Maliko 14 - Ilagano Ipya Lya

Bulomane wa kumulaga Yesu

¹ Hanuma ya shiku ibili yubiza ho Pasaka, na shiku ja migati iyiti na kibimbya; na bagabiji batale na bandiki bukoba nzila ya kundima mu masalasala, bamulage.

² Aliyo bali buhaya giki, Ha lushiku lwa Pasaka yaya, butizubiza ho buyombo mu banhu.

Yesu witilwa maguta mu Bethania

³ Na aho walali mu Bethania mu numba ya ngʼwa Simoni wa mbiji, aho igashije ku shiliwa, nkima wiza, ali na chupa yabejiwa ya alabastro ya maguta ga ngazu mela ga mpango ngʼwingi, ugasamija ha ntwe gwakwe.

⁴ Aliyo bali bubiza ho bamo bukolwa mu mioyo yabo, buhaya giki, Kujimija uku kwa maguta ga ngazu kwabiza ho ni buli?

⁵ Iki maguta aya ni gali gudula kujinjiwa shilingi magana adatu na kutinda ho; na kwinhiwa bahabi. Nabo bundugumila.

⁶ Aliyo Yesu uhaya giki, Nekagi; mulinkoyakoyela nguno ki? Wei wanitilaga chitwa cha wiza.

⁷ Iki bahabi muli nabo shiku jose, na buli ikanza lyose ulu mutogilwe ngʼwadula kubitila ya wiza; aliyo Nene mutubiza na Nene shiku jose.

⁸ Wei witaga gitumo adulile; watongaga kugubila mili gwane kulwa kugungʼwa kwane.

⁹ Nghana namuwila giki, Hose hose uko evangeli iyi ilalomelwa ku si jose, icho witaga nkima uyu nacho kilahayiwa cha kungʼwizukwa wei.

Yuda Iskariota ungʼwijomboka Yesu

¹⁰ Hunaho Yuda Iskariota, umo wa benabo ikumi na babili, uja ku bagabiji batale angʼwinhe ko kubo.

¹¹ Nabo aho bigwa, buyega, bungʼwisagija kungʼwinha feza. Nanghwe lulu ukoba ngʼwanya gitumo angʼwinhe ko kubo.

Kulonjiwa kwa Pasaka

¹² Na ha lushiku lwa kwandia lwa migati iyiti na kibimbya, aho buyitambila Pasaka, bahemba bakwe buhaya giki, Utogilwe tuje hali tukakulongeje ha kulila Pasaka?

¹³ Nanghwe utuma babili ba mu bahemba bakwe, ubawila giki, Jagi mu nzengo, akumanhya na bingʼwe ngosha uyo abukije luno lwa minzi, munondele;

¹⁴ Na ngʼwenumo alingile, mungʼwile namugi giki, Nangi wahaya giki, Kili hali chumba cha ngeni umo nakulila mo Pasaka kihamo na bahemba bane?

¹⁵ Nanghwe akungʼolekeja chumba kitale cha mu gorofa chabejabejiwa kimalilile, ngʼwenumo mukatulongeje.

¹⁶ Na bahemba bakwe buja lulu, bingila mu nzengo, busanga gitumo wabawilila, nabo bulonja Pasaka.

Pasaka ya kumalija

¹⁷ Aho yubiza mhindi wiza nabo ikumi na babili.

¹⁸ Aho bigashije bakulyaga, Yesu uhaya giki, Nghana namuwila giki, Umo wa mu bingʼwe, uyo alilya hamo na Nene akuninha ko.

¹⁹ Nabo bandia kupinihala na kuhaya kuli Wei umo umo giki, Himba nene? Na ungi giki, Himba nene?

²⁰ Nanghwe ushosha ubawila giki, Umo wa mu bingʼwe ikumi na babili, uyo alikoja na Nene mu lubiga, huna ngʼwene.

²¹ Hene Ngʼwana wa munhu ajile gitumo yaandikwa ya kuli Wei; aliyo wasangwa munhu uyo Ngʼwana wa munhu winhiwa ko nanghwe; ni yali chiza kuli wei, ulu munhu ngʼwenuyo ni walatabyalilwe.

