Matayo 27 - Ilagano Ipya Lya

Yesu ngʼwibanza lya ngʼwa Pilato

¹ Aho wali wangaluka, bagabiji batale bose na banamhala ba banhu bulomana mihayo ya kumulaga Yesu.

² Na aho buntunga, buntwala, bungʼwinha ko kuli Pontio Pilato u gavana.

Yuda winija

³ Hunaho Yuda uyo wali ungʼwinha ko, aho ubona giki, Yesu walekanyiwa nsango, wihugula, ubashokeja bagabiji batale na banamhala a mabudika makumi adatu ga feza,

⁴ Uhaya giki, Nakenagulaga iki ninhaga ko mininga mela. Aliyo boi buhaya giki, Biswe yatuja mo na ki? Ukuyibona bebe.

⁵ Nanghwe ujiponeja i feza mu hekalu; ufuma, uja ukinija.

⁶ Nabo a bagabiji batale bujisola! feza, buhaya giki, Kalagilile kujituula ngʼwibikilo lya manongho, iki jene mpango gwa mininga.

⁷ Aho bulomana, bugula najo ilale lya mumbi, lya kujikila mo babisa.

⁸ Kulwa iyi ilale lyenilo Ulitanwa ilale lya mininga kushisha lelo.

⁹ Hunaho gushikilijiwa uyo gwali guhayiwa muli nghangi Yeremia, uhaya giki, Nabo bugasola mabudika ga feza makumi adatu, u mpango gwa Ngʼwenuyo bali bumpanga, Uyo bamo ba bana ba Israeli bali bumpanga.

¹⁰ Nabo bujifunya ja kugula ilale lya mumbi, gitumo Seba akanilagila.

¹¹ Yesu wimila mu butongi wa gavana; na gavana umuja uhaya giki, Angu, Bebe uli ntemi wa Bayudaya? Yesu ungʼwila giki, Ili chene, wahayaga.

¹² Na aho wali ubulwa na bagabiji batale na banamhala, walatushosha mhayo.

¹³ Hunaho Pilato ungʼwila giki, Angu, utigwaga mihayo iyi mingi balikukanilija?

¹⁴ Nanghwe walatunshokeja mhayo nulu gumo; kushisha nose u gavana ukumya no.

Yesu nulu Barabba

¹⁵ Ku Pasaka shali shimile sha gavana giki, kubataligulilila banhu ntungwa umo, uyo bantogilwe.

¹⁶ Mu shiku jenijo bali bubiza na ntungwa nkumuku, lina lyakwe, Barabba.

¹⁷ Aho bali bibilinga lulu, Pilato ubawila giki, Mutogilwe namutaligulilile nani? Barabba, nulu Yesu Uyo witanwa Kristo?

¹⁸ Iki walamanile giki, bangʼwinhaga ko kulwa wilu.

¹⁹ Aho wali igashije kwisumbi lya kulekanya, nke wakwe untumila nhungʼwa, uhaya giki, Utizubiza na mhayo na munhu Ngʼwenuyo ntungilija; iki naluhiwagwa mihayo mingi lelo yeniyi kulwa nguno yakwe mu kiloti.

²⁰ Aliyo bagabiji batale na banamhala bugahumbula mabita kunomba Barabba, aliyo Yesu banyagaje.

²¹ Aliyo gavana ushosha ubawila giki, Mutogilwe namutaligulilile nani mu benaba babili? Nabo buhaya giki, Barabba!

²² Pilato ubawila giki, Aliyo lulu, nalangʼwitile ki Yesu Uyo witanwa Kristo? Bose bungʼwila giki, Ni akomagwe.

²³ U gavana uhaya giki, Kulwa ki? witaga bubi ki? Aliyo boi bongeja kuhamuka, buhaya giki, Ni akomagwe.

²⁴ Pilato aho ubona giki, guti ho mhayo gwa kubelela aliyo buyombo buhaya kubuka, usola minzi, ukalaba makono gakwe mu miso ga ibita, uhaya giki, Nene nati na njigu ku mininga ga ntungilija Uyu; mukuyibona bingʼwe.

²⁵ Na banhu bose bushosha buhaya giki, Mininga gakwe gabize ku biswe na ku bana biswe.

²⁶ Huna lulu ubataligulilila Barabba; aliyo aho wamala kuntula Yesu na mikoba, ungʼwinha ko akongʼwe.

Yesu ugimva kichilu

²⁷ Hunaho bashilikale ba gavana buntwala Yesu mu Praitorio, na bungʼwibilingila ibita lyose lya bashilikale.

²⁸ Nabo bunzula shizwalo, bunzwika joho yaza,

²⁹ Na aho buluka ngikili ya kitemi ya mihwa, buyituula ku ntwe gwakwe, na idete mu nkono gwakwe gwa bulyo; butuja mazwi ku butongi wakwe, bungimba kichilu, buhaya giki, Lama, Ntemi wa Bayudaya!

³⁰ Na bunswila mate, bulidima i lidete na buntula ku ntwe.

³¹ Na aho bumala kungimba kichilu, bunzula joho, na bunzwika shizwalo shakwe, buntwala ko kunkoma.

Yesu ukongʼwa

³² Aho balifuma bumanhya na munhu, muna Kurene, lina lyakwe Simoni; ngʼwenuyo bunghadika anseselele nsalaba gwakwe.

³³ Aho bushika kwipande ilitanwa Golgota, kushomelejiwa kwaho kuli giki, ipande lya lupanga,

³⁴ Bungʼwinha cha kungʼwa siki isangije ndulu; na aho wali uloja walatuzunya kungʼwa.

