Matayo 16 - Ilagano Ipya Lya

Bafarisayo bukoba kubona kimanikijo

¹ Na aho Bafarisayo na Basadukayo bungʼwegela bungema, bumuja abolekeje kimanikijo kufuma ngʼwigulu.

² Aliyo Wei ushosha ubawila giki, Aho ili mhindi, mukuhayaga giki, Ikubiza ngʼwanga; iki igulu lili lyaza.

³ Ulu dilu, Lelo mbula, iki igulu lili lyaza, lyatungaga di. Bingʼwe bibeleja, mumanile kupima suso ya ngʼwigulu, aliyo shimanikijo sha makanza aya mutushidula.

⁴ Kibyalilwe cha bubi na cha bushihya kikukobaga kimanikijo; aliyo kitalinhwa kimanikijo ulu iti kimanikijo cha Nghangi Yona. Na ubaleka, uja.

Yesu nshomeleja mihayo ya kibimbya

⁵ Na aho bahemba bakwe bali bushika ku nkilo bali biba kutwala migati.

⁶ Hunaho Yesu ubawila giki, Ikalagi miso, ngʼwilanghanage ku kibimbya cha Bafarisayo na Basadukayo.

⁷ Nabo bibugilija boi bike buhaya giki, Iki tutenhile migati.

⁸ Yesu umana mhayo uyu, uhaya giki, Bingʼwe ba kuzunya kudo, ni buli ngʼwibugilija bingʼwe bike giki, Iki mutenhile migati?

⁹ Mutali kwiganika nulu kwizukwa i migati itano ya benabo shiku shitano, na masonzo ganga ngʼwali ngʼukuminga?

¹⁰ Nulu migati mpungati ya benabo shiku shine, na makililijo ganga ngʼwali ngʼukuminga?

¹¹ Ni buli mutiganikaga giki, yali iti ya migati namuwila kwilanghana ku kibimbya cha Bafarisayo na Basadukayo?

¹² Huna lulu bitegeleja giki, walatubawila kwilanghana ku kibimbya cha migati, aliyo ku kilangile cha Bafarisayo na Basadukayo.

Petro unkanila Yesu, Ngʼwene Kristo

¹³ Aho Yesu ushika mu mapande ga Kaisaria Filipo, ubabuja bahemba bakwe uhaya giki, Banhu bakunihayaga Nene, Ngʼwana wa munhu, ndi nani?

¹⁴ Buhaya giki, Bamo bakuhayaga giki, Yohana Matija; bangi giki, Eliya; aliyo bangi giki, Yeremia, nulu umo wa bahangi.

¹⁵ Ubawila giki, Aliyo bingʼwe, mukunihayaga ndi nani?

¹⁶ Simoni Petro ushosha, uhaya giki, Bebe uli Kristo, Ngʼwana wa Mulungu mpanga.

Kuhangwa kwa Eklezia

¹⁷ Yesu ushosha, ungʼwila giki, Uli wa lubango bebe, Simoni ngʼwana Yona; iki mili na mininga shitakukundulilile mhayo uyu, aliyo Baba ali ngʼwigulu.

¹⁸ Na Nene nakuwila giki, Bebe uli Petro, na ha itale ili nalayizenga Eklezia yane, na milyango ya kulimu italayitinda nguzu.

¹⁹ Na Nene nakukwinha mfungulo ja butemi wa ngʼwigulu; na icho chose ulakitunga ha si kilatungwa ngʼwigulu; na icho chose ulakitungula ha si, kilatungulwa ngʼwigulu.

²⁰ Hunaho ubahana bahemba bakwe giki, batizungʼwila munhu nulu umo giki, u Wei Ngʼwene Yesu u Kristo.

Yesu ukuhanga kucha na kujuka kwakwe

²¹ Kufuma ikanza ilo Yesu wandia kubolekeja bahemba bakwe giki, shingʼwigelile Wei kuja Yerusalemi, na kuluhaluhiwa mihayo mingi na banamhala na bagabiji batale na bandiki, na kubulagwa, na ku lushiku lwa kadatu kujuchiwa.

²² Huna Petro umpunja ha mhelo, wandia kunemeja, uhaya giki, Ii yaya, Seba, mhayo uyu gutalabiza kuli Bebe.

²³ Aliyo Wei ugaluka, ungʼwila Petro giki, Jaga kunuma yane, Shetani; bebe uli ishiki lya kwigumha kuli Nene: iki utiganikaga i ya Mulungu, aliyo ya banhu.

Bupanga wa kizunya

²⁴ Hunaho Yesu ubawila bahemba bakwe giki, Munhu ose ulu atogilwe kunilondela, ilemeje ngʼwenekele, abuche nsalaba gwakwe, anilondele.

²⁵ Iki uyo ose atogilwe kupija bupanga wakwe, ngʼwene alabuyagaja; na uyo ose alabuyagaja bupanga wakwe kulwa nguno yane, ngʼwene alabubona.

²⁶ Iki ikumelela ki munhu ulu upandika si yose na ujimija bupanga wakwe? Nulu munhu alafunya ki kukomola bupanga wakwe?

²⁷ Iki Ngʼwana wa munhu aliza ngʼwikujo lya ngʼwa Ise hamo na bamalaika bakwe; hunaho alangʼwinha buli munhu kulenganila na shitile shakwe.

²⁸ Nghana namuwila giki, Bali ho bamo abimilile aha, batalaloja kucha na hado, kushisha aho balamala kumona Ngʼwana wa munhu izile mu butemi wakwe.