Luka 8 - Ilagano Ipya Lya

Lugendo lwa ngʼwa Yesu mu Galilaya

¹ Na yubiza hanuma ya iyo, ubyuja mu mizengo mitale na mido, akulomelaga na akukumuchaga evangeli ya butemi wa Mulungu; na abo ikumi na babili bali bali hamo nanghwe.

² Hangi bakima bamo abali bapijiwa mu mioyo ya bubi na mu mabulwile, bene Mariamu akitanagwa Magdalene, uyo gungʼwinga masamva mpungati;

³ Na Yoana u nke wa Chuza, miki wa shikolo sha ngʼwa Herode; na Susana, na bangi bingi abo bubyungʼwinhilija shikolo shabo.

Kigemenghejo cha mibi

⁴ Aho ibita itale libilinga, na banhu kufuma mu buli nzengo biza kuli Wei, ulungalunga mu kigemenghejo giki,

⁵ Mibi akafuma uja kubiba mbiyu jakwe; na aho ubiba, jimo jugwa ha nzila, jupandagilwa, na noni ja hape jujilya.

⁶ Na jingi jugwa ha itale, najo juzwa, junyala, iki jugayiwa budoto.

⁷ Na jingi jugwa mu mihwa, na mihwa guzwa hamo najo, gujishita.

⁸ Na jingi jugwa ha si ya wiza, najo juzwa, juhola mbeke igana igana. Aho uhaya mihayo iyi uhamuka giki, Uyo ali na matu ga kwigwa, leka igwe.

⁹ Bahemba bakwe bumuja, buhaya giki, Kigemenghejo iki himba kili kinahe?

¹⁰ Uhaya giki, Bingʼwe ngʼwinhiwagwa kukumana kwigeniha kwa butemi wa Mulungu; aliyo ku bangi mu shigemenghejo; giki, aho bulola, batizulola, na aho bigwa, batizitegeleja.

¹¹ Kigemenghejo iki kili giki, I mbiyu jene mhayo gwa Mulungu.

¹² Aba ha nzila bali abo bakwigwaga mhayo, hunaho Shetani wiza, na winja mhayo mu ngholo jabo, batizuzunya na kupijiwa.

¹³ Aba ha itale, ha bene aho bigwa, banukula mhayo na buyegi; na benabo bati na nji, buzunya kakanza, na ngʼwikanza lya kugengʼwa bugwa.

¹⁴ Najo ijali jugwa mu mihwa, bali abo abigwa, na mu kijile chabo bushitwa na mayanga na sabo na kiyegele cha bupanga ubu, batutwaja matwajo mashikanu.

¹⁵ Aliyo ijo ha si ya wiza, bali abo abigwa mhayo mu ngholo niza na nhungilija, bugudima; na butwaja matwajo mu kwiyumilija.

Kigemenghejo cha tala

¹⁶ Ati ho munhu, aho ubacha tala, uyikundikija na kiseme, nulu kuyituula ngʼwizungu lya bulili; aliyo uyituula ha ikindikilo lya tala, bose abingila babone isana.

¹⁷ Iki guti ho mhayo gubisile ugutaligengeleka; nulu kuduhu ya mbisila italamanika na kwigengeleka hape.

¹⁸ Ilanghanagi lulu gitumo mukwigwaga; iki uyo ose ali na kinhu, ngʼwene akwinhiwa; na uyo ose ati na kinhu, ngʼwene akwingijiwa na iyo yiganikiwa giti ali nayo.

Ba ngʼwawe bunkoba Yesu

¹⁹ Hunaho nina na bana ba ngʼwawe biza kuli Wei, buduma kushika kuli Wei, kulwa ibita.

²⁰ Wenhelwa mhayo giki, Noko na bana ba ngʼwingʼwe bimilile hanze, batogilwe kwibona na Bebe.

²¹ Nanghwe ushosha ubawila giki, Mayu na bana ba ngʼwiswe bali abo bakwigwaga mhayo gwa Mulungu, na kugwita.

Yesu ugalendya mahuli

²² Na lushiku lumo yubiza giki, wingila mu lyato na bahemba bakwe, ubawila giki, Tukile ku nkilo gwa nyanza; bulinhya itanga buja.

²³ Aho balija utindwa tulo ushutula; na nyaga ntale gwika ku nyanza, na lyato lyali lyuhaya kokala, nabo bubiza mu kwihiga.

²⁴ Bungʼwegela, na bumisha, buhaya giki, Seba, Seba, twacha. Nanghwe umisha, uguhama nyaga na kulibanguka kwa minzi; na bubiza ho bulembezu.

²⁵ Nanghwe ubawila giki, Kuzunya kwingʼwe kuli hali? Nabo bogoha bukumya, biwila benekele na benekele giki, Ni nani Uyu, iki ulagila na miyaga na minzi, nasho shungʼwigwa?

Nsaji wa Gadara upijiwa

²⁶ Nabo buja bukola ku si ya Bagadara, iyilolile na Galilaya.

²⁷ Aho ufuma mu lyato upanda ha si, umanhya nanghwe ngosha umo afumile mu nzengo, uyo walali na masamva kufuma kale, atazwalile kizwalo nulu atikalaga mu numba, aliyo mu mashigila.

²⁸ Aho umona Yesu, uhamuka, ugwa ku butongi wakwe, uhaya na ilaka itale giki, Tuli na mhayo ki, nene na Bebe, Yesu, Ngʼwana wa Mulungu ali higulya no? Nakwikumbilija, utizuniluhya.

