Maliko 9 - Ilagano Ipya Lya

Kuihindula kwa ngʼwa Yesu

¹ Nanghwe ubawila giki, Nghana namuwila giki, Bali ho bamo abimilile aha, abatalaloja kucha na hado, kushisha aho balamala kubona butemi wa Mulungu wizaga na budula.

² Hanuma ya shiku itandatu Yesu untwala Petro, na Yakobo, na Yohana, ubalinhya heke boi bike mu lugulu lulihu; nanghwe uhinduka mu miso gabo.

³ Na shizwalo shakwe shulabangila, shubiza shape no kutinda, giti snow; gitumo ati ho ngalili mu si uyo wadula kusheja giko.

⁴ Hunaho Eliya na Musa bubilongela balilungalunga na Yesu,

⁵ Na Petro ushosha ungʼwila Yesu giki, Rabbi, ya wiza biswe kubiza ho aha; tuzenge maduku adatu; limo lyako, na limo lya ngʼwa Musa, na limo lya ngʼwa Eliya.

⁶ Iki walatamanile mhayo gwa kuhaya, iki bali bogoha no.

⁷ Lyubiza ho ilunde lyubakundikija; ilaka lyufuma ngʼwilunde, lyuhaya giki, Uyu Ngʼwana wane ntogwa, ngʼwigwagi Wei.

⁸ Kuhayumanila, aho bilalangija, batumona munhu hangi, aliyo Yesu wike hamo nabo.

⁹ Aho bakwikaga mu lugulu, ubahana batizunsombolela munhu ose isho bali babona, kushisha Ngwana wa munhu aho alamalaga kujuka mu bafu.

¹⁰ Nabo bulinda mhayo uyu mubo bike, bibuja benekele na benekele, kujuka mu bafu kuli kinahe?

¹¹ Bumuja, buhaya gild, Ni buli bandiki bakuhayaga giki, Shingʼwigelile Eliya kwiza tame?

¹² Nanghwe ushosha, ubawila giki, Eliya hene izile tame, kudoganya yose; na hangi ubawila gitumo yaandikwa ya Ngʼwana wa munhu giki, akuluhiwa na mihayo mingi na kudalahwa.

¹³ Aliyo namuwila giki, Eliya wamalaga kwiza, nabo bali bungʼwitila gitumo bali batogilwe, gitumo waandikililwa.

Yesu umpija nyanda wa lusalo (Mt. 17.14-21; Lk. 9.37-43)

¹⁴ Na aho ushika ku bahemba bakwe ubona ibita itale libapindije, na bandiki bakwibugilijaga nabo.

¹⁵ Haho na haho banhu bose aho bumona, budedebala no, bupela kuli Wei, bungisha.

¹⁶ Nanghwe ubabuja giki, Mulibugilija nabo mhayo ki?

¹⁷ Na umo wa ngʼwibita ushosha, uhaya giki, Nangi, nakwenhelaga ngʼwana wane, ali na moyo gwa kimumu.

¹⁸ Na hose hose uko gundima, guntalicha; nanghwe ufuluta ifulo, ushelanya mino, unogoleka; na nene nubawila bahemba bako bagupeje; nabo bugayiwa nguzu.

¹⁹ Nanghwe unshokeja uhaya giki, Bingʼwe kibyalilwe ikituzunyaga, nakwikala na bingʼwe kushisha nanali? na hangi nakwiyumilija na bingʼwe kushisha nanali? ngʼwenhagi hali Nene.

²⁰ Nabo bungʼwenha kuli Wei: aho umona, haho na haho moyo gumfilinghanya, nanghwe ugwa ha si, ugalagala, ufuluta ifulo.

²¹ Umuja ise giki, Mhayo uyu gwandimile kufuma ikanza ki? Ungʼwila giki, Kufuma bunigini.

²² Na nghangala ningi gukangwishaga mu moto na mu minzi, gunyagaje; aliyo ulu Bebe wadula kwita mhayo gose, utusatwe, utugunane.

²³ Aliyo Yesu ungʼwila giki, Ulu wadula kuzunya, yose yadulika kuli uyo alizunya.

²⁴ Haho na haho ise wa ngʼwana ulila na ilaka, na shisoji, uhaya giki, Nazunya, Seba; unigune mu butuzunya wane.

²⁵ Yesu aho ubona banhu bakupelaga bisumbila, ugulemeja moyo nsoso, uguwila giki, Bebe, moyo gwa kimumu na nchibi gwa matu, nakulagila ungʼwinge ho, utalizunshokela hangi.

