Matayo 20 - Ilagano Ipya Lya

Kigemenghejo cha batumami mu ngunda gwa mizabibu

¹ Iki butemi wa ngʼwigulu wikolile na namugi uyo wali wipuna dilu kulagana na batumami ba kutumama mu ngunda gwa mizabibu.

² Aho umala kulagana na batumami ku shilingi imo limi ji, ubatuma mu ngunda gwakwe gwa mizabibu.

³ Na uja hangi mu saa ya kadatu, ubabona bangi bimilile mu nghungʼwano badukile.

⁴ Nabo ubawila giki, Jagi ningʼwe mu ngunda gwa mizabibu, na iyo itungiligije nakungʼwinha. Nabo buja.

⁵ Uja hangi mu saa ya katandatu na mu saa ya kenda, wita giko.

⁶ Mu saa ya ikumi na imo uja ubasanga bangi bimilile ho badukile; na ubawila giki, Nguno ki ngʼwimilaga aha limi ji mudukile?

⁷ Bungʼwila giki, Iki ati ho munhu walaganaga na biswe. Ubawila giki, Jagi ningʼwe mu ngunda gwa mizabibu, na iyo itungiligije mukwanukula.

⁸ Aho yali mhindi, seba wa ngunda gwa mizabibu ungʼwila nalanghani wakwe giki, Bitanage a batumami, ubapele mhela jabo, ubandie a ba kumalija kushisha ku a ba kwandia.

⁹ Aho biza abo ba saa ya ikumi na imo banukula buli munhu shilingi imo.

¹⁰ Aho biza a ba kwandia biganika bakwanukula kutinda, nabo banukula buli munhu shilingi imo.

¹¹ Aho bumala kujanukula, bundugumila u namugi,

¹² Buhaya giki, Abo ba kumalija batumamaga saa imo gwike, nangho wabalenganijaga na biswe, abo twiyumilijaga mu makoye na busebu wa limi ji.

¹³ Aliyo wei ushosha, ungʼwila umo wabo giki, Ngʼwichane, natukwitilaga kibi; angu, utalaganile na nene ku shilingi imo?

¹⁴ Twalaga yeniyo yako, jaga. Aliyo natogilwe kungʼwinha ngʼwenuyu wa kumalija giti kuli bebe.

¹⁵ Angu, itigelile nene kwita ku shane gitumo natogilwe? nulu liso lyako lili lya bubi iki nene ndi wa wiza?

¹⁶ Giko ba kumalija balabiza ba kwandia, na ba kwandia balabiza ba kumalija; iki abitanwa bene bingi, aliyo abakongʼwa bene bagehu.

Yesu ukuhanga hangi kucha na kujuka kwakwe (Mk. 10.32-34; Lk. 18.31-34; Lolaga Mt. 12.38-42; 16.21-23; 17. 22-23)

¹⁷ Na aho Yesu wali ulinha kuja Yerusalemi ubapunja bahemba ikumi na babili ha mhujo mu nzila, ubawila giki,

¹⁸ Lolagi, tulilinha kuja Yerusalemi; na Ngʼwana wa munhu akwinhiwa ko ku bagabiji batale na ku bandiki; nabo bakunekanya nsango gwa kumulaga,

¹⁹ Na bakungʼwinha ko ku bana mahanga bansekele, na kuntula na mikoba, na kunkoma; na ku lushiku lwa kadatu akujuka.

Yohana na Yakobo bukoba butale

²⁰ Hunaho ninabo wa bana ba ngʼwa Zebedayo ungʼwegela hamo na bana bakwe, na unamya, unomba mhayo.

²¹ Nanghwe ungʼwila giki, Utogilwe ki? Wei ungʼwila giiti, Hayaga bana bane aba babili bazunilijiwe kwigasha, umo ku nkono gwako gwa bulyo, na umo ku nkono gwako gwa lumoso mu butemi wako.

²² Aliyo Yesu ushosha, uhaya giki, Bingʼwe mutamanile iyo mulilomba. Ngʼwadula kungʼwa ku kikombe icho nahaya kungʼwa Nene; hangi kubatijiwa na kubatijiwa uko naabatijiwa nako Nene? Bungʼwila giki, Twadula.

²³ Nanghwe ubawila giki, Hene mulangʼwa ku kikombe chane, na mulabatijiwa na kubatijiwa uko naabatijiwa nako Nene; aliyo kwigasha ku nkono gwane gwa bulyo na gwa lumoso, iti mu budula wane kubinha, aliyo kwene kwabo abubegejiwa na Baba.

²⁴ Na abo ikumi aho bigwa mhayo uyu, bubapelanilwa benabo babili munhu na ngʼwana wa ngʼwawe.

²⁵ Aliyo Yesu aho ubitana, ubawila giki, Bingʼwe mumanile giki, basugi ba mahanga bakusugaga na nguzu, na batale babo bakubatumamyaga na budula.

²⁶ Aliyo mu bingʼwe itizubiza giko; aliyo uyo ose atogilwe kubiza ntale mu bingʼwe, leke abize ngʼwinhilija wingʼwe.

²⁷ Na uyo ose atogilwe kubiza wa kwandia mu bingʼwe, leke abize nsese wingʼwe;

²⁸ Gitumo Ngʼwana wa munhu walatizile kwinhilijiwa, aliyo kwinhilija, na kufunya bupanga wakwe bubize kikomolelo cha kubakomola bingi.

Baboku babili bupijiwa

²⁹ Na aho bali bufuma mu Yeriko ibita itale lyunondela.

³⁰ Na baboku babili abigashije ha mhelo ya ipalapala, aho bigwa giki, Yesu alibita, buhamuka, buhaya giki, Seba, ngʼwana wa ngʼwa Daudi, utuchile kigongo.

³¹ Ibita lyubalemeja bafulike. Aliyo boi bongeja kuhamuka, buhaya giki, Seba, Ngʼwana wa ngʼwa Daudi, utuchile kigongo.

³² Na Yesu wimila ubitana, na uhaya giki, Mutogilwe nangʼwitile ki?

³³ Nabo bungʼwila giki, Seba, tutogilwe miso giswe gafumbulwe.

³⁴ Yesu ubasatwa, ubakuumya ku miso gabo. Haho na haho miso gabo ginhiwa kubona, nabo bunondela.