Matayo 22 - Ilagano Ipya Lya

Kigemenghejo cha bukombe

¹ Na Yesu ushosha ulungalunga hangi nabo mu shigemenghejo, uhaya giki,

² Butemi wa ngʼwigulu wikolanijiwa na ntemi nebe, uyo wali umegeja ngʼwana wakwe bukombe;

³ Na ubatuma basese bakwe kubitana abali bitanwa ku bukombe: na bali batatogilwe kwiza.

⁴ Ubatuma hangi basese bangi, uhaya giki, Bawilagi abali bitanwa giki, Lolagi, nalongije shiliwa shaue, ngʼombe jane na shitugo shinonu shubulagwa, na shinhu shose shilongije; nzugwi ku bukombe.

⁵ Aliyo boi iki bali batukalalwa buja, umo ku ngunda gwakwe, ungi ku bukwabi wakwe.

⁶ Abo busaga ho bubadima basese bakwe, bubitila kibi, na bubabulaga.

⁷ Ntemi aho wigwa iyi, upelana; na ugatuma mabita gakwe ga bashilikale, ubayagaja babulagi benabo na ugutwima nzengo gwabo.

⁸ Hunaho ubawila basese bakwe giki, Bukombe bulongije, aliyo benabo abali bitanwa batigelile.

⁹ Kulwa iyi jagi ku maka ga mapalapala, mubitane ku bukombe.

¹⁰ Na basese benabo bufuma buja ku mapalapala bubabilinga bose bali bubabona, ba bubi na ba wiza, na bukombe bokala bageni,

¹¹ Aliyo aho ntemi wingila kubalola bageni, ubona mo munhu atazwalile kizwalo cha bukombe;

¹² Nanghwe ungʼwila giki, Ngʼwichane, wingilaga umu kinahe uti na kizwalo cha bukombe? Nanghwe uhumula du.

¹³ Hunaho ntemi ubawila binhilija giki, Ntungagi makono na magulu, ngʼwinjagi mo, mumponye mu giiti cha hanze: kwenuko kulabiza kulila shisoji na kushelanya mino.

¹⁴ Iki abitanwa bene bingi, aliyo abasolwa bene bagehu.

Baherode bugema kuntega Yesu

¹⁵ Hunaho Bafarisayo buja bulomana bantege kinahe mu kalungalungile,

¹⁶ Na bubatuma kuli Wei bahemba babo hamo na Baherode, buhaya giki, Nangi, tumanile Bebe uli munhu wa nghana, hangi ukulangaga nzila ya Mulungu mu nghana, na utunkalalwa munhu ose, iki utulolaga bushu wa banhu.

¹⁷ Kulwa iyo tuwilage, ukwiganikaga kinahe? Angu, ilagilile kumfunija Kaisari kodi, himba yaya?

¹⁸ Aliyo Yesu iki umana buhunga wabo uhaya giki, Nguno ki mulinigema, bingʼwe bibeleja?

¹⁹ Nolekejagi feza ya kodi. Bung wenhela shilingi.

²⁰ Nanghwe ubawila giki, Chikolile iki na chandikile iki cha ngʼwa nani?

²¹ Bungʼwila giki, Cha ngʼwa Kaisari. Hunaho ubawila giki, Funyagi kuli Kaisari i sha ngʼwa Kaisari, na kuli Mulungu i sha Mulungu.

²² Aho bigwa iyi, bukumya; buneka, buja.

Basadukayo bugema kuntega Yesu

²³ Lwise lwene Basadukayo, abakahayaga giki, nduhu kujuka, bungʼwegela, bumuja,

²⁴ Buhaya giki, Nangi, Musa akahaya giki, Ulu munhu ucha, ati na bana, ngʼwana wa ngʼwawe angʼwingile nke wakwe, amyalile ngʼwana wa ngʼwawe bubyile.

²⁵ Bali bubiza ho ku biswe bagosha mpungati ba myaji umo; u ntangi utola, ucha, na ati na bubyile, unekela nzunaye nke wakwe;

²⁶ Na wa kabili nanghwe chene, na wa kadatu kushisha bose mpungati.

²⁷ Hanuma ya bose nkima nanghwe ucha.

²⁸ Ali lulu, mu bujuko alabiza nke wa ngʼwa nani mu benabo mpungati? iki bose bali buntola.

²⁹ Yesu ushosha ubawila giki, Ng wahuba, iki mutashimanile shandikwa, nulu budula wa Mulungu.

³⁰ Iki mu bujuko batutola, nulu batutolwa, aliyo bali giti bamalaika ba Mulungu ngʼwigulu.

³¹ Aliyo mu mhayo gwa kujuka kwa bafu, angu, mutasomile iyo yaahayiwa ku bingʼwe na Mulungu, uhaya giki.

³² Nene ndi Mulungu wa ngʼwa Abrahamu, na Mulungu wa ngʼwa Isaaka, na Mulungu wa ngʼwa Yakobo? Mulungu ati Mulungu wa bafu, aliyo wa bapanga.

³³ Na aho mabita gali gigwa iyi, gubyukumya kulwa kilangile chakwe.

Bafarisayo bugema kuntega Yesu

³⁴ Aliyo Bafarisayo aho bali bigwa giki, akabakamaja Basadukayo, huna bibilingila hamo.

³⁵ Na umo wabo, mani wa shilagilo, umuja kungema, uhaya giki,

³⁶ Nangi, i kilagilo kitale mu shilagilo ni kili?

³⁷ Yesu ungʼwila giki, Ulantogagwe Seba Mulungu wako na ngholo yako yose, na bupanga wako bose, na maganiko gako gose.

³⁸ Iki chene kilagilo cha kwandia na kitale.

³⁹ Cha kabili ichikolile nacho, kili iki, Ulantogagwe nzenganwa ngʼwiyo gitumo witogilwe ngʼwenekele.

⁴⁰ Mu shilagilo ishi shibili shilagilo shose na mihayo ya bahangi shumichiwa.

Yesu ubabuja Bafarisayo

⁴¹ Aho Bafarisayo bali bibilingile hamo, Yesu ubabuja,

⁴² Uhaya giki, U Kristo mukungʼwiganikaga kinahe? Ali ngʼwana wa ngʼwa nani? Bungʼwila giki, Wa ng wa Daudi.

⁴³ Ubawila giki, Ni buli lulu Daudi, muli Moyo, ungʼwitana giki, Seba? Uhaya giki,

⁴⁴ Seba akangʼwila Seba wane giki, Igashaga ku nkono gwane gwa bulyo, kushisha nalabatuula banishi bako kubiza ha kupanda bupandijo wako.

⁴⁵ Ali lulu ulu Daudi ungʼwitana Seba, ali ngʼwana wakwe kinahe?

⁴⁶ Na walati ho munhu uyo wadula kunshokeja mhayo, nulu walatugema munhu kumuja mhayo gose kufuma lushiku ulo hangi.