Matayo 17 - Ilagano Ipya Lya

Kuihindula kwa ngʼwa Yesu

¹ Na hanuma ya shiku itandatu Yesu untwala Petro, na Yakobo, na Yohana ngʼwana wa ngʼwawe ubalinhya heke boi bike mu lugulu lulihu,

² Nanghwe uhinduka mu miso gabo; na bushu wali waka giti limi, shizwalo shakwe shubiza shape giti isana.

³ Kuhayumanila, Musa na Eliya bubilongela balilungalunga nanghwe.

⁴ Petro ushosha ungʼwila giki, Seba, ya wiza biswe kubiza ho aha; ulu utogilwe tuzenge aha maduku adatu; limo lyako, na limo ya ngʼwa Musa, na limo lya ngʼwa Eliya.

⁵ Aho walatali ulungalunga, kuhayumanila, ilunde lya isana lyubakundikija: na ilaka lyufuma ngʼwilunde, lyuhaya giki, Uyu Ngʼwana wane ntogwa, muli Wei nayejiwa no, ngʼwigwagi Wei.

⁶ Na aho bahemba bigwa iyi, bugwa bachimigije, na bogoha niyo no.

⁷ Na Yesu ubegela ubakuumya, uhaya giki, Bukagi, mutogohage.

⁸ Aho bulangamila miso, bali batumona munhu aliyo Yesu wike.

⁹ Aho bakwikaga mu lugulu Yesu ubahana, uhaya giki, Mutizungʼwila munhu nulu umo kolechiwa uku, kushisha Ngʼwana wa munhu aho alamalaga kujuka mu bafu.

¹⁰ Na bahemba bakwe bumuja, buhaya giki, Ni buli bandiki bakuhayaga gild, Shingʼwigelile Eliya kwiza tame?

¹¹ Yesu ushosha, uhaya giki, Eliya hene izile tame kudoganya yose.

¹² Aliyo namuwila giki, Eliya wamalaga kwiza, nabo bali batumana wei, aliyo bali bungʼwitila gitumo bali batogelilwe. Giko na Ngʼwana wa munhu alaluhaluhiwa nabo.

¹³ Hunaho bahemba bitegeleja giki, walubawilaga ya ngʼwa Yohana Matija.

Yesu umpija nyanda wa lusalo

¹⁴ Na aho bali bushika kwibita, munhu umo ungʼwegela, untugija mazwi, uhaya giki,

¹⁵ Seba, unchile kigongo ngʼwana wane, iki asatile lusalo, na uluhaluhiwa no; iki nghangala ningi akugwaga mu moto, na nghangala ningi mu minzi.

¹⁶ Na nene nali nungʼwenha ku bahemba bako, nabo buduma kumpija.

¹⁷ Aliyo Yesu ushosha, uhaya giki, Bingʼwe kibyalilwe ikituzunyaga na chigomagomile, nakwikala na bingʼwe kushisha nanali? hangi nakwiyumilija na bingʼwe kushisha nanali? ngʼwenhagi aha hali Nene.

¹⁸ Na Yesu ulilemeja isamva, nalyo lyungʼwinga: na nyanda upijiwa kufuma ikanza ilo.

¹⁹ Hunaho bahemba bungʼwegela Yesu ha mhujo, buhaya giki, Ni buli biswe twali tutudula kulipeja?

²⁰ Yesu ubawila giki, Kulwa butuzunya wingʼwe. Iki nghana namuwila giki, Ulu muli na kuzunya giti kabeke ka karadali, mukuluwila lugulu ulu, Ingaga ho uje uko, nalo lukwinga; nulu gutalabiza ho mhayo ugutudulika ku bingʼwe.

²¹ Aliyo mbika iyi itingaga ulu iti kulwa kulomba na kudila nzala.

Yesu ukuhanga kucha na kujuka kwakwe (Mk. 9.30-32; Lk. 9.44-45)

²² Aho bali bikala mu Galilaya, Yesu ubawila giki, Ngʼwana wa munhu alihaya kwinhiwa ko mu makono ga banhu;

²³ Nabo bakumulaga, na lushiku lwa kadatu akujuchiwa. Nabo bupinihala no.

Yesu ufunya kodi

²⁴ Aho bali bushika Kapernaumu, abanukuji ba nusu shekel! bungʼwegela Petro, buhaya giki, Nangi wingʼwe, angu, atafunyaga nusu shekeli?

²⁵ Uhaya giki, Yaya, akafunyaga. Na aho wingila mu numba, Yesu untanga kumuja uhaya giki, Wiganika kinahe, Simoni? Batemi ba si bakanukulaga kodi nulu buhoja ku banani? Ku bana babo nulu ku babisa?

²⁶ Petro ungʼwila giki, Ku babisa. Yesu ungʼwila giki, Nahene ulu chene, bana bali bana ba si.

²⁷ Aliyo tutizubipamya, jaga ku nyanza ukaponye iloho, na ndilo ya kwandia kwibuka udime, na aho wasamya nomo gwayo ukubona shekeli; utwale yeniyo, ukabinhe kulwane na kulwako.