Matayo 13 - Ilagano Ipya Lya

Shigemenghejo sha butemi wa ngʼwigulu. Mibi

¹ Lwise lwene wali winga mu numba, wigasha ha lwande lwa ku nyanza.

² Na mabita matale gungʼwibilingila, kushisha nose wingila mu lyato na wigasha mo; na ibita lyose lyimila ha ngʼwalo.

³ Hunaho ulungalunga nabo mihayo mingi mu shigemenghejo, uhaya giki, Lolagi, mibi akafuma uja kubiba mbiyu;

⁴ Aho ubiba, mbiyu jimo jugwa ha nzila, huna jiza noni, jujilya;

⁵ Jingi jugwa ha ipande lya mawe, aho yali iti ho si ningi; na juzwa wangu iki si yali itajile no.

⁶ Aliyo aho limi lyaka, jochiwa; na iki jali jiti na miji junyala.

⁷ Jingi jugwa mu mihwa; na mihwa gukula, gujishita;

⁸ Aliyo jingi jugwa ha si ya wiza, na juhola mbeke, jingi igana, jingi makumi atandatu, na jingi makumi adatu.

⁹ Uyo all na matu ga kwigwa, leka igwe.

¹⁰ Na bahemba begela, bungʼwila giki. Ni buli ukulungalungaga mu shigemenghejo?

¹¹ Nanghwe ushosha ubawila giki, Iki bingʼwe ngʼwinhiwagwa kumana ya kwigeniha ya butemi wa ngʼwigulu, aliyo benabo batinhilwe.

¹² Iki uyo ose ali na kinhu, ngʼwenuyo akwinhwa, nanghwe akukwija; aliyo uyo ose ati na kinhu, akwingijiwa na isho ali nasho.

¹³ Kulwa iyo naalungalungaga nabo mu shigemenghejo giki, aho bulola batulolaga, na aho bigwa, batigwaga, nulu kwitegeleja yaya.

¹⁴ Na buhangi wa ngʼwa Isaya washikilijiwa mu bo; ubo bukuhayaga giki, Kwigwa mukwigwa, aliyo kwitegeleja yaya; na kulola mukulola, aliyo kubona yaya.

¹⁵ Iki ngholo ya banhu aba yagunaga, na matu gabo gadidohelwa kwigwa, na miso gabo bagalilimaja; giki, batizubona na miso gabo, nulu kwigwa na matu gabo, nulu kwitegeleja na ngholo yabo, nulu kugaluka, na Nene nabapije.

¹⁶ Aliyo gali na lubango miso gingʼwe, iki gakulolaga; na matu gingʼwe, iki gakwigwaga.

¹⁷ Iki nghana namuwila giki, Bahangi bingi na batungilija bingi bali bukumbula kubona iyi mukuyilolaga, aliyo bali batuyibona; na kwigwa iyi mukuyigwaga, aliyo bali batuyigwa.

¹⁸ Kulwa iyo igwagi kigemenghejo cha mibi.

¹⁹ Aho munhu ose wigwa mhayo gwa butemi na atugwitegeleja, huna wiza u mi na ugupula mhayo ugwali gubiwa mu ngholo yakwe. Uyu ali ngʼwenuyo uwali ubiwa ha nzila.

²⁰ Aliyo uyo wali ubiwa ha ipande lya mawe, uyu ali ngʼwenuyo akwigwaga mhayo, ugwanukula wangu na kuyega;

²¹ Nanghwe ati na nji mugati yakwe, aliyo ushinga kakanza; hunaho aho makoye gilonga na kunyajanyajiwa kulwa mhayo haho na haho wipama.

²² Uyo wali ubiwa mu mihwa, uyu ali ngʼwenuyo akwigwaga mhayo, na mayanga ga si, na bulembalembi wa sabo, shugushita u mhayo, nago gututwaja matwajo.

²³ Uyo wali ubiwa ha si ya wiza, uyu ali ngʼwenuyo akwigwaga mhayo ugwitegeleja; uyo nghana akutwajaga matwajo, umo igana, na ungi makumi atandatu, na ungi makumi adatu.

Kigemenghejo cha ngano na pungu ja ngano

²⁴ Ubatuulila kigemenghejo kingi, uhaya giki, Butemi wa ngʼwigulu wikolile na munhu uwali ubiba mbiyu ja wiza mu ngunda gwakwe;

²⁵ Aliyo aho banhu bali bushutula, wiza u ngʼwanishi wakwe; na ubiba pungu ja ngano mu ngano, na uja.

²⁶ Aliyo aho juzwa na jutulika, hunaho lulu jilonga na pungu ja ngano.

²⁷ Hunaho basese ba namugi uyo, aho biza kuli wei, bungʼwila giki, Seba, angu, walutabibile mbiyu ja wiza mu ngunda gwako? guli na pungu ja ngano jafumile hali lulu?

²⁸ Nanghwe ubawila giki, Ngʼwanishi witile iyi. Na basese bungʼwila giki, Utogilwe tuje tukajidubulile mo?

²⁹ Aliyo uhaya giki, Yaya, iki hamo aho mulijidubulila mo i pungu ja ngano, mukujidubulanigija ni ngano hamo najo.

³⁰ Jilekagi jose jikule bubili wajo kushisha ku magesa; na mu shiku ja magesa nalabawila bagesi giki, Jidubulagi mo tame i pungu ja ngano, mujitunge maganda maganda, jipemve; aliyo ngano mujikuminge ngʼwibikilo lyane.

