Luka 9 - Ilagano Ipya Lya

Batungʼwa butungʼwa kulomela na kupija

¹ Akabitana bahemba bakwe ikumi na babili, ubinha nguzu na budula higulya ya masamva gose, na kupija bulwile.

² Ubatuma kulomela butemi wa Mulungu, na kubapija abasatile.

³ Ubawila giki, Mutizubucha kinhu cha mu lugendo, nulu milanga, nulu mhinda, nulu ngati, nulu feza, nulu munhu ose atizubiza na nghanjo ibili.

⁴ Na numba yose iyo ngʼwingila mo, ikalagi mo, nu kwene fumagi mo.

⁵ Na bose abatungʼwegeleja, aho ngʼwinga mu nzengo gwenuyo, gunghumulagi nu lububu lwa ku mhambala jingʼwe, ibize bukaniji wa kubakanilija.

⁶ Nabo binga bubyubita mu mizengo, bakulomelaga evangeli na bubyupija banhu hose hose.

Kabulagilwe ka ngʼwa Yohana Matija

⁷ Herode u nsugi wali wigwa iyo yose yali yitwa nanghwe, nanghwe wiganilija, iki yali yuhayiwa na bamo giki, Yohana wajukile mu bafu,

⁸ Bangi giki, Eliya wilongile; bangi giki, Umo wa bahangi ba kale wajukile.

⁹ Na Herode uhaya giki, Yohana nene nakamuta ntwe; aliyo ni nani Uyu nakungʼwigwaga mihayo iyi? Nanghwe ukoba kumona.

Banhu 5,000 bulishiwa

¹⁰ Na batungʼwa aho bushoka, bunsombolela mihayo yose iyo bali bita. Nanghwe ubatwala, uja hamo nabo, bisunda heke kwipande iliti na banhu lya nzengo ugwitanwa Bethsaida.

¹¹ Aliyo mabita aho gumana iyi, gunondela; nanghwe ubegeleja, ulungalunga nabo ya butemi wa Mulungu, na ubapija abo bali bali na nguno ya kupijiwa.

¹² Aho limi lyali lyuheha, ikumi na babili bungʼwegela, bungʼwila giki, Lilagage ibita, baje mu mizengo na mu magunguli gabimbikanilwe ho, babone nghambi na sha kulya; iki aha tuli ngʼwipande iliti na banhu.

¹³ Aliyo ubawila giki, Binhagi bingʼwe sha kulya. Aliyo buhaya giki, Biswe tuti na ya kukila migati itano na ndilo ibili, numho tuje, tukabagulile shiliwa banhu aba bose.

¹⁴ Iki bali bali bagosha giti 5,000. Aliyo ubawila bahemba bakwe giki, Mubigashe magele, makumi atanotano.

¹⁵ Nabo bita giko, bubigasha bose.

¹⁶ Aho wanukula migati iyo itano na ndilo ijo ibili, ulangamila miso kwigulu, ushisungulila lubango, ushimeganya, ubinha bahemba babatengele ba ibita.

¹⁷ Nabo bulya na biguta bose; huna bukuminga masajiwa agali gusaga, masonzo ikumi na abili.

Petro unkanila Yesu, Ngʼwene Kristo

¹⁸ Ikabiza aho alilomba Wei wike, bahemba bakwe bali bali hamo nanghwe, na ubabuja, uhaya giki, Banhu bakunihayaga Nene ndi nani?

¹⁹ Bushosha buhaya giki, Yohana Matija; bangi giki, Eliya; na bangi giki, Umo wa bahangi ba kale wajukile.

²⁰ Ubawila giki, Aliyo bingʼwe mukunihayaga ndi nani? Petro ushosha, uhaya giki, Bebe uli Kristo wa Mulungu.

