Matayo 10 - Ilagano Ipya Lya

Batungʼwa butungʼwa kulomela na kupija

¹ Na aho wali ubitana bahemba bakwe ikumi na babili, ubinha budula ku mioyo ya busoso kuyipeja, na kupija bulwile bose na bugokolo bose.

² Mina ga batungʼwa ikumi na babili gene aya: wa kwandia Simoni uyo akitanagwa Petro, na Andrea ngʼwana wa ngʼwawe; Yakobo ngʼwana wa ngʼwa Zebedayo, na Yohana ngʼwana wa ngʼwawe;

³ Filipo na Bartolomayo; Tomaso na Matayo u ntobisha; Yakobo ngʼwana wa ngʼwa Alfayo, na Lebayo uyo akitanagwa Thadayo;

⁴ Simoni muna Kanani, na Yuda Iskariota uyo wali ungʼwinha ko.

⁵ Aba ikumi na babili Yesu wali ubatuma, ubakomeleja uhaya giki, Mutizuja mu nzila ja bana mahanga, hangi mutizingila mu nzengo gose gwa Basamaria;

⁶ Aliyo jagi ku ngholo ijijimilile ja mu numba ya Israeli.

⁷ Aho mujile, lomelagi, hayagi giki, Butemi wa ngʼwigulu wegelaga.

⁸ Bapijagi balwile, bejagi ba mbiji, bajuchagi bafu, gapejagi masamva: ngʼwanukulaga sha dalali, na bingʼwe inhagi sha dalali.

⁹ Mutizubucha zahabu, nulu feza, nulu senti mu mishipi yingʼwe;

¹⁰ Nulu mhinda ya mu lugendo, nulu nghanjo ibili, nulu shilatu, nulu nanga: iki ntumami igelile kwinhiwa shiliwa shakwe.

¹¹ Buli nzengo gose na igunguli lyose umo ngʼwingila mo, gisilijagi ni nani ali mo uyo igelile kungʼwegeleja: na ikalagi ko kushisha mulinge.

¹² Aho ngʼwingila mu numba, muyigishe.

¹³ Na ulu numba igelelilwe, mhola yingʼwe ibize ku numba iyo; aliyo ulu bigelelilwe, mhola yingʼwe ishoke ku bingʼwe.

¹⁴ Na uyo ose atungʼwegeleja bingʼwe nulu kwigwa mihayo yingʼwe, aho ngʼwinga mo mu numba yeniyo nulu mu nzengo gwenuyo gunghumulagi lububu lwa ku mhambala jingʼwe.

¹⁵ Nghana namuwila giki, Ku si ya Sodoma na Gomora ilabiza hambuhambu mu lushiku lwa nsango kutinda ku nzengo gwenuyo.

¹⁶ Lolagi, Nene namutuma giti ngholo hagati ya mhuge; kulwa iyi mubize na masala giti nzoka, hangi mubize muti na buhwiganu giti nghuulu.

¹⁷ Aliyo ilanghanagi ku banhu, iki bakungʼwinha ko bingʼwe ku mabanza, na mu mabilingilo gabo bakumutula;

¹⁸ Ningʼwe mukutwalwa mu miso ga banangwa na batemi kulwa nguno yane, ibize bukaniji kubo na ku bana mahanga.

¹⁹ Aliyo aho bakungʼwinha ko, mutizikoyela giki, mukuhaya ki, nulu mukuhaya kinahe; iki ngʼwikanza ilo mukwinhiwa i ya kuhaya.

²⁰ Iki iti bingʼwe aba mukulungalunga, aliyo Moyo wa ngʼwa Singʼwe Uyo akulungalungaga mu bingʼwe.

²¹ Ngʼwana wa ngʼwabo akungʼwinha ko ngʼwana wa ngʼwabo kucha; na ise ngʼwana wakwe; na bana bakububukila babyaji babo, na bakubabulaja.

²² Na bingʼwe mukubiza bakumukolwa banhu bose kulwa nguno ya lina lyane; aliyo uyo akwiyumilija kushisha ku mhelo, alapijiwa.

²³ Aliyo aho bakumunyajanyaja mu nzengo gumo, pelelagi ku gungi, iki namuwila nghana giki, Mutalakwilikanya mizengo ya Israeli kushisha Ngʼwana wa munhu aho aliza.

²⁴ Nghemba atunkila nangi wakwe, nulu nsese atunkila ise bugonzo.

²⁵ Nghemba igelelilwe kubiza giti nangi wakwe na nsese giti ise bugonzo. Ulu bunghaya namugi giki, Beelzebuli, angu, iti kutinda no abo ba kaya yakwe?

²⁶ Kulwa iyo mutizubogoha iki guti ho mhayo gukundikigije uyo gutalakundulwa, nulu uyo gubisile ugutalamanika.

²⁷ Iyo namuwila mu giiti, ihayagi hape; na iyo mukwigwaga mu kutu, ilomelagi higulya ya numba.

²⁸ Mutizubogoha abubulaga mili aliyo batudula kubulaga bupanga; aliyo ngʼogohagi Uyo wadula kuyagaja mili na bupanga mu Gehena.

²⁹ Angu, nzwi ibili jitajinjiwagwa na senti imo? Aliyo nulu imo yajo itugwa ha si ulu Singʼwe atamanile:

³⁰ Aliyo nulu nzwili ja mitwe yingʼwe jibalilwe jose.

³¹ Kulwa iyo mutizogoha; bingʼwe mujikilile no nzwi ningi.

³² Uyo ose wanizunya na unitambula ku butongi wa banhu, na Nene nalantambula ku butongi wa ngʼwa Baba ali ngʼwigulu.

³³ Aliyo uyo ose akunilema ku butongi wa banhu, na Nene nalanema ku butongi wa ngʼwa Baba ali ngʼwigulu.

³⁴ Mutiziganika giki, Nali niza kutuula ho mhola mu si; natizile kutuula ho mhola aliyo lilushu.

³⁵ Iki nali niza kunekanya munhu na ise, na ngʼwana na nina, na ngʼwinga na ninabuko;

³⁶ Na banishi ba munhu balabiza a ba mu numba yakwe.

³⁷ Uyo antogilwe ise nulu nina kutinda Nene, atanigelelilwe; na uyo antogilwe ngʼwana ngosha nulu ngʼwana nkima kutinda Nene atanigelelilwe.

³⁸ Na uyo atusola nsalaba gwakwe na kunilondela, atanigelelilwe.

³⁹ Uyo ububona bupanga wakwe ngʼwene alabuyagaja; na uyo ubuyagaja bupanga wakwe kulwa nguno yane, alabubona.

⁴⁰ Uyo ungʼwegeleja bingʼwe, ngʼwene wanegeleja Nene, na uyo unegeleja Nene, ngʼwene wangʼwegeleja Uyo waanituma.

⁴¹ Uyo ungʼwegeleja nghangi mu lina lya nghangi, ngʼwene alanukula mhela ya nghangi; na uyo ungʼwegeleja munhu ntungilija mu lina lya ntungilija, ngʼwene alanukula mhela ya ntungilija.

⁴² Na uyo ose akungʼwisha umo wa banigini aba kikombe cha minzi manyilizu gwike mu lina lya nghemba, namuwila nghana giki, atalagayiwa mhela yakwe na hado yaya.