Maliko 10 - Ilagano Ipya Lya

Kwilekanya mu butoji gitumo kuli

¹ Nanghwe winga uko, ushika mu mimbi ja Buyudaya ku nkilo gwa Yordani, na banhu bingi bali bungʼwibilingila hangi; na gitumo wita na kale, ubalanga hangi.

² Na Bafarisayo biza kuli Wei, bumuja giki, Angu, shilagilo shunzunilija munhu kumpeja nke wakwe? Buhaya giko kungema.

³ Nanghwe ushosha, ubawila giki, Musa waamulagila kinahe?

⁴ Buhaya giki, Musa wali uzunilija kwandika nyaluba ya kulekana, na kumpeja.

⁵ Yesu ushosha, ubawila giki, Kulwa buganghanazu wa ngholo jingʼwe waangʼwandikila kilagilo cheniki.

⁶ Aliyo kufuma kwandia kwa kusengʼwa kwa si Mulungu akababumba munhu ngosha na munhu nkima.

⁷ Kulwa mhayo uyu munhu akuneka ise na nina, akudimana na nke wakwe;

⁸ Na bubili wabo bakubiza mili gumo; giko bati babili hangi, aliyo mili gumo.

⁹ Kulwa iyo isho Mulungu waashidimanya hamo, munhu atizushilekanya.

¹⁰ Na mu numba bahemba bakwe bumuja hangi mhayo uyu.

¹¹ Nanghwe ubawila giki, Munhu ose uyo umpeja nke wakwe, na untola ungi, washihaja kuli nke wakwe.

¹² Nu nkima, ulu ulekana na ngoshi wakwe, utolwa na ungi, waashihiwa.

Yesu ubasungulila lubango banigini

¹³ Hunaho bali benha bana banigini kuli Wei, abadime ho; na bahemba bakwe bubalemeja abali bubenha.

¹⁴ Aliyo aho Yesu ubona iyi, ukolwa, ubawila giki, Bazunilijagi bana banigini kwiza kuli Nene; mutizubalemeja, iki abali giti aba, butemi wa Mulungu wene wabo.

¹⁵ Nghana, namuwila giki, munhu ose uyo atuwanukula butemi wa Mulungu giti ngʼwana nigini atalingila mo na hado.

¹⁶ Ubalela mu makono gakwe, ubatuulila makono, ubasungulila lubango.

Budumi wa nsumba nsabi

¹⁷ Aho wali winga udima nzila, munhu umo umpelela, untugija nzwi, umuja giki, Nangi wa wiza, nite ki ningile mu bupanga butushila?

¹⁸ Aliyo Yesu ungʼwila giki, Wanitana wa wiza ni buli? Ati ho wa wiza, ulu ati umo, Ngʼwene Mulungu.

¹⁹ Shilagilo, ambu, ushimanile: Utalizubulaga, Utalizushihya, Utaliziba, Utalizukanila ya bumama, Utalizunyekeja, Ubakujage so na noko.

²⁰ Nanghwe ushosha, ungʼwila giki, Nangi, iyi yose nakayidimaga kufumila mu buyanda wane.

²¹ Yesu unola, untogwa, ungʼwila giki, Ulebile mu mhayo gumo; jaga ukajinje shose isho uli nasho, ukabinhe bahabi, nangho ulabiza na wibikija ngʼwigulu; huna wize, unilondele, ubukije nsalaba gwako.

²² Aliyo wei ugwa lolo kuhva mhayo uyo, uja wapinihalaga iki walali na sabo ningi.

²³ Na Yesu wilalangija, ubawila bahemba bakwe giki, Ili kilambu shido abali na sabo kwingila mu butemi wa Mulungu!

²⁴ Bahemba bukumya kulwa mihayo yakwe. Aliyo Yesu ushosha hangi ubawila giki, Bana bane, ili kilambu shido abajisanije sabo kwingila mu butemi wa Mulungu!

²⁵ Ili changu ngamila kushepa mu kapundu ka lushinge, kutinda nsabi kwingila mu butemi wa Mulungu.

²⁶ Aliyo boi buzunzumala no, bilunjalunja boi bike giki, Nani lulu wadula kupijiwa?

²⁷ Yesu ubakamilija, uhaya giki, Ku banhu itudulika, aliyo kuli Mulungu iti giko; iki kuli Mulungu mihayo yose yadulika.

²⁸ Hunaho Petro wandia kungʼwila giki, Lolaga, biswe tukaleka shose na twakulondela.