²¹ Ubalemeja na ubalagila batizungʼwila munhu ose mhayo gwenuyu;

Yesu ukuhanga kucha na kujuka kwakwe

²² Uhaya giki, Ngʼwana wa munhu shingʼwigelile Wei kuluhaluhiwa na mihayo mingi, na kulengʼwa na banamhala na bagabiji batale na bandiki, na kubulagwa, na ku lushiku lwa kadatu kujuchiwa.

Bupanga wa kizunya

²³ Ubawila bose giki, Munhu ose ulu atogilwe kunilondela, ilemeje ngʼwenekele, abuche nsalaba gwakwe buli lushiku, anilondele.

²⁴ Iki uyo ose atogilwe kupija bupanga wakwe, alabuyagaja, na uyo ose alabuyagaja bupanga wakwe kulwa nguno yane, ngʼwene alabupija.

²⁵ Iki ikumelela ki munhu ulu upandika si yose, aliyo wiyagaja ngʼwenekele nulu kwijimija ngʼwenekele?

²⁶ Iki uyo ose ucha minala kulwa nguno yane na kulwa nguno ya mihayo yane, ngʼwenuyo Ngʼwana wa munhu nanghwe alacha minala kulwa nguno yakwe, aho aliza ngʼwikujo lyakwe, na lya ngʼwa Ise, na lya bamalaika bela.

Kuihindula kwa ngʼwa Yesu

²⁷ Aliyo namuwila nghana giki, Bali ho bamo abimilile aha abatalaloja kucha na hado, kushisha aho balamala kubona butemi wa Mulungu.

²⁸ Ikabiza hanuma ya mihayo iyi giti shiku inane, untwala Petro na Yohana na Yakobo ulinha mu lugulu kulomba.

²⁹ Ikabiza aho ulomba, ihanga lya bushu wakwe lyugaluka, na shizwalo shakwe shubiza shape na shilabangizu.

³⁰ Kuhayumanila, bagosha babili bulungalunga nanghwe, a bene Musa na Eliya.

³¹ Abilonga ngʼwikujo bulungalunga mhayo gwa kucha kwakwe, uko uhaya kushikilija mu Yerusalemi.

³² Aliyo Petro na abo abali bali hamo nanghwe butindwa tulo; aho bumala kumisha, bubona ikujo lyakwe, na bagosha benabo babili abimilile hamo nanghwe.

³³ Ikabiza aho benabo bulekana nanghwe, Petro ungʼwila Yesu giki, Seba, ya wiza biswe kubiza ho aha; tuzenge maduku adatu; limo lyako, na limo lya ngʼwa Musa, na limo lya ngʼwa Eliya; walatamanile iyo wahaya.

³⁴ Aho walatali uhaya mihayo iyi, lyubiza ho ilunde, lyubakundikija; nabo bogoha aho bingila ngʼwilunde.

³⁵ Na ilaka lyufuma ngʼwilunde, lyuhaya giki, Uyu Ngʼwana wane ntogwa, ngʼwigwagi Wei.

³⁶ Aho ilaka lyubiza ho Yesu ubonwa ali wiyene. Nabo bikala sele, batangʼwilile munhu ose mu shiku ijo mhayo nulu gumo gwa iyo bali buyibona.

Yesu umpija nyanda wa lusalo

³⁷ Ikabiza ku ntondo, aho bali bika mu lugulu, ibita itale lyunsungʼwanha.

³⁸ Na lolaga, ngosha umo ngʼwibita ubucha ilaka, uhaya giki, Nangi, nakwikumbilija unole ngʼwana wane, iki ali ngʼwana wane wabyalwa umo wike.

³⁹ Na lolaga, moyo gukundimaga, kuhayumanila uhamuka, nago gumfilinghanya na kufuluta ifulo, gungʼwinga na bugaganu, gungulaja.

⁴⁰ Nane nali nubikumbilija bahemba bako bagupeje, nabo buduma.

⁴¹ Yesu ushosha uhaya giki, Bingʼwe kibyalilwe ikituzunyaga na chigomagomile, nakwikala na bingʼwe kushisha nanali, na kwiyumilija na bingʼwe? Ngʼwenhage aha ngʼwana wako.