²⁹ Iki wali walagila moyo nsoso kungʼwinga munhu ngʼwenuyu; iki nghangala ningi gubyundima; nose nanghwe utungwa, alindilwe na minyololo na mapingu, nanghwe ujitina nhendele, utwalanijiwa na isamva mu bu.

³⁰ Yesu umuja, uhaya giki, Lina lyako uli nani? Uhaya giki, Ndi Legioni, iki masamva mingi gali gangʼwingila.

³¹ Nago gungʼwikumbilija atizugalagila kuja ngʼwichongo iliti na ngelelo.

³² Hunaho lyali lili ho idale lya ngurube ningi jikudimaga mu lugulu; nago gungʼwikumbilija agazunilije kwingila mu jenijo. Nanghwe ugazunilija.

³³ Gungʼwinga munhu uyo, gingila mu ngurube, nalyo idale lyupela na nguzu lyuholomokela ha ngegu shimu mu nyanza, lyungʼwa nhuli, lyucha.

³⁴ Aho badimi bubona iyo yali yitwa bupela, buja busombola mhayo uyu mu nzengo na mu chalo.

³⁵ Banhu bufuma buja kubona iyo yali yitwa, na bushika kuli Yesu, bunsanga munhu ngʼwenuyo masamva gangʼwingaga, igashije ku mhambala ja ngʼwa Yesu, azwalile shizwalo, na ali na masala; nabo bogoha.

³⁶ Benabo abali bubona mhayo uyu, bubawila gitumo akapijiwa uyo walali na masamva.

³⁷ Na banhu bose ba si ya Bagadara iyihelile ho bungʼwikumbilija inge mubo, iki bali budingʼwa na boba butale. Nanghwe wingila mu lyato, ushoka.

³⁸ Aliyo ngosha uyo masamva gangʼwingaga ungʼwikumbilija abize nanghwe, aliyo Yesu unaga, uhaya giki,

³⁹ Shokaga ku kaya yako, ukasombole mihayo mitale iyo Mulungu wakwitilaga bebe. Nanghwe uja ulomela mu nzengo gose mihayo mitale umo yali ili iyo Yesu waangʼwitila.

Ngʼwana wa Yairo ujuchiwa na nkima wa ngeji upijiwa

⁴⁰ Ikabiza aho Yesu ushoka, ibita lyungʼwegeleja, iki bose bubyunindila.

⁴¹ Hunaho wiza ngosha lina lyakwe Yairo, ngʼwene walali ntale wa ibilingilo; ugwa ku mhambala ja ngʼwa Yesu ungʼwikumbilija ize mu numba yakwe;

⁴² Iki walali na ngʼwana ngʼwaniki uwabyalwa umo wike, wa miaka giti ikumi na ibili, nanghwe alenda kucha. Aho ubyuja mabita gunshiteleja.

⁴³ Na nkima uwalasatile ngeji gwa mininga miaka ikumi na ibili, uyo wali umala sabo jakwe jose ku balaguji, uduma kupijiwa na munhu ose,

⁴⁴ Wiza hanuma yakwe, ubukuumya bukunilo wa kizwalo chakwe; na ngeji gwa mininga gakwe gukama haho na haho.

⁴⁵ Na Yesu uhaya giki, Nani uyo wanikuumya? Aho bulema bose, Petro na abo abali bali hamo nanghwe buhaya giki, Seba, mabita galikushiteleja na kukukandikija, na Bebe wahaya giki, Nani uyo wanikuumya?

⁴⁶ Aliyo Yesu uhaya giki, Munhu wanikuumya, iki namanile budula waningaga.

⁴⁷ Nkima ngʼwenuyo aho ubona atibisa, wiza alidetema, ugwa ku butongi wakwe, unsombolela mu miso ga banhu bose kulwa nguno ki wankuumya, na gitumo wapijiwa haho na haho.

⁴⁸ Nanghwe ungʼwila giki, Ngʼwana wane, timbaja ngholo, kuzunya kwako kwakupijaga, jaga mu mhola.

⁴⁹ Aho walatali ulungalunga, wiza munhu kufuma ha ngʼwa ntale wa ibilingilo, ungʼwila giki, Ngʼwana wako wachaga, utizunoja Nangi.

⁵⁰ Aliyo aho Yesu wigwa iyi, unshokeja, uhaya giki, Utizogoha; zunyaga gwike, nanghwe alapijiwa.

⁵¹ Aho Yesu wingila mu numba atuzunilija munhu kwingila mo, ulu iti Petro na Yakobo na Yohana, na ise wa ngʼwaniki nu nina.

⁵² Bose bulila shisoji na kumiila nghungu. Aliyo Wei uhaya giki, Mutalilage, atachile aliyo alishutula duhu.

⁵³ Nabo bunsekela no, iki bamanile giki, wachaga.

⁵⁴ Nanghwe aho wabafunya bose, udima nkono gwakwe, uhamuka, uhaya giki, Bebe ngʼwaniki, bukaga.

⁵⁵ Na moyo gwakwe gushoka, nanghwe ubuka haho na haho. Nanghwe ulagila inhiwe sha kulya.

⁵⁶ Na babyaji bakwe budedebala no; nanghwe ubalagila batizungʼwila munhu ose iyo yitagwa.