Luka 6 - Ilagano Ipya Lya

Bahemba bunuka masha ha Sabato

¹ Yubiza ha Sabato ndebe, wali ubita mu migunda ya ngano; na bahemba bakwe bubyuhulula mangala, bulya, bubyugayuga mu makono.

² Aliyo bamo ba Bafarisayo bubawila giki, Ni buli mukwitaga icho cha ngilo kwita ha Sabato?

³ Na Yesu ushosha ubawila giki, Mutasomaga iyo akita Daudi, aho wali utuba, wei na benabo abali hamo nanghwe?

⁴ Gitumo akingila mu numba ya Mulungu, winja migati iyufunyiwa kuli Mulungu, uyilya, ubinha na benabo abali bali hamo nanghwe, iyo ili ya ngilo kwilya ulu iti bagabiji bike?

⁵ Ubawila giki, Ngʼwana wa munhu ali Seba nu ku Sabato.

Munhu wa nkono guniile upijiwa ha Sabato

⁶ Yubiza ha Sabato yingi, wingila ngʼwibilingilo na ulanga; na walali mo munhu, nkono gwakwe gwa bulyo gwali gumile.

⁷ Bandiki na Bafarisayo bundegeleka, ulu alampije ha Sabato, babonele ho mhayo gwa kumula.

⁸ Aliyo Wei witegeleja kwidedekanya kwabo, na ungʼwila munhu uyo ali na nkono gumile giki, Bukaga wimile hagati: nanghwe ubuka wimila.

⁹ Hunaho Yesu ubawila giki, Nakumubuja bingʼwe mhayo; Angu, igelile kwita ya wiza ha Sabato, nulu kwita ya bubi, kubupija bupanga, nulu kubuyagaja?

¹⁰ Ubilalangija bose, ungʼwila munhu ngʼwenuyo giki, Tamaga nkono gwako. Nanghwe wita chene, na nkono gwakwe gubiza mpanga giti u gungi.

¹¹ Aliyo boi bokala na busayi, bulomana umo balangʼwitile Yesu.

Yesu ubakoma batungʼwa

¹² Ikabiza mushiku ijo, ubuka uja mu lugulu kulomba, ukeyula bujiku pe akulombaga kuli Mulungu.

¹³ Aho yubiza limi ubitana bahemba bakwe; ukoma mubo ikumi na babili, abo ubitana hangi giki, batungʼwa.

¹⁴ Simoni, uyo ungʼwilika Petro, na Andrea ngʼwana wa ngʼwawe; Yakobo na Yohana, Filipo na Bartolomayo,

¹⁵ Matayo na Tomaso, Yakobo ngʼwana wa ngʼwa Alfayo, na Simoni uwitanwa Zelote,

¹⁶ Yuda u wa ngʼwa Yakobo, na Yuda Iskariota uyo wali ungʼwinha ko.

¹⁷ Utulumenha hamo nabo, wimila ha itogolo, hamo na ibita lya bahemba bakwe, na buhi wa banhu abufumila Buyudaya yose na Yerusalemi, na ku ipande lya ku nyanza lya Turo na Sidoni, biza kundegeleka na kupijiwa bulwile wabo.

¹⁸ Na bose abali bukoyakoyiwa na mioyo misoso, nabo bupijiwa.

¹⁹ Na ibita lyose lyukoba kunkuumya, iki budula wali bungʼwinga, bubapija bose.

Yesu ulomela ha lugulu A ba lubango

²⁰ Na ubucha miso gakwe ku bahemba bakwe, uhaya giki, Muli ba lubango a bingʼwe bahabi, iki butemi wa Mulungu wene wingʼwe.

²¹ Muli ba lubango a bingʼwe mukutubaga haha, iki muligutiwa. Muli ba lubango bingʼwe mukulilaga haha, iki mulaseka.