⁴² Aho atali wiza i lisamva lyuntalicha, na lyumfilinghanya. Aliyo Yesu ugulemeja moyo nsoso, na umpija nyanda, na unshosha hangi kuli ise.

⁴³ Bose budedebala kulwa magaka ga Mulungu. Aliyo bose aho bali batali bukumya kulwa yose iyo Yesu witaga, ubawila bahemba bakwe giki,

Yesu ukuhanga kucha kwakwe

⁴⁴ Ibikagi mihayo iyi mu matu gingʼwe, iki Ngʼwana wa munhu uhaya kwinhiwa ko mu makono ga banhu.

⁴⁵ Aliyo batagumanile mhayo uyu, hangi gwibisile kubo, batizugwitegeleja; nabo bogoha kumuja makulu ga mhayo gwenuyo.

Ntale mu butemi wa ngʼwigulu

⁴⁶ Bubukabuka wibugilija mubo giki, Ntale mubo himba ni nani?

⁴⁷ Aho Yesu ubona wibugilija wa ngholo jabo, undima ngʼwana nigini, ungʼwimilija hihi nanghwe,

⁴⁸ Ubawila giki, Uyo ose ungʼwanukula nigini uyu mu lina lyane, wananukula Nene; na uyo ose unanukula Nene wangʼwanukula Uyo waanituma Nene. Iki uyo ali ndo mu bingʼwe bose, u ngʼwene alabiza ntale.

⁴⁹ Yohana ushosha uhaya giki, Seba, tukamona munhu alipeja masamva mu lina lyako, na biswe tukanemeja, iki atudimanaga na biswe.

⁵⁰ Na Yesu ungʼwila giki, Mutanemejage, iki uyo ati ngʼwanishi wiswe, ali ku lwande lwiswe.

Wilu wa bahemba

⁵¹ Ikabiza shiku ja kwanukulwa kwakwe ngʼwigulu aho jegela, ubuloleja na nguzu bushu wakwe kuja Yerusalemi.

⁵² Nanghwe utuma batungʼwa ku butongi wakwe; nabo aho buja, bingila mu nzengo gwa Basamaria, banongeje nghambi.

⁵³ Nabo bali batungʼwanukula, kulwa bushu wakwe wali bulolelile kuja Yerusalemi.

⁵⁴ Bahemba bakwe Yakobo na Yohana aho bubona mhayo uyu, buhaya giki, Seba, utogilwe tulagile moto gugwe kufuma ngʼwigulu, kubamala benabo, gitumo Eliya akita?

⁵⁵ Aliyo Wei ugaluka, ubalemeja, uhaya giki, Bingʼwe mutamanile muli ba moyo ki.

⁵⁶ Iki Ngʼwana wa munhu atizile kubuyagaja bupanga wa banhu, aliyo kupija. Huna buja ku nzengo gungi.

Kunondela Yesu

⁵⁷ Ikabiza aho bajile mu nzila, munhu umo ungʼwila giki, Seba, nakukulondela hose hose uko ulaja.

⁵⁸ Na Yesu ungʼwila giki, Nyamhawa jili na miobo, na noni ja hape jili na machanzo, aliyo Ngʼwana wa munhu ati na ha kulaja ntwe gwakwe.

⁵⁹ Ungʼwila ungi giki, Nilondelage. Aliyo wei uhaya giki, Seba, unizunilije naje tame nakanjike baba.

⁶⁰ Aliyo Yesu ungʼwila giki, Balekage bafu babajike bafu babo; aliyo bebe, jaga ukakumuche butemi wa Mulungu.

⁶¹ Ungi hangi uhaya giki, Seba, nakukulondela; aliyo unizunilije naje tame kubalaga ba ha kaya.

⁶² Aliyo Yesu ungʼwila giki, Ati ho munhu igelelilwe butemi wa Mulungu uyo wadimaga igembe lya kulima na ngʼombe, hanuma ulola ya kunuma.