²⁶ Aho guhamuka, na gumfilinghanya no gungʼwinga; na ngʼwana ubiza giti achile, kushisha nose bingi buhaya giki, Wachaga.

²⁷ Aliyo Yesu undima ha nkono na umucha, nanghwe ubuka.

²⁸ Aho wali wingila mu numba, bahemba bakwe bumuja mu kwigeniha giki, Ni buli a biswe twali tutudula kugupeja?

²⁹ Nanghwe ubawila giki, Mbika iyi itudula kwinga kulwa mhayo gose ulu iti kulwa kulomba na kudila nzala.

Yesu ukuhanga kucha na kujuka kwakwe

³⁰ Nabo binga ko, bubita mu Galilaya; nanghwe walatatogilwe munhu ose kumana mhayo uyu.

³¹ Iki ubyubalanga bahemba bakwe, ubawila giki, Ngʼwana wa munhu winhiwa ko mu makono ga banhu, nabo bakumulaga; na aho akumala kubulagwa, hanuma ya shiku idatu akujuka.

³² Aliyo boi bali batitegeleja mhayo uyu, na bogoha kumuja.

Ntale mu butemi wa ngʼwigulu

³³ Nanghwe ushika Kapernaumu; na aho ubiza mu numba ubabuja giki, Ngʼwali ngʼwihalalija mhayo ki mu nzila?

³⁴ Aliyo bufulika du; iki mu nzila bali bihalalija benekele na benekele giki, U ntale ni nani?

³⁵ Nanghwe wigasha, ubitana ikumi na babili, ubawila giki, Munhu ose uyo atogilwe kubiza wa kwandia, alabiza wa kunuma ya bose, na ngʼwinhilija wa bose.

³⁶ Huna undima ngʼwana nigini, untuula hagati yabo; na aho unela mu makono gakwe, ubawila giki,

³⁷ Uyo ose ungʼwanukula umo wa bana banigini giti uyu mu lina lyane, wananukula Nene, na uyo ose wananukula Nene, atunanukula Nene, aliyo ungʼwanukula Uyo waanituma.

³⁸ Yohana ushosha, ungʼwila giki, Nangi, tukamona munhu alipeja masamva mu lina lyako, nanghwe atulondelaga; na biswe tunemeja, iki atulondelaga.

³⁹ Aliyo Yesu uhaya giki, Mutanemejage; iki ati ho munhu uyo akwita chitile cha budula mu lina lyane uwadula kunihaya kibi wangu wangu.

⁴⁰ Iki uyo ati ngʼwanishi wiswe, ngʼwenuyo ali ku lwande lwiswe.

⁴¹ Iki munhu ose uyo akungʼwinha mungʼwe kikombe cha minzi mu lina lyane, iki muli ba ngʼwa Kristo, nghana namuwila giki, uyo atalagayiwa mhela yakwe.

Kwihiga kwa kwipamya

⁴² Na uyo ose ungʼwipamya umo wa bado aba abanizunya Nene, ngʼwenuyo ili hambuhambu kuli wei ulu utungwa iwe itale lya kushela mu nhingo yakwe, na kuponyiwa mu nyanza.

⁴³ Na nkono gwako ulu gukwipamya gubute ho; ili hambuhambu kuli bebe kwingila mu bupanga uli nema wa nkono, kutinda kwikala uli na makono abili, na kuja mu Gehena, u mu moto ugutajimaga:

⁴⁴ Uko igino lyabo litucha na moto gutujima:

⁴⁵ Na kugulu gwako ulu gukwipamya gubute ho; ili ya wiza kuli bebe kwingila mu bupanga, uli nema wa kugulu, kutinda kwikala uli na magulu abili, na kuponyiwa mu Gehena, u mu moto ugutajimaga:

⁴⁶ Uko igino lyabo litucha na moto gutujima.

⁴⁷ Na liso lyako ulu lyukwipamya ulikobole; ili ya wiza kuli bebe kwingila mu butemi wa Mulungu uli na liso limo duhu, kutinda kwikala uli na miso abili na kuponyiwa mu Gehena ya moto;

⁴⁸ Uko igino lyabo litucha na moto gutujima.

⁴⁹ Iki buli munhu alanoniwa na moto, na buli kitambo kilanoniwa na munu.

⁵⁰ Munu guli gwa wiza, aliyo ulu munu gusuka mukugunonya na ki? Bizagi na munu mugati yingʼwe ngʼwikale mu mhola benekele na benekele.