Maliko 6 - Ilagano Ipya Lya

Yesu ulengʼwa mu si ya ngʼwabo

¹ Na wali winga ko, ushika mu si ya ngʼwabo; na bahemba bakwe bunondela.

² Aho Sabato yushika, wandia kulanga ngʼwibilingilo; na bingi aho bundegeleka, bukumya, buhaya giki, Munhu Uyu wafunije hali mihayo iyi? na masala ki aya winhiwa, iki na shitile sha budula ishi shikwitagwa na makono gakwe?

³ Angu, Uyu ati mpunzi, ngʼwana wa ngʼwa Mariamu, na ngʼwana wa ngʼwabo wa Yakobo, na Yose, na Yuda, na Simoni? na balumbuye, angu, bati kunu ku biswe? nabo bipama muli Wei.

⁴ Aliyo Yesu ubawila giki, Nghangi atugayiwa ikujo, ulu iti mu si ya ngʼwabo, na mu ludugu lwakwe, na mu kaya yakwe.

⁵ Na kwenuko walatudula kwita chitile cha budula nulu kimo yaya, ulu iti kubatuulila balwile bagehu makono gakwe, na kubapija.

⁶ Nanghwe ukumya kulwa butuzunya wabo. Upindilapindila mu mizengo, ubyubalanga.

Batungʼwa butungʼwa kulomela na kupija

⁷ Na wali ubitana kuli Wei benabo ikumi na babili, wandia kubatuma babili babili, ubinha budula higulya ya mioyo misoso;

⁸ Ubalagila batizutwala kinhu cha lugendo, ulu guti nanga gwike; nulu mhinda, nulu shiliwa, nulu senti mu nkoba yaya;

⁹ Aliyo bazwalile shilatu; na Mutizuzwala nghanjo ibili.

¹⁰ Ubawila giki, Hose hose uko ngʼwingila mo mu numba, ikalagi mo kushisha ngʼwinga ko.

¹¹ Na banhu bose abatungʼwegeleja nulu kungʼwigwa bingʼwe, aho ngʼwinga ko, komagulagi lububu ululi hasilili ya mhambala jingʼwe, ibize bukaniji kubo. Nghana namuwila giki, Ku ba Sodoma na ba Gomora ilabiza hambuhambu mu lushiku lwa nsango kutinda nzengo gwenuyo.

¹² Nabo bubuka buja, bubyulomela giki, banhu boye.

¹³ Bugapeja masamva mingi, bubabila maguta ga zeituni balwile bingi na bubapija.

Kabulagilwe ka ngʼwa Yohana Matija

¹⁴ Na Ntemi Herode wali wigwa iyo; iki lina lyakwe lyali lyukumuka: nanghwe uhaya giki, Yohana Matija wajukaga mu bafu, na kulwa iyi shitile sha budula shikwitaga muli wei.

¹⁵ Bangi buhaya giki, Ali Eliya, na bangi giki, Ali nghangi, nulu giti umo wa bahangi.

¹⁶ Aliyo Herode, aho wigwa iyi, uhaya giki, Uyu ngʼwene Yohana, uyo nali numuta ntwe; wajukaga mu bafu.

¹⁷ Iki Herode ngʼwenekele wali wafuma kundima Yohana, umfunga mu jela, kulwa nguno ya Herodia, nke wa ngʼwana wa ngʼwawe, Filipo: iki untola.

¹⁸ Iki Yohana akangʼwila Herode giki, Ilemegije bebe kubiza na nke wa ngʼwana wa ngʼwingʼwe.

¹⁹ Aliyo Herodia untungila nhungi, walatogilwe kumulaga, aliyo walatudula:

²⁰ Iki Herode wali ungʼogoha Yohana, walamanile giki, ali ntungilija na ngʼwela; na uninda chiza; na aho undegeleka, wali wita mihayo mingi; ubyundegeleka na kuyega.

²¹ Na aho lushiku lwitonga lwa wiza, aho Herode, ha lushiku lwa kubyalwa kwakwe, ubazugila sha buhondo a banangʼoma, na batale ba bulugu, na banangwa ba Galilaya;

²² Aho ngʼwana wa ngʼwenuyo Herodia akingila, ubina, unyeja Herode na benabo abigashije ku shiliwa hamo nanghwe; huna ntemi ungʼwila ngʼwaniki, Nilombage chose chose icho utogilwe, na nene nakukusamba.

²³ Nanghwe ungʼwilahilila, uhaya giki, Chose chose icho ulanilombe nakukusamba, nulu kushisha imo ya ngʼwibili ya butemi wane.

²⁴ Ufuma ungʼwila nina giki, Nalombe ki? Uhaya giki, Ntwe gwa ngʼwa Yohana Matija.

²⁵ Haho na haho wingila wangu kuli ntemi, unomba, uhaya giki, Natogilwe unisambe hahiyi mu lulangahe u ntwe gwa ngʼwa Yohana Matija.

