Matayo 25 - Ilagano Ipya Lya

Kigemenghejo cha banhya ikumi

¹ Hunaho butemi wa ngʼwigulu bulikolanijiwa na banhya bibembu ikumi, abo bali bubucha tala jabo, buja kungʼwima nzila ntoji.

² A batano bali balalanghanu na batano bali bachiluchilu.

³ Abali bachiluchilu bali bubucha tala jabo, aliyo bali batubucha maguta;

⁴ Aliyo a balalanghanu bali bubucha maguta mu saji jabo kihamo na tala jabo.

⁵ Aho ntoji wali udila, bose bubyutindila na bushutula.

⁶ Bujiku hagati kubiza kuhamukila giki, Lolagi, ntoji aliza, bukagi mukangʼwime nzila.

⁷ Hunaho banhya bibembu benabo bose bubuka, budoganya tala jabo.

⁸ Bachiluchilu bubawila a balalanghanu giki, Twinhagi u mu maguta gingʼwe, iki tala jiswe jililimalima.

⁹ Aliyo balalanghanu bushosha, buhaya giki, I yaya, hamo gatutwigela biswe na bingʼwe: hambuhambu muje ku benabo abakajinjaga, na mukigulile benekele.

¹⁰ Aho bajile kugula, ntoji wiza; nabo abali bamalilile bingila hamo nanghwe ku bukombe; na lwigi lulugalwa ho.

¹¹ Hanuma biza na banhya bibembu benabo a bangi, buhaya giki, Seba, Seba, utulugulile.

¹² Aliyo wei ushosha, uhaya giki, Nghana namuwila giki, natamumanile bingʼwe.

¹³ Kulwa iyo, ikalagi miso, iki mutamanile lushiku nulu ikanza Ngʼwana wa munhu aho aliza.

Kigemenghejo cha talanta

¹⁴ Iki ili giti munhu uyo uhaya kuja ku si yingi, ubitana basese bakwe, ubatuulila shinhu shakwe.

¹⁵ Umo ungʼwinha talanta itano; ungi ibili, na ungi imo; buli munhu gitumo budula wakwe umo buli; haho na haho ubuka uja lugendo.

¹⁶ Hunaho lulu uyo wali wanukula talanta itano uja ujitumamila, ujibyalanija ho talanta itano jingi.

¹⁷ Giko hangi na uyo wali wanukula ibili, nanghwe ujibyalanija ibili jingi.

¹⁸ Aliyo uyo wali wanukula imo, uja usimba ha si, uyibisa feza ya ngʼwa ise bugonzo.

¹⁹ Hanuma ya ikanza itale sabo bugonzo wa basese benabo wiza, ubala nabo.

²⁰ Na uyo wali wanukula talanta itano aho wegela wenha talanta itano jingi, uhaya giki, Baba bugonzo, bebe ukanituulila ho talanta itano: lolaga, najibyalanijaga ho talanta itano jingi.

²¹ Ise bugonzo ungʼwila giki, Wabeja, nsese wa wiza na ngʼwishigwa; bebe wali ngʼwishigwa mu shigehu, nakukutuma ho ubize nsugi ku shingi; ingilaga mu buyegi wa ngʼwa so bugonzo.

²² Na uyo wali wanukula talanta ibili nanghwe wegela, uhaya giki, Baba bugonzo, bebe ukanituulila ho talanta ibili: lolaga, najibyalanijaga ho talanta ibili jingi.

²³ Ise bugonzo ungʼwila giki, Wabeja, nsese wa wiza na ngʼwishigwa: bebe wali ngʼwishigwa mu shigehu, nakukutuma ho ubize nsugi ku shingi: ingilaga mu buyegi wa ngʼwa so bugonzo.

²⁴ Na uyo wali wanukula talanta imo nanghwe wegela, uhaya giki, Baba bugonzo, nakumanile bebe, uli munhu nambu, ukagesaga uko utabibile, ukakumingaga uko utasalanghanije.

²⁵ Nane nali nogoha, nuja, nukabisa talanta yako ha si: lolaga, uli na yako, yiyi.

