Matayo 12 - Ilagano Ipya Lya

Bakemba bunuka masha ha Sabato

¹ Ngʼwikanza lyenilo Yesu wali ubita mu migunda ya ngano ha Sabato; na bahemba bakwe butuba, bandia kuhulula mangala, na bulya.

² Aliyo Bafarisayo aho bubona iyi, bungʼwila giki, Ambu, bahemba bako bakwitaga icho cha ngilo kwita ha Sabato.

³ Aliyo Wei ubawila giki, Mutasomaga iyo akita Daudi aho wali utuba, wei na benabo abali hamo nanghwe;

⁴ Gitumo wali wingila mu numba ya Mulungu na ulya migati iyufunyiwa kuli Mulungu, iyo yali ili ya ngilo kuli wei na ku abo abali hamo nanghwe kwilya, ulu iti bagabiji bike?

⁵ Nulu mutasomaga mu shilagilo giki, ha Sabato bagabiji mu hekalu bakakenagulaga Sabato, na bati na kilingo?

⁶ Aliyo namuwila giki, Aha ali ho ntale kutinda hekalu.

⁷ Aliyo ulu ni ngʼwali mumanile makulu ga mhayo uyu giki, Nene nayejiwa na kuchila kigongo, kitambo yaya, ni ngʼwali mutabalekanije nsango abati na kilingo.

⁸ Iki Ngʼwana wa munhu ali Seba nu ku Sabato.

Munhu wa nkono gumile upijiwa ha Sabato

⁹ Aho winga uko wingila ngʼwibilingilo lyabo.

¹⁰ Na lolaga, walali mo munhu ali na nkono gumile. Na bumuja buhaya giki, Angu, cha ngilo kupija ha Sabato? babonele ho mhayo gwa kumula.

¹¹ Ubawila giki, Angu, munhu nani mu bingʼwe uyo ali na ngholo imo, ulu yugwa ngʼwichongo ha Sabato atuyidima kuyinja mo?

¹² Angu, munhu ati wa mpango kutinda ngholo? Kulwa iyi iti cha ngilo kwita cha wiza ha Sabato.

¹³ Hunaho ungʼwila munhu ngʼwenuyo giki, Tamaga nkono gwako. Na ugutama; nago gubiza mpanga giti u gungi.

¹⁴ Aliyo Bafarisayo bufuma na bulomana gitumo bakunyagaja.

Basatu bingi bupijiwa

¹⁵ Aliyo Yesu iki umana mhayo uyu winga ko uja: na mabita matale gunondela; nanghwe ubapija bose,

¹⁶ Na ubakomeleja batizunkumucha;

¹⁷ Gushikilijiwe uyo gwaahayiwa na nghangi Isaya, uhaya giki.

¹⁸ Lolagi ntumami wane, uyo naansola; ntogwa wane, muli Wei bupanga wane wayejiwagwa; nakuntuulila Moyo Ngʼwela wane, nanghwe alabasoinbolela bana mahanga butungilija.

¹⁹ Atalahalalila, nulu kuhamuka; nulu munhu ataligwa ilaka lyakwe mu mapalapala.

²⁰ Idete lilabukile atalalibinza, lutambi ulukuzukaga lyochi atalalujimya, kushisha alakutuma kulekanya nsango kushike mu bupyeni.

²¹ Na bana mahanga balahsagililwa lina lyakwe.

Kibi cha kunduka Moyo Ngʼwela

²² Hunaho akenhwa kuli Wei munhu ali na isamva ali moku hangi kimumu, nanghwe umpija, kushisha nose uyo walali moku na kimumu ulungalunga na ubona.

²³ Na mabita gose gudedebala, guhaya giki, Angu, Uyu ati ngʼwana wa ngʼwa Daudi?

²⁴ Aliyo aho Bafarisayo bigwa iyi, buhaya giki, Ambu, Ngʼwenuyu atupejaga masamva ulu iti mu budula wa Beelzebuli u ntale wa masamva.

²⁵ Na Yesu iki umana maganiko gabo, ubawila giki. Buli butemi uwilekanya wenekele wiyita dalali; na buli nzengo nulu numba iyilekanya yenekele italimila.

²⁶ Na ulu Shetani akumpejaga Shetani, wilekanya ngʼwenekele, butemi wakwe bulimila kinahe lulu?

²⁷ Na Nene ulu nakupejaga masamva mu budula wa Beelzebuli, bana bingʼwe bakugapejaga mu budula wa ngʼwa nani? kulwa iyo boi bakubiza balekanya bingʼwe.

²⁸ Aliyo Nene ulu nakupejaga masamva mu budula wa Moyo wa Mulungu, huna lulu butemi wa Mulungu wangʼwiziilaga bingʼwe.

