Maliko 3 - Ilagano Ipya Lya

Munhu wa nkono gumile upijiwa ha Sabato

¹ Huna wingila hangi ngʼwibilingilo; na walali mo munhu ali na nkono gumile.

² Nabo bunola ulu alampije ha Sabato, babonele ho mhayo gwa kumula.

³ Nanghwe ungʼwila munhu ali na nkono gumile giki, Imilaga hagati.

⁴ Na ubawila giki, Igelile kwita ya wiza ha Sabato, nulu kwita ya bubi? kupija munhu nulu kubulaga? Aliyo boi buhumula.

⁵ Nanghwe ubilalangija na bupelanu, apinihalile kulwa buganghanazu wa ngholo jabo, huna ungʼwila munhu uyo giki, Tamaga nkono gwako. Ugutama, na nkono gwakwe gubiza mpanga giti u gungi.

⁶ Aho Bafarisayo bufuma, haho na haho bulomana na Baherode gitumo bakunyagaja.

Basatu bingi bupijiwa

⁷ Aliyo Yesu winga ko uja hamo na bahemba bakwe ku nyanza, na buhi butale bunondela kufuma mu Galilaya, na mu Buyudaya,

⁸ Na mu Yerusalemi, na mu Idumaya, na kufuma ku nkilo gwa Yordani, na kufuma mapande ga Turo na Sidoni, buhi butale; aho bali bigwa mihayo mitale iyo akwitaga, biza kuli Wei.

⁹ Ubawila bahemba bakwe giki, lyato linindile kulwa nguno ya ibita, litizunshiteleja.

¹⁰ Iki wali ubapija bingi; kushisha nose abo abali bali na mabulwile bungʼwibupa, bukoba kunkuumya.

¹¹ Na mioyo misoso aho yumona, yugwila ku butongi wakwe, yuhamuka, yuhaya giki, Bebe uli Ngʼwana wa Mulungu.

¹² Nanghwe uyilemeja no no no, itizungʼwelecha hape.

Yesu ubakoma batungʼwa

¹³ Hunaho ulinha mu lugulu, ubitana kuli Wei abo walabatogilwe Ngʼwenekele, nabo biza kuli Wei.

¹⁴ Ubatuula ho ikumi na babili kubiza hamo nanghwe, hangi giki, abatume kulomela.

¹⁵ Na hangi babize na budula wa kupija bulwile bose, na kupeja masamva.

¹⁶ Na ungʼwilika Simoni lina giki, Petro;

¹⁷ Na Yakobo ngʼwana wa ngʼwa Zebedayo, na Yohana ngʼwana wa ngʼwawe wa Yakobo, nabo ubilika mina giki, Boanerge, makulu gaho giki, bana ba kuluma kwa mbula;

¹⁸ Na Andrea, na Filipo, na Bartolomayo, na Matayo, na Tomaso, na Yakobo ngʼwana wa ngʼwa Alfayo, na Thadayo, na Simoni muna Kanani,

¹⁹ Na Yuda Iskariota uyo wali ungʼwinha ko. Huna bali bingila mu numba:

²⁰ Na ibita libilinga hangi kushisha nose bali batudula nulu kulya migati.

²¹ Na aho bakwe bigwa iyo, bufuma bandime; iki buhaya giki, Masala gakwe gangaya.

Kibi cha kunduka Moyo Ngʼwela

²² Na bandiki abali butulumenha kufuma Yerusalemi buhaya giki, Ali na Beelzebuli; na hangi giki, Akupejaga masamva mu budula wa ntale wa masamva.

²³ Nanghwe ubitana kuli Wei, ubawila mu shigemenghejo giki, Shetani wadula kinahe kumpeja Shetani?

²⁴ Kangi butemi ulu wilekanya wenekele na wenekele, butemi wenubu butudula kwimila.

²⁵ Na numba ulu yilekanya yenekele na yenekele, numba yeniyo itudula kwimila.

²⁶ Na Shetani ulu wiyubukila ngʼwenekele na kwilekanya ngʼwenekele, atudula kwimila, aliyo ali na nghalilo.

²⁷ Ati ho munhu uyo wadula kwingila mu numba ya munhu wa nguzu, na kusonza shikolo shakwe, ulu atandije tame kuntunga uyo wa nguzu, hunaho akusonza numba yakwe.

²⁸ Nghana namuwila giki, Banhu balalekejiwa shibi shose na buduki bose ubo bakudukagulaga:

²⁹ Aliyo uyo ose akundukagulaga Moyo Ngʼwela atubona kulekejiwa welelo bose, aliyo wigelelilwe nsango gwa welelo na welelo:

³⁰ Iki bali buhaya giki, Ali na moyo gwa busoso.

Ba ngʼwawe bunkoba Yesu

³¹ Hunaho biza nina na bana ba ngʼwawe; bimila hanze, butuma kuli Wei wa kungʼwitana.

³² Na ibita lyali ligashije limpindije, nabo bungʼwila giki, Lolaga, u noko na bana ba ngʼwingʼwe bali hanze, balikukoba.

³³ Nanghwe ubashokeja, uhaya giki, Mayu ni nani nulu bana ba ngʼwiswe ni banani?

³⁴ Nanghwe ubilalangija abigashije bampindije, uhaya giki, Lolagi, Mayu na bana ba ngʼwiswe.

³⁵ Iki munhu ose uyo akwita iyo Mulungu atogilwe, ngʼwenuyo ali ngʼwana wa ngʼwiswe, na ilumbu lyane, na mayu.