Matayo 14 - Ilagano Ipya Lya

Kabulagilwe ka ngʼwa Yohana Matija

¹ Ngʼwikanza ilo Herode u nsugi wali wigwa lukumo lwa ngʼwa Yesu,

² Na ubawila batumami bakwe giki, Uyu hu ngʼwene Yohana Matija; wajukile mu bafu; na kulwa iyi shitile ishi sha budula shikwitaga muli Wei.

³ Iki Herode wali wandima Yohana, untunga, na untuula mu jela, kulwa nguno ya Herodia nke wa ngʼwana wa ngʼwawe, Filipo.

⁴ Iki Yohana akangʼwila giki, Ilemegije bebe kubiza nanghwe.

⁵ Aho walatogilwe kumulaga ubogoha banhu, iki buzunya giki, ngʼwene nghangi.

⁶ Aliyo aho bulwizukwa lushiku lutale lwa kubyalwa kwa ngʼwa Herode, ngʼwana ngʼwaniki wa ngʼwa Herodia ubina hagati yabo, unyeja Herode.

⁷ Huna ungʼwisagija na kilahilo giki, akunsamba kinhu chose alakilombe.

⁸ Nanghwe iki uhanwa na nina, uhaya giki, Nisambage henaha ngʼwilangahe u ntwe gwa ngʼwa Yohana Matija.

⁹ Na ntemi upinihala; aliyo kulwa shilahilo shakwe, na kulwa benabo abali bigashije ku shiliwa hamo nanghwe, ulagila inhiwe.

¹⁰ Utuma umuta Yohana ntwe mu jela.

¹¹ Na ntwe gwakwe gwenhwa ngʼwilangahe, na bungʼwinha ngʼwaniki, nanghwe untwalila nina.

¹² Huna bahemba bakwe biza, bugubucha mimba, buguguma; na buja bukansombolela Yesu.

¹³ Aho Yesu wali wigwa iyo, winga kwenuko, uja mu lyato, wisunda heke kwipande iliti na banhu. Aho mabita gali gigwa iyo, gufuma mu mizengo gunkubija mu nzila ya magulu.

¹⁴ Aho Yesu winga, ubona ibita itale, ubasatwa, na ubapija balwile babo.

Banhu 5,000 bulishiwa

¹⁵ Aho yali ili mhindi bahemba bakwe biza kuli Wei buhaya giki, Ipande ili liti na banhu, na haha ikanza lyabitaga; galagage mabita, baje mu mizengo, bakigulile benekele shiliwa.

¹⁶ Aliyo Yesu ubawila giki, Bati na mhayo gwa kuja; binhagi bingʼwe sha kulya.

¹⁷ Nabo bungʼwila giki, Aha tuti na kinhu numho migati itano na ndilo ibili.

¹⁸ Nanghwe uhaya giki, Shenhagi hali Nene aha.

¹⁹ Na ugalagila mabita kwigasha ha maswa; na wanukula migati itano na ndilo ibili, ulangamila miso kwigulu, usungulila lubango, ushimeganya ubinha bahemba, na bahemba bubinha banhu.

²⁰ Na bose bulya, biguta; na bukuminga masajiwa agali gusaga, masonzo ikumi na abili agokala.

²¹ Nabo abali bulya bali bagosha hamo shiku shitano kuleka bakima na bana.

Yesu ushiminza higulya ya nyanza

²² Haho na haho Yesu ubahadikija bahemba bakwe kwingila mu lyato, batonge ku nkilo, kushisha Wei alamale kwilaga na mabita.

²³ Na aho wamala kwilaga na mabita, ulinha mu lugulu wiyene kulomba, na aho yali ili mhindi walali ko wiyene.

²⁴ Aliyo lyato lyali lili ha bujiba wa nyanza, lyubuchabuchiwa na mahuli, iki nyaga gwali gubafumila ku butongi.

²⁵ Mu bulindi wa kane wa bujiku, Yesu uja kubo, akushiminzaga higulya ya nyanza.

²⁶ Na aho bahemba bumona alishiminza higulya ya nyanza, biganilija, buhaya giki, Lili linghangi; nabo buhamuka kulwa boba.

²⁷ Haho na haho Yesu ulungalunga nabo, uhaya giki, Timbyagi ngholo; ambu, ndi Nene; mutogohage.

²⁸ Petro unshokeja, uhaya giki, Seba, ulu uli Bebe, uniwile nize kuli Bebe higulya ya minzi.

²⁹ Nanghwe ungʼwila giki, Nzugu. Na aho Petro winga mu lyato, ushiminza higulya ya minzi, kuja kuli Yesu.

³⁰ Aliyo aho ubona nyaga, ogoha; na aho wandia kutubila, uhamuka, uhaya giki, Seba, nipijage.

³¹ Haho na haho Yesu utama nkono gwakwe, undima, ungʼwila giki, Bebe wa kuzunya kudo, watawatawa nguno ki?

³² Na aho bumala kwingila mu lyato, nyaga gulembela.

³³ Nabo abali mu lyato bungʼwegela, bunamya, buhaya giki, Nghana uli Ngʼwana wa Mulungu.

Yesu upija basatu mu si ya Genesareti

³⁴ Na aho bali bukila, bushika ku si ya Genesareti.

³⁵ Na banhu ba ipande ilo aho bumana Wei, butuma nghulu mu si iyo yose ibimbikanilwe, nabo bungʼwenhela bose abalwile;

³⁶ Nabo bungʼwikumbilija abazunilije bankuumye nulu kwikigijo lya kizwalo chakwe; nabo bose abunkuumya ko bupijiwa.