Matayo 23 - Ilagano Ipya Lya

Shimanikijo sha Bandiki na Bafarisayo

¹ Hunaho Yesu ulungalunga na mabita na bahemba bakwe,

² Uhaya giki, Bandiki na Bafarisayo bigashije ha isumbi lya ngʼwa Musa.

³ Kulwa iyo, mihayo yose bakumuwilaga kuyidima, yeniyo muyidime na ngʼwiyite: aliyo mutizita giti shitile shabo umo shili; iki kuhaya bakuhayaga, aliyo kwita batitaga.

⁴ Iki bakulungaga miligo midito na kilambu kubuchiwa, buyiseseja ha mabega ga banhu, aliyo boi benekele batatogilwe kuyichegenya na lwala lwabo.

⁵ Aliyo shitile shabo shose bakwitaga kubonwa na banhu; hangi bakukujaga fulakteria jabo, na bakugalihyaga matalajo ga shizwalo shabo.

⁶ Hangi bashitogilwe shigasho sha ku butongi aho bakulyaga shitolyo; na ku masumbi ga ku butongi mu mabilingilo,

⁷ Na kugishiwa mu nghungʼwano, na kwitanwa na banhu, Rabbi, Rabbi.

⁸ Aliyo bingʼwe mutizitanwa Rabbi, iki nagiji wingʼwe ali umo, Ngʼwene Kristo, na bingʼwe bose muli ba ludugu lumo.

⁹ Hangi mutizungʼwitana munhu nulu umo mu si, giki, singʼwe; iki Singʼwe ali umo. Uyo ali ngʼwigulu.

¹⁰ Nulu mutizitanwa balagiji, iki nagiji wingʼwe ali umo, Ngʼwene Kristo.

¹¹ Aliyo uyo ali ntale mu bingʼwe akubiza ngʼwinhilija wingʼwe.

¹² Na uyo ose akwikuja ngʼwenekele akudohelejiwa, na uyo ose akwidoheleja ngʼwenekele akukujiwa.

Yesu ubolomya bandiki na Bafarisayo

¹³ Aliyo ngʼwasangwa bingʼwe bandiki na Bafarisayo, bibeleja! Iki mukubalugalilaga banhu butemi wa ngʼwigulu: iki bingʼwe benekele mutingilaga, nabo abahaya kwingila mutubazunilijaga kwingila.

¹⁴ Ngʼwasangwa bingʼwe bandiki na Bafarisayo, bibeleja! Iki mukulyaga kaya ja bachilwa, mukulombaga kulomba kulihu kwa kukundikija wibeleja; kulwa iyo mulanukula nsango ntale kutinda.

¹⁵ Ngʼwasangwa bingʼwe bandiki na Bafarisayo, bibeleja! Iki mukapindilagapindilaga mu nyanza na ku si numu kunghembeka munhu; na aho ubiza nghemba, ngʼwangʼwita ngʼwana wa Gehena nghangala ibili kutinda bingʼwe benekele umo muli.

¹⁶ Ngʼwasangwa bingʼwe batongeji baboku, abo mukuhayaga giki, Uyo ose wiyilahilila hekalu, guti mhayo; aliyo uyo ose wiyilahilila zahabu ya mu hekalu, ngʼwene witungile.

¹⁷ Bingʼwe bachiluchilu na baboku; iki iyikilile butale ni ki, zahabu nulu hekalu iyo ikwiyejaga zahabu?

¹⁸ Hangi giki, Uyo ose ugwilahilila ng walilo, guti mhayo; aliyo uyo ose ukwilahilila kufunya ukuli ha ngʼwalilo, ngʼwene witungaga.

¹⁹ Bingʼwe bachiluchilu na baboku: iki iyikilile butale ni ki, u kufunya, nulu ngʼwalilo uyo gukukwejaga kufunya?

²⁰ Kulwa iyo, uyo ugwilahilila ngʼwalilo, ngʼwene ugwilahilila goi, na shose ishili ho kigulya yago.

²¹ Na uyo wiyilahilila hekalu, ngʼwene wiyilahilila yoi, na Uyo akwikalaga mo.

²² Na uyo ulilahilila igulu, ngʼwene ulilahilila isumbi lya butemi lya Mulungu, na Uyo wigashije ho.

²³ Ngʼwasangwa bingʼwe bandiki na Bafarisayo, bibeleja! Iki mukufunyaga imo ya ngʼwikumi ya nana, na bizari, na kumini, aliyo ngʼwalekaga mihayo mitale ya shilagilo, yene kulekanya mu wima, na kuchila kigongo na kuzunya; yeniyi shali shingʼwigelile kwiyita, na yeniyo yingi kuyileka biya.

²⁴ Bingʼwe batongeji baboku, abo mukuswizaga kabufune, na kuyimila ngamila.

²⁵ Ngʼwasangwa bingʼwe bandiki na Bafarisayo, bibeleja! Iki mukojaga kunze ya kikombe na sahani, aliyo mugati shokalile na bunyecha na bulaku.

²⁶ Bebe Mfarisayo moku, andaja tame koja mugati ya kikombe na sahani, hunaho kunze yasho ibize nela.

²⁷ Ngʼwasangwa bingʼwe bandiki na Bafarisayo, bibeleja! Iki ngʼwikolile na mashigila agabilile ndoba, ayo hene kunze gigengeleka gagalilile, aliyo mugati gokalile na maguha ga bafu na busoso bose.

²⁸ Giko na bingʼwe kunze ngʼwigengeleka ku banhu muli batungilija, aliyo mugati ngʼokalile na wibeleja na bugomi.

²⁹ Ngʼwasangwa bingʼwe bandiki na Bafarisayo, bibeleja! Iki mukuzengaga mashigila ga bahangi na mukugalilaga mashigo ga batungilija,

³⁰ Mukuhayaga giki, Ulu ni twali tuli ho mu shiku ja bakulugenji, ni twali tutisangigije nabo mu mininga ga bahangi.

³¹ Nose ngʼwikanilija benekele giki, muli bana babo abali bubabulaga bahangi.

³² Okajagi ningʼwe ngelekelo ya bakulugenji bingʼwe.

³³ Bingʼwe nzoka, bana ba kipili, mulagupela kinahe u nsango gwa Gehena?

³⁴ Kulwa nguno iyi, lolagi, namutumila bahangi, na ba masala, na bandiki: bamo babo mulababulaga na kubakoma: na bamo babo mulabatula mu mabilingilo gingʼwe, na mulabakubilija kufuma mu nzengo na ku nzengo.

³⁵ Kushisha nose galangʼwiziila mininga gose matungilija agali gusejiwa ha si, kufuma ku mininga ga ngʼwa Abeli ntungilija kushisha ku mininga ga ngʼwa Zakaria ngʼwana wa ngʼwa Barakia, uyo ngʼwali ngʼumulaga hagati ya hekalu na ngʼwalilo.

³⁶ Nghana namuwila giki, Mihayo iyi yose ilachiziila kibyalilwe iki.

Yesu uyitilila Yerusalemi

³⁷ Bebe Yerusalemi, Yerusalemi, uyo ukababulagaga bahangi, na ukabapondaga mawe abo abakatumagwa kuli bebe! Himba nghangala jinga nali natogilwe kubilinga bana bako, giti ngoko ikukumingaga tuzwiyo twayo mu manana gayo, aliyo bingʼwe ngʼwali mutatogilwe.

³⁸ Lolagi, numba yingʼwe ngʼwalekelwa nsaka.

³⁹ Iki namuwila giki, Kufuma haha mutalanibona kushisha mulahaya giki, Ali wa lubango Uyo izile mu lina lya Seba.