Matayo 18 - Ilagano Ipya Lya

Ntale mu butemi wa ngʼwigulu

¹ Ngʼwikanza lyenilo bahemba bungʼwegela Yesu, buhaya giki, Nani nghana ali ntale mu butemi wa ngʼwigulu?

² Na Yesu ungʼwitana ngʼwana nigini, untuula hagati yabo,

³ Uhaya giki, Nghana namuwila giki, Ulu mutugaluka kubiza giti bana banigini, mutalingila na hado mu butemi wa ngʼwigulu.

⁴ Kulwa iyo uyo ose widohya ngʼwenekele giti ngʼwana nigini uyu, ngʼwenuyo ali ntale mu butemi wa ngʼwigulu.

⁵ Na uyo ose ungʼwanukula ngʼwana nigini giti uyu mu lina lyane, ngʼwene wananukula Nene.

⁶ Aliyo uyo ose ungʼwipamya umo wa bado aba abanizunya Nene, ili hambuhambu kuli wei, ulu utungwa iwe itale lya kushela mu nhingo yakwe, na kulibijiwa mu bujiba wa nyanza.

Kwihiga kwa kwipamya

⁷ Ikusangwa si kulwa sha kwipamya, iki sha kwipamya shitukija kwiza; aliyo akusangwa munhu uyo uchenha cha kwipamya;

⁸ Nkono gwako nulu kugulu gwako ulu gukwipamya, gubute ho, uguponye kule na bebe; ili ya wiza kuli bebe kwingila mu bupanga uli nema nulu nchigiji, kutinda kwikala uli na makono abili nulu magulu abili na kuponyiwa mu moto gwa welelo na welelo.

⁹ Na liso lyako ulu lyukwipamya, ulikobole mo, uliponye kule na bebe; ili ya wiza kuli bebe kwingila mu bupanga uli na liso limo duhu kutinda kwikala uli na miso abili na kuponyiwa mu Gehena ya moto.

¹⁰ Ilanghanagi mutizundalaha umo wa bado aba; iki namuwila giki, ngʼwigulu bamalaika babo bakulolaga gwa bushu wa ngʼwa Baba ali ngʼwigulu.

¹¹ Iki Ngʼwana wa munhu wizile kupija ichajimila.

¹² Ngʼwiganika kinahe? Ulu munhu ali na ngholo igana, na imo yajo yujimila, angu, atujileka ijo makumi kenda na kenda mu ngulu, uja uyikobakoba iyo yajimilaga?

¹³ Na ulu uyibona, nghana namuwila giki, akuyiyegelaga yeniyo kutinda ijo makumi kenda na kenda ijitajimilile.

¹⁴ Giko Singʼwe ali ngʼwigulu atatogilwe umo wa bado aba kuyagala.

Wiyanguji mu badugu

¹⁵ Nduguyo ulu ukwitila kibi, jaga untambulile kibi chakwe bebe nanghwe bingʼwe babili; ulu wei akukwigwa wabonaga nduguyo.

¹⁶ Aliyo ulu atukwigwa, twalaga umo nulu babili bangi hamo na bebe, ibize giki, mu nomo gwa bakaniji babili nulu badatu mhayo gose gudime.

¹⁷ Ulu ulema kubigwa abo, iwilage kanisa; aliyo ulu ulema kuyigwa kanisa, leke abize kuli bebe giti misa nulu ntobisha.

¹⁸ Nghana namuwila giki, iyo yose mulatunga ha si ilabiza yatungagwa ngʼwigulu, na iyo yose mulatungula ha si, ilabiza yatungulagwa ngʼwigulu.

¹⁹ Hangi namuwila giki, Ulu babili mu bingʼwe busangila ha si mu mhayo gose uyo bakugulomba, bakwitilwa na Baba ali ngʼwigulu.

²⁰ Iki aho bali babili nulu badatu bibilingile mu lina lyane, nu Nene ndi ho hagati yabo. Kigemenghejo cha nsese uyo walatunekeja ngʼwiye

²¹ Hunaho Petro ungʼwegela, uhaya giki, Seba, ndugu wane alabyunisobya nghangala jinga, na nene nabyunekeja? himba kushisha nghangala mpungati?

²² Yesu ungʼwila giki, Natukuwilaga kushisha nghangala mpungati, aliyo kushisha makumi mpungati nghangala mpungati.

²³ Kulwa iyo butemi wa ngʼwigulu wikolanijiwa na ntemi nebe, uyo walatogilwe kubala na basese bakwe sabo jakwe.

²⁴ Aho wandia kubala, wenhwa umo kuli wei, uyo walali na bugasa wa talanta 10,000.

²⁵ Aliyo iki wali ugayiwa cha kufunya, ise bugonzo ulagila ajinjiwe, uwe, na nke wakwe, na bana, na shose isho wali nasho, alipe bugasa.

²⁶ Kulwa iyo nsese ugwa, unamya, uhaya giki, Baba bugonzo, iyumilijage na nene, nane nakukulipila shose.

²⁷ Hunaho ise bugonzo wa nsese ngʼwenuyo unsatwa, untaligulila na unekeja bugasa.

²⁸ Aliyo nsese ngʼwenuyo aho winga ho, umona umo wa basese biye, uyo wali na bugasa kuli wei wa shilingi igana: na undima, uniga mu mamilo, uhaya giki, Nilipilage bugasa wane.

²⁹ Kulwa iyo nsese ngʼwiye ugwa ku magulu gakwe ungʼwikumbilija, uhaya giki, Iyumilijage na nene, nane nakukulipila shose.

³⁰ Nanghwe walatatogilwe, aliyo uja umponya mu jela kushisha aho amale kulipa bugasa wenubo.

³¹ Aho basese biye bubona iyo yitagwa, bupinihala no, buja bunsombolela sabo bugonzo yose iyo yitagwa.

³² Hunaho ise bugonzo ungʼwitana ungʼwila giki, Bebe, nsese nulu, nene nakakulekeja bebe bugasa wenubo bose, iki wali unikumbilija;

³³ Angu, shali shikwigelile nu bebe kunchila kigongo nsese ngʼwiyo, gitumo nene nakakuchila kigongo bebe?

³⁴ Na ise bugonzo upelana, ungʼwinha ho ku baluhya kushisha amale kulipa bugasa wenubo bose.

³⁵ Giko nu Baba ali ngʼwigulu alangʼwitila bingʼwe, ulu mutilekejaga mu ngholo jingʼwe buli munhu na nduguye busobya wakwe.