³⁵ Aho bumala kunkoma bugabanha shizwalo shakwe na kwesa, gushikilijiwe ugwali guhayiwa muli nghangi giki, Bashigabanha shizwalo shane, na joho yane bakayikoma na kwesa.

³⁶ Huna bigasha ho, bunanghana.

³⁷ Na butuula higulya ya ha ntwe gwakwe kubulwa kwakwe ukwali kwandikwa giki, UYU NGʼWENE YESU, NTEMI WA BAYUDAYA.

³⁸ Hunaho basambo babili bukongʼwa hamo nanghwe, umo ku nkono gwa bulyo, na umo ku nkono gwa lumoso.

³⁹ Nabo abubita ho bundukagula, bushingisha mitwe yabo.

⁴⁰ Buhaya giki, Bebe wa kukandula hekalu, na kuyizenga mu shiku idatu, ipijage ngʼwenekele. Ulu Bebe uli Ngʼwana wa Mulungu, ikaga ku nsalaba.

⁴¹ Giko hangi na bagabiji batale na bandiki na banamhala bungimba kichilu, buhaya giki,

⁴² Walubapijaga bangi, atudula kwipija ngʼwenekele. Ulu Wei ali ntemi wa Israeli, ni ikage lulu ku nsalaba, na biswe tukunzunya.

⁴³ Ansanije Mulungu; leke ampije lulu, ulu antogilwe; iki wali uhaya giki, Nene ndi Ngʼwana wa Mulungu.

⁴⁴ Basambo abali bukongʼwa hamo nanghwe nabo bumbyeda chene.

Kucha kwa ngʼwa Yesu

⁴⁵ Kufuma saa itandatu kushisha saa kenda chali chubiza ho giiti mu si yose.

⁴⁶ Giti saa kenda Yesu uhamuka na ilaka itale, uhaya giki, Eli, Eli, lama sabakthani? kushomelejiwa kwaho kuli giki, Mulungu wane, Mulungu wane, wanilekanija nguno ki?

⁴⁷ Bamo ba mu benabo abimilile ho, aho bigwa iyi, buhaya giki, Uyu alingʼwitana Eliya.

⁴⁸ Haho na baho ngʼwichabo upela, usola ibupya, ulilobya na siki, ulituula ku idete, ungʼwinha angʼwe.

⁴⁹ Aliyo banhu buhaya giki, Leka, tulole ulu Eliya akwiza kumpija.

⁵⁰ Aliyo Yesu aho uhamuka hangi na ilaka itale, winha ko moyo gwakwe.

⁵¹ Kuhayumanila, iselema lya mu hekalu lyutanduka hagati kufuma higulya kushisha ha si; na si yuzuguma; na matale gutanduka;

⁵² Na mashigila giguka; na mibimba mingi ya bela abali bashutula yujuchiwa;

⁵³ Na bufuma mu mashigila hanuma ya kujuka kwakwe, bingila mu linzengo lyela, na biyeleka ku bingi.

⁵⁴ Ntale wa bashilikale igana na biye hamo nanghwe balinanghana Yesu, aho bubona nyahinga na mihayo iyali yitwa, bogoha no, buhaya giki, Nghana Uyo wali Ngʼwana wa Mulungu.

⁵⁵ Bali bubiza ho bakima bingi bakulolelaga ka kule ho, abo abali bunondela Yesu kufuma Galilaya, bubyungʼwinhilija.

⁵⁶ Mu benabo bali ho Mariamu Magdalene, na Mariamu nina wa Yakobo na Yose, na nina wa bana ba ngʼwa Zebedayo.

Yesu ujikwa

⁵⁷ Aho yubiza mhindi, wiza munhu nsabi wa Arimathaya, lina lyakwe Yusufu, uyo nanghwe wali nghemba wa ngʼwa Yesu;

⁵⁸ Ngʼwenuyo uja kuli Pilato, ugulomba mimba gwa ngʼwa Yesu. Hunaho Pilato ulagila giki, inhiwe u mimba.

⁵⁹ Na Yusufu ugutwala mimba, ugulingila mu ngʼwenda gwa kitani gwape.

⁶⁰ Ugutuula mu nze yakwe mhya iyo wali wayipunza mu kiganga; na ulipilingitya iwe itale ha nyango gwa nze, na uja.

⁶¹ Walali ho Mariamu Magdalene, na Mariamu u ungi, bigashije balolelile ku kigila.

Kulindwa kwa kigila

⁶² Ku ntondo, ha lushiku ululondelile kalongeje, bagabiji batale na Bafarisayo bibilingila kuli Pilato.

⁶³ Buhaya giki, Seba, twizukagwa giki, Nembi Ngʼwenuyo aho walatali mpanga akahaya giki, Hanuma ya shiku idatu nalajuka.

⁶⁴ Kulwa iyo, lagilaga kigila kilindwe chiza kushisha ha lushiku lwa kadatu, bahemba bakwe batiziza bujiku kungʼwiba, na kubawila banhu giki, Wajukaga mu bafu, huna bulembi wa hanuma bukubiza wa bubi kutinda wa kwandia.

⁶⁵ Pilato ubawila giki, Ngʼwinhiwa balindi, jagi, mukakilinde chiza gitumo mumanile.

⁶⁶ Nabo buja bukakilinda chiza i kigila, bulituulila ho iwe ilo kimanikijo, butuula ho na balindi.