Yesu utuula ho kusangila kwela

²² Aho bakulyaga Yesu usola ngati, na aho wamala kugusungulila lubango ugumeganya na ubinha, uhaya giki, Anukulagi, lyagi; uyu gwene mili gwane.

²³ Na usola kikombe, na aho wamala kulumba, ubinha, nabo bungʼwela mo bose.

²⁴ Ubawila giki, Aya gali mininga gane a ga ilagano ipya agasejiwa kulwa bingi.

²⁵ Nghana namuwila giki, Natalangʼwa hangi ku matwajo ga nzabibu kushisha ku lushiku ulo aho nalangʼwa mapya mu butemi wa Mulungu.

²⁶ Aho bali bumala kwimba, bufuma buja ku lugulu lwa Mizeituni.

Yesu uhanga giki, Petro akunema

²⁷ Huna Yesu ubawila giki, Mukwipama bose kulwa nguno yane bujiku ubu, iki gwaandikwa giki, Nalantula ndimi, na ngholo jilasalanghanyiwa.

²⁸ Aliyo hanuma ya kujuka kwane, nakutonga kuja Galilaya.

²⁹ Aliyo Petro ungʼwila giki, Nulu bose bakwipama, aliyo nene yaya.

³⁰ Yesu ungʼwila giki, Nghana nakuwila giki, Lelo mu bujiku ubu, aho nghungulume itinahila nghangala ibili, ukunilema nghangala idatu.

³¹ Aliyo wei wigambila kuhaya giki, Nene nulu shinigelile kucha hamo na Bebe, nahene kulema natukulema. Nabo bose buhaya giko.

Yesu ulomba mu Gethsemane

³² Nabo bushika kwipande ilitanwa Gethsemane, ubawila bahemba bakwe giki, Igashagi henaha, kushisha Nene nalombe.

³³ Untwala Petro na Yakobo na Yohana hamo nanghwe; wandia kudedebala na kudidohelwa no.

³⁴ Ubawila giki, Bupanga wane bupinihalile hihi kucha, ikalagi aha, ngʼwikale miso.

³⁵ Nanghwe usegenela hado, ugwa ha si, ulomba ulu yudulika ikanza ili limitile ho.

³⁶ Uhaya giki, Abba Baba, yose yadulika kuli Bebe, uningije kikombe iki; aliyo iti iyo natogilwe Nene, aliyo iyo utogilwe Bebe.

³⁷ Ushoka lulu, ubasanga bashutulile, ungʼwila Petro giki, Simoni, ushutulile? walemelwa kwikala miso nulu saa imo?

³⁸ Ikalagi miso na kulomba, mutizingila mu kugengʼwa; moyo hene gukalalilwe, aliyo mili gwene nogoleku.

³⁹ Uja ko hangi, ulomba, uhaya mihayo yeniyo duhu.

⁴⁰ Aho ushoka hangi, ubasanga bashutulile hangi, iki miso gabo gali gudidoha; nabo bali batumana mhayo gwa kunshokeja.

⁴¹ Wiza na lukangala lwa kadatu, ubawila giki, Shutulagi lulu, ngʼwifule. Yigelaga; ikanza lyashikaga, Ngʼwana wa munhu winhiwa ko mu makono ga hali na shibi.

⁴² Bukagi tuje; lolagi, uyo alininha ko wegelaga.

Yuda ushika na ibita kundima Yesu

⁴³ Aho walatali ulungalunga, haho na haho Yuda, umo wa ikumi na babili, wegela na ibita itale hamo nanghwe, bali na malushu na milanga, bafumilile ku bagabiji batale na bandiki na banamhala.

⁴⁴ Uyo alingʼwinha ko wali wabinha kimanikijo, uhaya giki, Uyo nalambipe huna Ngʼwene, ndimagi, muntwale muninde gete.

⁴⁵ Nanghwe aho ushika, haho na haho uja hali Wei, uhaya giki, Rabbi, Rabbi; huna umbipa no.

⁴⁶ Nabo bunghaja na makono gabo, bundima.

⁴⁷ Aliyo umo wa benabo abimilile ho usopola lilushu, untema nsese wa ngabiji ntale, umuta kutu.

⁴⁸ Yesu ushosha ubawila giki, Ngʼwizaga na malushu na milanga kunidima giti ndi nsambo?