²⁹ Nulu munhu wadula kinahe kwingila mu numba ya munhu wa nguzu, na kusonza shikolo shakwe, ulu atandije kuntunga munhu ngʼwenuyo wa nguzu? hunaho akusonza numba yakwe.

³⁰ Uyo ati ku lwande lwane ali ngʼwanishi wane; na uyo atukumingaga hamo na Nene, usalanghanya.

³¹ Kulwa iyo namuwila giki, Banhu balalekejiwa kibi chose na buduki bose, aliyo kunduka Moyo Ngʼwela kuti na kulekejiwa.

³² Na uyo ose unghaya kibi Ngʼwana wa munhu, alalekejiwa; aliyo uyo ose unghaya kibi Moyo Ngʼwela, atalalekejiwa, nulu ngʼwikanza ili, nulu mu ilo lyahaya kwiza.

³³ Nulu bejagi nti gubize gwa wiza, na matwajo gago ga wiza; nulu bejagi nti gubize gwa bubi, na matwajo gago ga bubi; iki buli nti gumanika ku matwajo gago.

³⁴ Bingʼwe, kibyalilwe cha shipili, ngʼwadula kinahe kuhaya mihayo ya wiza, aho muli ba bubi? Iki mu iyo yokala mu ngholo, nomo gukwilungalungaga.

³⁵ Munhu wa wiza akufunyaga sha wiza kufuma mu bubiki wa wiza wa mu ngholo; na munhu wa bubi akufunyaga sha bubi kufuma mu bubiki wa bubi.

³⁶ Aliyo Nene namuwila giki, Mu lushiku lwa kulekanya nsango banhu balagufunya buli mhayo gwa dalali uyo bali bulungalunga.

³⁷ Iki kufuma mu mihayo yako ulabiza ntungiligijiwa, na kufuma mu mihayo yako ulalekanyiwa nsango.

Kimanikijo cha Yona

³⁸ Hunaho bandiki na Bafarisayo bamo bushosha buhaya giki, Nangi, tutogilwe kubona kimanikijo kuli Bebe.

³⁹ Aliyo ushosha ubawila giki, Kibyalilwe cha bubi na cha bushihya kilikoba kimanikijo, aliyo kitinhiwa kimanikijo ulu iti kimanikijo cha Nghangi Yona.

⁴⁰ Iki gitumo Yona wali ubiza ho malimi adatu na bujiku budatu mu nda ya ndilo nhale, giko na Ngʼwana wa munhu alabiza malimi adatu na bujiku budatu mugati ya si.

⁴¹ Banhu ba Nineve balimila ha lushiku lwa kulekanya nsango hamo na kibyalilwe iki, na balachenheleja kubona nsango; iki bali boya kulwa kulomela kwa ngʼwa Yona, na lolaga, ntale wa kutinda Yona ali ho aha.

⁴² Ntemi nkima wa dakama alimila ha lushiku lwa kulekanya nsango hamo na kibyalilwe iki, alachenheleja kubona nsango; iki akiza kufuma ku mhelo ja si igwe masala ga ngʼwa Solomoni; na lolaga, ntale wa kunkila Solomoni ali ho aha.

Kuleba ho kwa wibeleja

⁴³ Moyo nsoso aho gungʼwinga munhu, gubita mu mapande agati na minzi, gukobakoba ha kwifulila, gutubona.

⁴⁴ Hunaho guhaya giki, nakushoka mu numba yane iyo nali ninga mo; na aho gushika ko, guyisanga ili dalali, ipyagulile na igalilile.

⁴⁵ Hunaho guja gwenha mioyo yingi mpungati ya bubi kutinda goi, nayo yingila na yikala mo; nghalilo ya munhu ngʼwenuyo yubiza ya bubi kutinda u wandijo. Ilabiza chene na ku kibyalilwe iki cha bubi.

Ba ngʼwawe bunkoba Yesu

⁴⁶ Aho walatali ulungalunga na mabita, lolaga, nina na bana ba ngʼwawe bimila hanze, bukoba kulungalunga nanghwe.

⁴⁷ Munhu umo ungʼwila giki, Lolaga, noko na bana ba ngʼwingʼwe balimila hanze, balikoba kulungalunga na Bebe.

⁴⁸ Aliyo Wei unshokeja ngʼwenuyo wali wangʼwila, uhaya giki, Mayu ngʼwene nani? Na bana ba ngʼwiswe bene banani?

⁴⁹ Nanghwe utama nkono gwakwe ku bahemba bakwe, uhaya giki, Lolaga, Mayu na bana ba ngʼwiswe!

⁵⁰ Iki uyo ose akwitaga iyo atogilwe Baba ali ngʼwigulu, hu na ngʼwene ngʼwana wa ngʼwiswe, na ilumbu lyane, na mayu.