²⁶ Aliyo ise bugonzo ushosha ungʼwila giki, Bebe nsese nghunga na ngʼolo, ambu wali umana giki, nakagesaga uko natabibile, nakakumingaga uko natasalanghanije;

²⁷ Giko yali ikwigelile bebe kutuula feza yane ku batundanya ba feza: huna nene aho niza, ni nali nanukula yane na solobo hoi.

²⁸ Ali lulu, ngʼwingijagi i talanta, mungʼwinhe ngʼwenuyo ali najo talanta ikumi.

²⁹ Iki uyo ose ali nasho alinhiwa, nanghwe alabiza na shingi; aliyo uyo ati nasho, alingijiwa na isho ali nasho.

³⁰ Na nsese uyo adukile, mponyagi mu giiti cha hanze: uko kulabiza ho kulila shisoji, na kushelanya mino.

Kigemenghejo cha ngholo na mbuli

³¹ Aliyo aho Ngʼwana wa munhu aliza mu magaka gakwe, na bamalaika bela bose hamo nanghwe hunaho aligasha ha isumbi lya butemi lya magaka gakwe:

³² Na mahanga gose galabilingilwa ku butongi wakwe, nanghwe alabakomanya, giti ndimi akukomanyaga ngholo na mbuli.

³³ I ngholo alajituula ku nkono gwakwe gwa bulyo, aliyo mbuli ku nkono gwa lumoso.

³⁴ Hunaho Ntemi alabawila benabo abali ku nkono gwakwe gwa bulyo giki, Nzugwi bingʼwe abasungulilwa lubango na Baba, ingilagi mu butemi ngʼwaabegejiwa kufuma kubumva kwa si:

³⁵ Iki nali nutuba, ningʼwe ngʼuninha shiliwa; nali nukolwa nota, ningʼwe ngʼuninha kungʼwa; nali ndi ngeni, ningʼwe ngʼunegeleja.

³⁶ Nali ndi duuhu, na ngʼunizwalicha; nali ndi nwile, ningʼwe ngʼwiza kunilola; nali nubiza mu jela, ningʼwe ngʼwiza kuli Nene.

³⁷ Hunaho batungilija balanshokeja, balahaya giki, Seba, twali tukubona utubile, huna tukwinha shiliwa nanali? nulu uli na nota, huna tukwinha kungʼwa?

³⁸ Twali tukubona uli ngeni, huna tukwegeleja nanali? nulu uli duuhu, huna tukuzwalicha?

³⁹ Twali tukubona uli nwile, nulu mu jela, huna twiza kuli bebe nanali?

⁴⁰ Na Ntemi alashosha, alabawila giki, Nghana namuwila giki, Gitumo ngʼwali ngʼungʼwitila umo wa badugu aba bane bado, ngʼwali ngʼunitila Nene.

⁴¹ Hunaho alabawila na benabo abali ku nkono gwa lumoso giki, Ingagi hali Nene, bingʼwe abazumilwe, jagi mu moto ugutushila, uyo waabegejiwa Shetani na bamalaika bakwe.

⁴² Iki nali nutuba, ningʼwe ngʼwali mutuninha shiliwa; nali nukolwa nota, ningʼwe ngʼwali mutuninha kungʼwa;

⁴³ Nali ndi ngeni, ningʼwe ngʼwali mutunegeleja; nali ndi duuhu, ningʼwe ngʼwali mutunizwalicha; nali nubiza nwile, na mu jela, ningʼwe ngʼwali mutiza kunilola.

⁴⁴ Hunaho benabo balanshokeja, balahaya giki, Seba, twali tukubona nanali, utubile, nulu uh na nota, nulu uli ngeni, nulu uli duuhu, nulu uli nwile, nulu uli mu jela, na kukwinhilija yaya?

⁴⁵ Hunaho alabashokeja, alahaya giki, Nghana namuwila giki, Gitumo ngʼwali mutangʼwitilile umo wa aba bado, nahene ngʼwali mutanitilile Nene.

⁴⁶ Na aba balaja mu kuluhaluhiwa kutushila; aliyo batungilija mu bupanga butushila.