Maliko 1 - Ilagano Ipya Lya

Bulomeji wa ngʼwa Yohana Matija

¹ Kwandia kwa evangeli ya ngʼwa Yesu Kristo, Ngʼwana wa Mulungu.

² Gitumo yaandikwa mu kitabo cha nghangi Isaya giki, Lolaga, Nene nantuma ntungʼwa wane ku butongi wa bushu wako, uyo alabeja ipalapala lyako ku butongi wako.

³ Ilaka lya uyo akuhamukaga mu bu, Bejabejagi ipalapala lya Seba, gololagi nzila yakwe.

⁴ Yohana akiza ubyubatija mu bu, na ubyulomela kubatija kwa koya kwa kushika mu kulekejiwa kwa shibi.

⁵ Na ba chalo chose cha Buyudaya, na ba Yerusalemi bufuma buja kuli wei bubatijiwa nanghwe mu mongo gwa Yordani, bubyutambula shibi shabo.

⁶ Wei Yohana walazwalile boya wa ngamila, na shipi gwa ndili mu nkimbili gwakwe, waalyaga njige na buki wa mu bu.

⁷ Nanghwe ulomela, uhaya giki, Izile hanuma yane Uyo anikilile nene nguzu; Ngʼwenuyo nene natigelelilwe kwinama kutaligula nkoba gwa shilatu shakwe.

⁸ Nene hene namubatija mu minzi, aliyo Ngʼwenuyo alamubatija na Moyo Ngʼwela.

Kubatijiwa kwa ngʼwa Yesu

⁹ Ikabiza mu shiku jenijo Yesu wali utuma Nazareti ya Galilaya, ubatijiwa na Yohana mu Yordani.

¹⁰ Halio na haho ulinha kwinga mu minzi, ubona igulu lyukunduka, na Moyo giti nghuulu akwikaga kuli Wei;

¹¹ Na ilaka lyufuma ngʼwigulu, Bebe uli Ngʼwana wane ntogwa, muli Bebe nayejiwa no.

Yesu ugengʼwa

¹² Haho na haho Moyo untwalanija mu bu.

¹³ Ubiza mo mu bu shiku makumi ane akugemagwa na Shetani; ubiza hamo na mashinwele; na bamalaika bubyungʼwinhilija.

Yesu wandia kulomela

¹⁴ Hanuma ya kutungwa kwa ngʼwa Yohana, Yesu akiza Galilaya, ubyulomela evangeli ya butemi wa Mulungu.

¹⁵ Uhaya giki, Ikanza lyashikilijiwagwa, na butemi wa Mulungu wegelaga; oyagi, muyizunye evangeli.

Yesu ubitana bahemba ba kwandia

¹⁶ Aho wali ushiminza ku mbalama ya nyanza ya Galilaya, ubabona Simoni, na Andrea ngʼwana wa ngʼwabo, bakuponyaga ntego mu nyanza; iki bali bategi.

¹⁷ Na Yesu ubawila giki, Nzugwi munilondele, na Nene nakungʼwita mubize bategi ba banhu.

¹⁸ Haho na haho buleka mitego yabo, bunondela.

¹⁹ Na aho uja ku butongi hado, ubabona Yakobo ngʼwana wa ngʼwa Zebedayo, na Yohana ngʼwana wa ngʼwabo, na benabo bali bali mu lyato bakulungaga mitego yabo.

²⁰ Haho na haho ubitana; nabo buneka sabo Zebedayo mu lyato hamo na bitumamija ba mhela, bunondela.

Yesu ubapija bingi mu Kapernaumu

²¹ Na bushika mo mu Kapernaumu; haho na haho ha lushiku lwa Sabato aho wingila ngʼwibilingilo, ubalanga.

²² Nabo budedebala kulwa kalangile kakwe, iki ubyubalanga giti ngʼwenekele budula, iti giti bandiki.

²³ Na walali mo ngʼwibilingilo lyabo munhu ali na moyo nsoso, nanghwe uhamuka,

²⁴ Uhaya giki, Tuli na ki, biswe na Bebe, Yesu wa Nazareti? wizaga kutuyagaja? Nakumanile Bebe, Uyo uli Ngʼwela wa Mulungu.

²⁵ Na Yesu unghama, uhaya giki, Humulaga, ungʼwinge ho.

²⁶ Na moyo nsoso gumfilinghanya, guhamuka na ilaka itale, gungʼwinga.

²⁷ Bukumya bose, kushisha bibugilija benekele na benekele, buhaya giki, Ni ki iyi? Kulanga uku kupya kuli kinahe? iki akulagilaga na budula i mioyo misoso, nayo yungʼwigwa!

²⁸ Lukumo lwakwe lukumuka haho na haho mu si jose ja Galilaya jibimbikanilwe ho.

²⁹ Haho na haho aho hali bufuma ngʼwibilingilo, hamo na Yakobo na Yohana, bingila mu numba ya ngʼwa Simoni na Andrea.

³⁰ Ninabuko wa ngʼwa Simoni walalalile, asatile nswiza; haho na haho bungʼwila gitumo ali.

³¹ Nanghwe ungʼwegela, undima nkono, umucha; haho na haho nswiza gunekela, nanghwe ubinhilija.

³² Aho yubiza mhindi, aho limi lyali lyugwa, bungʼwenhela bose abalwalile, na abo abali bali na masamva.

³³ Ba nzengo bose bibilingila ha nyango.

³⁴ Nanghwe ubapija bingi abali basatile na bulwile bungi na bungi, hangi ugapeja masamva mingi, atugazunilija masamva kulungalunga, iki gali gumana Wei.

³⁵ Na mu makingo aho yali itali bujiku, ubuka, utuma, uja kwipande iliti na banhu, na ulomba uko.

³⁶ Na Simoni na abo abali bali nanghwe bunondela.

³⁷ Aho bumona, bungʼwila giki, Banhu bose balikukoba.

³⁸ Nanghwe ubawila giki, Tujagi ku mizengo iyili hihi, nakalomele nu kwene; iki kulwa nguno iyi nizaga.

³⁹ Nanghwe ubyulomela mu mabilingilo gabo mu si yose ya Galilaya, na ugapeja masamva.

Yesu umpija wa mbiji

⁴⁰ Na wa mbiji wiza kuli Wei, ungʼwikumbilija, untugija mazwi, ungʼwila giki, Ulu utogilwe, wadula kuneja.

⁴¹ Yesu unsatwa, utama nkono gwakwe, unkuumya; na ungʼwila giki, Natogilwe, elaga.

⁴² Na aho uhaya, haho na haho mbiji jungʼwinga ngʼwenuyo, nanghwe wejiwa.

⁴³ Na unghugula gete, halio na haho unaga,

⁴⁴ Ungʼwila giki, Wilanghane, utizungʼwila munhu ose mhayo; aliyo jaga, ukiyoleche kuli ngabiji, ufunye shinhu sha kwejiwa kwako gitumo Musa wali ulagila; ibize bukaniji ku bo.

⁴⁵ Aliyo wei aho wali ufuma, wandia kulomela no, na kukumucha mhayo uyo kushisha nose Yesu walatudula kwingila mu nzengo hape hangi; aliyo wali wikala kwipande iliti na banhu; nabo biza kuli Wei kufuma hose hose.