giko mubize bana ba Singʼwe ali ngʼwigulu: iki Wei akubabakijaga limi lyakwe ba bubi na ba wiza, na akutumaga mbula ku batungilija na abati batungilija.

⁴⁶ Iki ulu ngʼubatogwa abo abamutogwa bingʼwe, muli na mhela ki? Angu, bahoja nabo batitaga giko?

⁴⁷ Na ulu ngʼubagisha badugu bingʼwe bike, mukwitaga ki ya kubakila bangi? Angu, bahoja nabo batitaga giko?

⁴⁸ Kulwa iyo bizagi bashikanu, gitumo Singʼwe ali ngʼwigulu ah nshikanu.