²⁶ Na ntemi upinihala no; aliyo kulwa shilahilo shakwe, na kulwa benabo abigashije ku shiliwa hamo nanghwe, walatatogilwe kunemeja.

²⁷ Haho na haho ntemi untuma munikulu umo, ulagila kwenhwa ntwe gwakwe;

²⁸ Nanghwe uja umuta ntwe mu jela, wenha ntwe gwakwe mu lulangahe, ungʼwinha ngʼwaniki, na ngʼwaniki ungʼwinha nina.

²⁹ Bahemba bakwe aho bigwa iyi, biza, bugutwala mimba gwakwe, na bugulaja mu kigila cha mawe.

Batungʼwa bufumila kulomela

³⁰ Na batungʼwa bibilingila hali Yesu; bungʼwila yose iyo bali bita na iyo butonga.

³¹ Nanghwe ubawila giki, Nzugwi bingʼwe, ngʼwisunde kwipande iliti na banhu, ngʼwifule hado. Iki bali bubiza bingi abakwizaga na bakujaga kushisha boi bali batubiza na ngʼwanya nulu gwa kulya.

Banhu 5,000 bulishiwa

³² Nabo buja mu lyato bisunda heke kwipande iliti na banhu.

³³ Na banhu bubabona bajile, bingi bumana Wei, bupelela uko kihamo mu nzila ya magulu kufuma mu mizengo yose, bubatangila, bungʼwibilingila.

³⁴ Aho Yesu winga mu lyato, ulibona ibita itale, ubasatwa, iki bali bali giti ngholo ijiti na ndimi; wandia kubalanga mihayo mingi.

³⁵ Hunaho yubiza mhindi, bahemba bakwe bungʼwegela, buhaya giki, Ipande ili liti na banhu, na haha ili mhindi;

³⁶ Balagage, baje mu magunguli na mizengo ibimbikanilwe kunu, bakigulile migati, iki bati nasho sha kulya.

³⁷ Aliyo ushosha, ubawila giki, Binhagi bingʼwe sha kulya. Nabo bungʼwila giki, Himba tuje, tukagule migati ya shilingi magana abili, tubinhe balye?

³⁸ Aliyo ubawila giki, Muli nayo migati yinga? Jagi makalole. Aho bumana, buhaya giki, Itano, na ndilo ibili.

³⁹ Ubalagila babigashe bose magele magele ha maswa managana.

⁴⁰ Bigasha bihelile, igana-igana, na makumi atano-tano.

⁴¹ Nanghwe wanukula migati iyo itano na ndilo ijo ibili, ulangamila miso kwigulu, ushisungulila lubango, umeganya migati, ubinha bahemba, bayitenge ku butongi wabo; na ndilo ibili ubagabulila bose.

⁴² Bulya bose, biguta.

⁴³ Bukuminga masajiwa masonzo ikumi na abili agokala, na ga ndilo.

⁴⁴ Na benabo abali bulya migati iyo bali bali bagosha giti 5,000.

Yesu ushiminza higulya ya nyanza

⁴⁵ Haho na haho ubahadikija bahemba bakwe kwingila mu lyato, batonge ku nkilo kushika Bethsaida, kushisha Wei alamale kwilaga na ibita.

⁴⁶ Aho wamala kwilaga nabo, uja mu lugulu kulomba.

⁴⁷ Aho yali ili mhindi, lyato lyali lili mu bujiba wa nyanza, nanghwe walali wiyene ku si.

⁴⁸ Ubabona balikoyakoya kufuga, iki nyaga gwali gubafumila ku butongi; mu bulindi wa kane wa bujiku, uja kubo, akushiminzaga higulya ya nyanza; wali wenda kubabitila.

⁴⁹ Aliyo aho bumona akushiminzaga higulya ya nyanza, biganika giki, lili linghangi, nabo buhamuka,

⁵⁰ Iki bose bakamona na biganilija. Haho na haho ulungalunga nabo, ubawila giki, Timbyagi ngholo, ambu, ndi Nene, mutogohage.

⁵¹ Huna wingila mu lyato umo bali bali, na nyaga gulembela; budedebala niyo kutinda na bukumya;

⁵² Iki bali batidedekanya ya migati, aliyo ngholo jabo jali juganghanajiwa.

Yesu upija basatu mu si ya Genesareti

⁵³ Aho bali bukila, bushika ku si ya Genesareti, bukola ha ngʼwalo.

⁵⁴ Aho binga mu lyato, haho na haho bumana,

⁵⁵ Bupela butangʼanhya si yose yeniyo ibimbikanilwe, bandia kubabukija balwile ha bulili, bubyuja uko bakungʼwigwaga giki, ali ho.

⁵⁶ Na hose hose uko ubyingila mu magunguli, nulu mu mizengo, nulu mu chalo, bubyubalaja abasatile mu nghungʼwano, bungʼwikumbilija abazunilije bakuumye nulu kwikigijo lya kizwalo chakwe; nabo bose abali bunkuumya ko bupijiwa.