Matayo 11 - Ilagano Ipya Lya

Yesu unghaya Yohana Matija

¹ Na ikabiza giki, aho Yesu wali umala kubalagila bahemba bakwe ikumi na babili, winga ko uja kulanga na kulomela mu mizengo yabo.

² Yohana aho wali wigwa mu numba ya batungwa shitile sha ngʼwa Kristo, ubatuma bahemba bakwe babili.

³ Bungʼwila giki, U Bebe uli Ngʼwenuyo wahayiwa akwiza, himba tunindile ungi?

⁴ Yesu ushosha ubawila giki, Jagi, mukansombolele Yohana iyo ngʼwigwaga na iyo ngʼwibonaga:

⁵ Giki, baboku balinhwa kubona, na bachigiji balishiminza, ba mbiji balejiwa, bachibi ba matu baligwa, bafu balijuchiwa, na bahabi balilomelwa evangeli.

⁶ Ali wa lubango uyo atalipama muli Nene.

⁷ Benabo aho bakujaga, Yesu wandia kunghaya Yohana ku mabita giki, Ngʼwali ngʼuja mu bu kulola ki? Idete lyunegenyiwa na nyaga?

⁸ Aliyo ngʼwali ngʼuja kubona ki? Munhu agalililwe na shizwalo shifuku? Ambu, abazwalile shizwalo shifuku bali mu numba ja batemi.

⁹ Aliyo ngʼwali ngʼuja kubona ki? Ngʼwali ngʼuja kumona nghangi? Ali chene, namuwila giki, ankilile nghangi niyo no.

¹⁰ Hu na ngʼwene uyo yaandikwa ya kunghaya giki, Lolagi, nantuma ntungʼwa wane ku butongi wako, uyo alalibejabeja ipalapala lyako ku butongi wako.

¹¹ Nghana namuwila giki, Mu benabo abakabyalagwa na bakima atilongaga ntale kutinda Yohana Matija: aliyo nahene, u ndo mu butemi wa ngʼwigulu ankilile wei butale.

¹² Kufuma mu shiku ja Yohana Matija kushisha haha, butemi wa ngʼwigulu wingilwa na nguzu, nabo abita nguzu bubudima.

¹³ Iki bahangi bose na shilagilo bubyulanga kushisha kuli Yohana.

¹⁴ Na ulu bingʼwe mutogilwe kwanukula mhayo uyu, u Yohana hu na ngʼwene Eliya uyo wali uhaya kwiza.

¹⁵ Uyo ali na matu ga kwigwa, leka igwe.

¹⁶ I kibyalilwe iki nakubikolanija na ki? Chikolile na banigini abigashije mu nghungʼwano, bubitana bichabo.

¹⁷ Buhaya giki, Twamufulila mbilolo na bingʼwe kubina yaya; twamulilila nghungu na bingʼwe kupinihala yaya.

¹⁸ Iki Yohana akiza atulyaga nulu atungʼwaga, na bahaya giki, Ali na isamva.

¹⁹ Ngʼwana wa munhu akiza akulyaga na akungʼwaga, na bahaya giki, Lolaga, munhu ngʼwaka na ngʼwi wa minzi ga mizabibu, na nsumba ngʼwichabo wa batobisha na ba shibi! Na masala gatungiligijiwa na bana bago.

Mizengo idatu yuhayiwa nsango

²⁰ Hunaho akandia kuyiduka mizengo umo shali Shitwa shitile shakwe sha budula shingi, iki yali itoya.

²¹ Ulasangwa, bebe Korazini! Wasangwa, bebe Bethsaida! Iki ulu shitile sha budula isho shali Shitwa mu bingʼwe ni shali Shitwa mu Turo na Sidoni, ni bali boya kale mu magunila na mabu.

²² Aliyo namuwila giki, Ku Turo na Sidoni ilabiza hambuhambu mu lushiku lwa nsango, kutinda ku bingʼwe.

²³ Na bebe, Kapernaumu, uyo waagunguhiwa kushisha ngʼwigulu, uladohelejiwa kushisha kulimu: iki shitile sha budula isho shali Shitwa muli bebe ulu ni shali Shitwa mu Sodoma, ni yali yushinga ho kushisha lelo.

²⁴ Aliyo namuwila giki, Ku si ya Sodoma ilabiza hambuhambu mu lushiku lwa nsango, kutinda kuli bebe.

²⁵ Ngʼwikanza lyenilo Yesu ushosha, uhaya giki, Nakulumba Bebe, Baba, Seba wa igulu na si, iki ukababisila mihayo iyi a balalanghanu na ba masala na uyikundula ku banigini:

²⁶ Ali chene, Baba, iki giko yali yukutoga, mu miso gako.

²⁷ Yose niinhiwa na Baba; na ati ho uyo amanile Ngʼwana ulu ati Baba; hangi ati ho uyo amanile Baba ulu ati Ngʼwana, na uyo ose Ngʼwana atogilwe kunkundulila. Kitanilwe ka ku bufula

²⁸ Nzugwi kuli Nene, bingʼwe bose abakoyile na babunilwe miligo, na Nene nakungʼwifuja.

²⁹ Ngʼwituulile ikondejo lyane ngʼwilangage kuli Nene; iki Nene ndi mfula na ngʼwidohya mu ngholo; ningʼwe mukubona kwifula mu ngholo jingʼwe.

³⁰ Iki ikondejo lyane lyene inogu, na nigo gwane mbupu.