Matayo 1 - Ilagano Ipya Lya

Kibyalilwe cha ngʼwa Yesu Kristo

¹ Kitabo cha kibyalilwe cha ngʼwa Yesu Kristo, ngʼwana wa ngʼwa Daudi, ngʼwana wa ngʼwa Abrahamu.

² Abrahamu akamyala Isaaka; Isaaka umyala Yakobo; Yakobo umyala Yuda na bana ba ngʼwawe;

³ Yuda umyala Faresi na Zara muli Tamaru; Faresi umyala Esromu; Esromu umyala Aramu;

⁴ Aramu umyala Aminadabu; Aminadabu umyala Naasoni; Naasoni umyala Salmoni.

⁵ Salmoni umyala Boazi muli Rahabu; Boazi umyala Obedi muli Ruth; Obedi umyala Yese;

⁶ Yese umyala Ntemi Daudi. Ntemi Daudi umyala Solomoni muli uyo walali nke wa Uria;

⁷ Solomoni umyala Rehoboamu; Rehoboamu umyala Abia; Abia umyala Asa;

⁸ Asa umyala Yehoshafati; Yehoshafati umyala Yoramu; Yoramu umyala Uzia;

⁹ Uzia umyala Yothamu; Yothamu umyala Ahazi; Ahazi umyala Hezekia;

¹⁰ Hezekia umyala Manase; Manase umyala Amoni; Amoni umyala Yosia;

¹¹ Yosia umyala Yekonia na bana ba ngʼwawe mu shiku ja kusamiwa kuja Babuloni.

¹² Na hanuma ya kusamiwa kuja Babuloni, Yekonia umyala Shealtieli; Shealtieli umyala Zerubabeli;

¹³ Zerubabeli umyala Abihudi; Abihudi umyala Eliakimu; Eliakimu umyala Azori;

¹⁴ Azori umyala Sadoka; Sadoka umyala Ahimu; Ahimu umyala Eliuda;

¹⁵ Eliuda umyala Eleazari; Eleazari umyala Mathani; Mathani umyala Yakobo;

¹⁶ Yakobo umyala Yusufu u ngoshi wa ngʼwa Mariamu, muli nkima uyu akabyalwa Yesu, Uyo akitanagwa Kristo.

¹⁷ Giki i shibyalilwe shose kufuma kuli Abrahamu kushisha kuli Daudi, shibyalilwe ikumi na shine; na kufuma kuli Daudi kushisha kusamiwa kuja Babuloni, shibyalilwe ikumi na shine; na kufuma kusamiwa kuja Babuloni kushisha kuli Kristo, shibyalilwe ikumi na shine.

Kubyalwa kwa ngʼwa Yesu Kristo

¹⁸ Kubyalwa kwa ngʼwa Yesu Kristo kwali kuli giki, iki nina Mariamu wali walunjiwa na Yusufu, aho bali batali kusanja, ubonwa ali nda ya Moyo Ngʼwela.

¹⁹ Yusufu ngoshi wakwe iki ubiza ntungilija, na walatatogilwe kungola, widedekanya kuneka mu kwigeniha.

²⁰ Aho wali widedekanya mihayo iyi, lolaga, malaika wa Seba akangʼwilongela mu kiloti, ungʼwila giki, Yusufu ngʼwana wa ngʼwa Daudi, utizogoha kuntwala nke wako Mariamu: iki icho chatungwa mu nda yakwe cha ngʼwa Moyo chene chela.

²¹ Nanghwe alamyala ngʼwana ngosha, nangho ulangʼwilika lina lyakwe YESU: iki Wei alabapija banhu bakwe kufuma mu shibi shabo.

²² Iyo yose yali yitwa, gushikilijiwe uyo gwaahayiwa na Seba muli nghangi, giki,

²³ Lolaga, munhya ngʼwibembu alabucha nda, nanghwe alamyala ngʼwana ngosha, na balangʼwilika lina lyakwe Emanuel; mhayo uyu, kushomelejiwa kwaho kuli giki, Mulungu ali hamo na biswe.

²⁴ Yusufu aho wali umisha mu tulo, akita gitumo malaika wa Seba wanagilile, na untwala nke wakwe;

²⁵ Na walatamanile wei kushisha umyala ngʼwana wakwe wa kwandia ngosha; na akangʼwilika lina lyakwe YESU.