²⁹ Yesu ushosha uhaya giki, Nghana, namuwila giki, Ati ho munhu uyo akaleka numba, nulu bana ba ngʼwawe, nulu balumbuye, nulu ise, nulu nina, nulu nke, nulu bana, nulu migunda, kulwa nguno yane, na kulwa nguno ya evangeli,

³⁰ Uyo akukija kwinhiwa haha ngʼwikanza ili nghangala igana ha ngʼwanya gwa shenisho: numba, na bana ba ngʼwawe, na balumbuye, na banina, na bana, na migunda, kihamo na kunyajanyajiwa; na ngʼwikanza ililiza bupanga butushila.

³¹ Aliyo bingi a ba kwandia balabiza ba kunuma, na a ba kunuma balabiza ba kwandia.

Yesu ukuhanga hangi kucha na kujuka kwakwe

³² Nabo bali bali mu nzila bakulinhaga kuja Yerusalemi, na Yesu utongela ku butongi wabo; nabo bukumya, bunondela bogohile. Nanghwe ubatwala hangi ikumi na babili, wandia kubawila iyahaya kungwila.

³³ Uhaya giki, Lolagi, tulilinha kuja Yerusalemi; na Ngʼwana wa munhu akwinhiwa ko ku bagabiji batale na ku bandiki; nabo bakunekanya nsango gwa kumulaga, bakungʼwinha ko ku bana mahanga,

³⁴ Nabo bakungʼwigimbija, na kuntula na mikoba; na kunswila mate, na kumulaga; na hanuma ya shiku idatu akujuka.

Yakobo na Yohana bukoba butale

³⁵ Hunaho Yakobo na Yohana, bana ba ngʼwa Zebedayo, bungʼwegela, bungʼwila giki, Nangi, tutogilwe utwitile yose iyo tulakulombe.

³⁶ Nanghwe ubawila giki, Mutogilwe nangʼwitile ki?

³⁷ Bungʼwila giki, Utuzunilije kwigasha umo ku nkono gwako gwa bulyo, na ungi ku nkono gwa lumoso, ngʼwikujo lyako.

³⁸ Aliyo Yesu ubawila giki, Bingʼwe mutamanile iyo mulilomba. Angu, ngʼwadula kukingʼwa kikombe icho nangʼwa mo Nene, na kubatijiwa na kubatijiwa uko naabatijiwa Nene?

³⁹ Nabo bungʼwila giki, Twadula. Aliyo Yesu ubawila giki, Hene kikombe icho nangʼwa Nene mulangʼwa na bingʼwe; na kubatijiwa uko naabatijiwa Nene mulabatijiwa nako;

⁴⁰ Aliyo u kwigasha ku nkono gwane gwa bulyo, na gwa lumoso, iti mu budula wane kubinha; aliyo kwene kwabo abubegejiwa.

⁴¹ Na abo ikumi aho bigwa mhayo uyu, bandia kubapelanilwa Yakobo na Yohana.

⁴² Aliyo Yesu aho ubitana, ubawila giki, Bingʼwe mumanile giki, abo babalwa bigelelilwe butale wa ku mahanga, bene bakusugaga na nguzu; na batale ba benabo bakubatumamyaga na budula.

⁴³ Aliyo mu bingʼwe itizubiza giko; aliyo munhu ose uyo atogilwe kubiza ntale mu bingʼwe, ngʼwene alabiza ngʼwinhilija wa bose:

⁴⁴ Na munhu ose uyo atogilwe kubiza wa kwandia mu bingʼwe, akubiza nsese wa bose.

⁴⁵ Iki nu Ngʼwana wa munhu walatizile kwinhilijiwa, aliyo kwinhilija, na kufunya bupanga wakwe bubize kikomolelo cha kubakomola bingi.

Yesu umpija Bartimayo

⁴⁶ Na bushika Yeriko; na aho akwingaga mu Yeriko kihamo na bahemba bakwe na ibita itale, u moku Bartimayo, ngʼwana wa Timayo, wali wigashije ha mhelo ya nzila, akwilombelejaga.

⁴⁷ Aho ungʼwigwa giki, Ngʼwene Yesu wa Nazareti, wandia kuhamuka na kuhaya giki, Yesu, Ngʼwana wa ngʼwa Daudi, unichile kigongo.

⁴⁸ Na bingi bunemeja afulike; aliyo wei ongeja no no no kuhamuka giki, Ngʼwana wa ngʼwa Daudi, unichile kigongo.

⁴⁹ Na Yesu wimila, ulagila itanwe. Nabo bungʼwitana u moku, bungʼwila giki, Timbyaga ngholo; bukaga, alikwitana.

⁵⁰ Nanghwe uponya kizwalo chakwe cha kwigumha, ubuka, wiza kuli Yesu.

⁵¹ Na Yesu unshokeja, uhaya giki, Utogilwe nakwitile ki? Moku ungʼwila giki, Rabboni, natogilwe nabizubona.

⁵² Yesu ungʼwila giki, Jaga; kuzunya kwako kwakupijaga. Haho na haho ubona, na unondela Yesu mu nzila.