Kigemenghejo cha kabeke ka karadali

³¹ Ubatuulila kigemenghejo kingi, uhaya giki, Butemi wa ngʼwigulu wikolile na kabeke ka karadali, ako munhu ukasola na ubiba mu ngunda gwakwe:

³² Ako hene kali kado kutinda mbiyu jose; aliyo aho kukula, kukila makubi gose butale, nako kubiza nti, na noni ja hape jiza, jubyulala mu matambi gago.

Kigemenghejo cha kibimbya

³³ Ubawila kigemenghejo kingi, Butemi wa ngʼwigulu wikolile na kibimbya, icho nkima ukisola, na ukibisa mu ngelekelo idatu ja busu, kushisha bose bubimbiwa.

³⁴ Mihayo iyi yose Yesu wali ubawila ba mabita mu shigemenghejo, na ulu iti mu kigemenghejo walatubawila mhayo gose;

³⁵ Gushikilijiwe mhayo ugwali guhayiwa na nghangi giki, Nakwasamya nomo gwane mu shigemenghejo, nakuhaya mihayo iyibisile kufuma kubumva kwa si.

Makulu ga kigemenghejo cha ngano na pungu

³⁶ Hunaho Yesu wilaga na mabita, wingila mu numba; na bahemba bakwe biza kuli Wei, buhaya giki, Utufubolele kigemenghejo cha pungu ja ngano ja mu ngunda.

³⁷ Nanghwe ushosha ubawila giki, Uyo akubibaga mbiyu ja wiza Ngʼwene Ngʼwana wa munhu;

³⁸ Ngunda gwene si; mbiyu ja wiza, a bene bana ba butemi; aliyo pungu ja ngano, a bene bana ba ngʼwenuyo mi;

³⁹ Ngʼwanishi uwali ujibiba ngʼwene Shetani; magesa gene nghalikijo ya ikanza ili: na bagesi bene bamalaika.

⁴⁰ Gitumo pungu ja ngano judubulilwa na jupemva moto ilabiza giko ku nghalikijo ya ikanza ili.

⁴¹ Ngʼwana wa munhu alabatuma bamalaika bakwe, nabo baladubulila mo mu butemi wakwe sha kwipamya shose, na abo bakwitaga bugomi.

⁴² Nabo balabaponya ngʼwichongo lya moto: kwenuko kulabiza ho kulila nghungu na kushelanya mino.

⁴³ Hunaho batungilija balaka giti limi mu butemi wa ngʼwa sabo. Uyo ali na matu ga kwigwa, leka igwe. Kigemenghejo cha busabi bubisile mu ngunda

⁴⁴ Hangi butemi wa ngʼwigulu wikolile na busabi ububisile mu ngunda; ubo munhu aho ubukunga ububisa; na kulwa kubuyegela, uja ujinja shose isho ali nasho, na ugula ngunda gwenuyo.

Kigemenghejo cha lulu ya mpango

⁴⁵ Hangi butemi wa ngʼwigulu wikolile na munhu nkwabi, uyo akukobaga lulu ja wiza;

⁴⁶ Uyo aho wikunga lulu imo ya mpango ngʼwingi, uja, ujinja shose isho ali nasho, na wigula.

Kigemenghejo cha igokolo

⁴⁷ Hangi butemi wa ngʼwigulu wikolile na igokolo ilyali lyuponyiwa mu nyanza, nalyo lyukuminga ja mbika jose;

⁴⁸ Ilo aho lyokala, bulidutila ha ngʼwalo, na bigasha bujikuminga i ja wiza mu shiseme; aliyo i ja bubi bujiponya.

⁴⁹ Ilabiza giko ku nghalikijo ya ikanza ili; bamalaika baliza, nabo balabakomanya a ba bubi kufuma mu batungilija,

⁵⁰ Na balabaponya ngʼwichongo lya moto: kwenuko kulabiza ho kulila nghungu na kushelanya mino.

⁵¹ Yesu ubawila giki, Ngʼwitegelejaga mihayo iyi yose? Nabo bungʼwila giki, Ali chene, Seba.

⁵² Huna ubawila giki, Kulwa iyo buli ngʼwandiki uyo wahembekwa mu butemi wa ngʼwigulu, wikolile munhu namugi, uyo akufunyaga ngʼwibikilo lyakwe shinhu shipya na sha kale.

Yesu ulengʼwa mu si ya ngʼwabo

⁵³ Na yubiza aho Yesu akamala shigemenghejo ishi, huna winga ko.

⁵⁴ Na aho ushika ku si ya ngʼwabo, akabalanga ngʼwibilingilo lyabo, kushisha nose buzunzumala na buhaya giki, Munhu uyu wafunije hali masala aya na Shitwa ishi sha budula?

⁵⁵ Ngʼwenuyu, angu, ati ngʼwana wa mpunzi? Na nina ati uyo akitanagwa Mariamu? na bana ba ngʼwawe, Yakobo, na Yusufu, na Simoni, na Yuda?

⁵⁶ Na balumbuye, angu, bati ho bose kunu ku biswe? munhu uyu wafunije hali lulu iyi yose?

⁵⁷ Nabo bipama muli Wei. Aliyo Yesu ubawila giki, Nghangi atugayiwa ikujo, ulu iti mu si ya ngʼwabo, na mu numba yakwe.

⁵⁸ Na kwenuko walatita ko shitile shingi sha budula, kuhva butuzunya wabo.