Matayo 28 - Ilagano Ipya Lya

Kujuka kwa ngʼwa Yesu

¹ Aho Sabato yali yushila, aho wandia kwela ha lwa kwandia lwa mfungo, Mariamu Magdalene na Mariamu u ungi bali biza kulola kigila.

² Na lolaga, yali yabizaga ho nyahinga nhale, iki malaika wa Seba wali wika kufuma ngʼwigulu, wegela, ulipilingitya iwe kulyinja ha nyango, na uligashija.

³ Suso yakwe yali ili giti lulabi, na shizwalo shakwe shali shili shape giti theluji.

⁴ Kulwa kungʼogoha, balindi buzuguma, bubiza giti bachile.

⁵ Malaika ushosha, ubawila bakima giki, Bingʼwe mutogohage, iki namanile giki, mulinkoba Yesu Uyo wali wakomilwe.

⁶ Ati ho aha; iki wajukaga gitumo wali wahaya. Nzugwi, mulole ipande aho Seba walalalile ho.

⁷ Na jagi wangu, mukabawile bahemba bakwe giki, Wajukaga mu bafu; na lolagi, alitonga kuja Galilaya kwenuko mukumona, yene namuwilaga.

⁸ Nabo binga wangu mu kigila na kogoha na buyegi butale, bupela kubawila bahemba bakwe.

⁹ Aho balija kubawila bahemba bakwe, kuhayumanila, Yesu umanhya nabo, uhaya giki, Mhola bingʼwe! Nabo aho bungʼwegela bundima ku magulu, na bunamya.

¹⁰ Hunaho Yesu ubawila giki, Mutogohage; jagi, mukabawile badugu bane baje Galilaya, kwenuko bakunibona.

Bulomolomo wa balindi

¹¹ Aho balija, lolaga, bamo ba balindi bingila mu linzengo, bubawila bagabiji batale mihayo iyo yali yabizaga ho.

¹² Na aho bibilinga hamo na banamhala, na bumala kulomana mihayo, bubinha bashilikale feza ningi,

¹³ Buhaya giki, A bingʼwe hayagi giki, Bahemba bakwe bali bizaga bujiku, bungʼwiba aho biswe tulalile.

¹⁴ Na mhayo gwenuyu ulu guligwiwe na gavana, biswe tukunkongakonga, tukungʼwingija makoye.

¹⁵ Nabo aho banukula feza, bita gitumo buhanangilwa. Na mhayo uyu gukukumukaga mu Bayudaya kushisha lelo.

Kutungʼwa kutale kwa bakemba

¹⁶ Hunaho a bahemba ikumi na umo buja Galilaya ku lugulu ulo Yesu wali wabalagila.

¹⁷ Na aho bumona, bunamya: aliyo bamo butawatawa.

¹⁸ Na Yesu ubegela, ulungalunga nabo, uhaya giki, Ninhagwa budula bose ngʼwigulu na mu si.

¹⁹ Kulwa iyo, jagi mukabahembeke ba mahanga gose, mukubyubabatija mu lina lya ngʼwa Baba na Ngʼwana na Moyo Ngʼwela:

²⁰ Mukubyubalanga kwidima yose iyo namulagilaga bingʼwe, na lolagi, Nene ndi hamo na bingʼwe shiku jose kushisha ku nghalilo ya ikanza ili. Amina.