⁴⁹ Shiku jose nali ndi hamo na bingʼwe mu hekalu naalangaga, ningʼwe ngʼwali mutunidima: aliyo iyi yitwa Shandikwa shishikilijiwe.

⁵⁰ Hunaho bunekanya, bupela bose.

⁵¹ Na nsumba umo unondela wali wigumilile ngʼwenda gwa kitani ku mili; ngʼwenuyu basumba bundima;

⁵² Aliyo wei ubalekela ngʼwenda gwa kitani, ubapela ali duuhu.

Yesu ngʼwibanza lya ngabiji ntale

⁵³ Nabo buntwala Yesu kuli ngabiji ntale; bungʼwibilingila bagabiji batale bose na banamhala na bandiki.

⁵⁴ Na Petro unondela kakule ho kushisha mu kibuga cha ngabiji ntale; nanghwe wali wigashije hamo na banikulu, ubyota moto.

⁵⁵ Bagabiji batale na ba ngʼwibanza bose bunkomela Yesu bukaniji wa kumulagila; aliyo bali batubona.

⁵⁶ Iki bingi bali bunkanila ya bumama, aliyo bukaniji wabo wali butulenganila.

⁵⁷ Na bangi bimila ho bunkanila ya bumama, buhaya giki,

⁵⁸ Biswe twali tungʼwigwa Uyu akuhayaga giki, Nene nakuyikandula hekalu iyi iyali yubejiwa na makono, na mu shiku idatu nakuyizenga yingi kubejiwa na makono.

⁵⁹ Nulu mu yeniyi bukaniji wabo wali butulenganila.

⁶⁰ Na ngabiji ntale wimila hagati umuja Yesu, uhaya giki, Bebe utushoshaga mhayo? Aba balikukanila ki?

⁶¹ Aliyo Wei uhumula du, atushoshaga mhayo. Ngabiji ntale umuja hangi, uhaya giki, Angu, Bebe uli Kristo, Ngʼwana wa Ngʼwenuyo ngʼwenekele lubango?

⁶² Yesu uhaya giki, Nene ndi Ngʼwene; na bingʼwe mulamona Ngʼwana wa munhu igashije ku nkono gwa bulyo gwa budula, hangi izile hamo na malunde ga ngʼwigulu.

⁶³ Hunaho ngabiji ntale utandula shizwalo shakwe, uhaya giki, Tuli na nimo ki hangi na bakaniji?

⁶⁴ Ambu ngʼwigwaga buduki wakwe: Ngʼwabona kinahe? Nabo bose bunekanya giki, Wei wigelelagwa kucha.

⁶⁵ Hunaho bamo bandia kunswila mate, na kunkumbanija ku bushu, na kunkunduga shingholoshi, na kungʼwila giki, Manijaga; na banikulu bumpala mhi.

Petro unema Seba

⁶⁶ Na Petro aho walali mu kibuga hasilili, wiza umo wa mu batumami baniki ba ngabiji ntale;

⁶⁷ Aho umona Petro akotaga moto, unkalalila, uhaya giki, Bebe nangho wali hamo na Yesu, muna Nazareti.

⁶⁸ Aliyo wei ulema, uhaya giki, Natamanile nulu natitegeleja iyi ulihaya. Huna lulu winga ko uja hanze ngʼwibindo; na nghungulume yuhila.

⁶⁹ Na ngʼwaniki ngʼwenuyu umona hangi, wandia kubawila abimilile ho giki, Uyu ngʼwichabo.

⁷⁰ Aliyo wei ulema hangi. Hanuma ya kakanza hangi abimilile bungʼwila Petro giki, Nghana bebe uli ngʼwichabo; iki uli muna Galilaya, hangi kalungalungile kako kalenganilile na ka Kigalilaya.

⁷¹ Aliyo wei wandia kuzuma na kulahila giki, Natamanile munhu uyo mulinghaya.

⁷² Haho na haho nghungulume yuhila lukangala lwa kabili. Na Petro wizukwa mhayo uyo Yesu wali wangʼwila giki, Nghungulume aho itali kuhila nghangala ibili, ukunilema nghangala idatu. Na aho wiganika mhayo uyu, ulila shisoji.