²² Muli ba lubango aho banhu balamukolwa, na aho balamusolanya, na kumusukilija na kuponya lina lyingʼwe giti lya bubi, kulwa nguno ya Ngʼwana wa munhu:

²³ Yegagi mu lushiku lwenulo, na mutambile kulwa buyegi, iki lolagi, kusamva kwingʼwe kwingi ngʼwigulu, iki bakulugenji babo bali bubitila bahangi giti iyo.

Abasangwa

²⁴ Ngʼwasangwa bingʼwe basabi, iki ngʼwanukulaga kulungujiwa kwingʼwe.

²⁵ Ngʼwasangwa bingʼwe ngʼwafulaga, iki mulatuba. Ngʼwasangwa bingʼwe mukusekaga haha, iki mulapinihala na kulila shisoji.

²⁶ Ngʼwasangwa bingʼwe aho banhu bose balamuhaya chiza, iki bakulugenji babo bali bubitila bahangi bamama giti iyo.

Kutogwa ku banishi umo kuli

²⁷ Aliyo Nene namuwila bingʼwe abakwigwaga giki, Mubatogagwe banishi bingʼwe, bitilagi chiza abamukohva.

²⁸ Mubasungulilage lubango abumuzuma, mubalombelage abumuluhyaluhya.

²⁹ Uyo ukupala ha itama limo, ungalukije na i lingi; na uyo ukutaja nguto gwako, i nghanjo nayo utizunemeja.

³⁰ Uyo ose ukulomba, ngʼwinhage; na uyo ukutagija ishili shako utizushilomba hangi.

³¹ Na iyo yose mutogilwe banhu bangʼwitile bingʼwe, mubitile na boi giko.

³² Na ulu ngʼubatogwa abo abamutogwa bingʼwe, muli na kulumva ki? iki nulu ba shibi nabo bubatogwa abo abubatogwa boi.

³³ Na ulu ngʼubitila chiza abo abungʼwitila chiza bingʼwe, muli na kulumva ki? iki nulu ba shibi nabo bakwitaga giko.

³⁴ Na ulu ngʼubalisha shiili abo ngʼwisagilagwa bakumugotolela hangi, muli na kulumva ki? iki nulu ba shibi nabo bakubalishaga shiili a ba shibi giki, bagotolelwe ishilenganilile.

³⁵ Aliyo mubatogwe banishi bingʼwe, itagi ya wiza, na lishagi shiili mutizisagilwa kugotolelwa hangi; na mhela yingʼwe ilabiza ningi, na bingʼwe mulabiza bana ba Ngʼwenuyo ali higulya no, iki Wei ah wa wiza ku abo bati na kulumba na ku ba bubi.

³⁶ Kulwa iyo bizagi na kisa, gitumo Singʼwe nanghwe ali na kisa.

³⁷ Hangi mutalekanyage, ningʼwe mutalalekanyiwa; nulu mutalekanyage nsango, ningʼwe mutalalekanyiwa nsango; lekejagi, ningʼwe mulalekejiwa.

³⁸ Inhagi, ningʼwe mulinhiwa, ngelekelo ya wiza, itindagilile, yashingishwa, ya masesa, yene balangʼwinha bingʼwe mu mifuko yingʼwe: iki na ngelekelo yeniyo mukugelekelaga nayo, ningʼwe mukugelekelelwa.

Kipimile ka ngʼwenekele

³⁹ Ubawila kigemenghejo giki, Angu, moku wadula kuntongela moku ngʼwiye? Batugwila bose babili ngʼwichongo?

⁴⁰ Nghemba atankilile nangi wakwe; aliyo uyo ose ashikanile alabiza giti nangi wakwe.

⁴¹ Ni nguno ki ulilola kapalala akali mu liso lya nduguyo, aliyo utiganikaga ngamba uguli mo mu liso lyako bebe?

⁴² Nulu wadula kinahe kungʼwila nduguyo giki, Ndugu wane, leka nakwingije kapalala akali mu liso lyako, aliyo utubonaga ngamba uguli mu liso lyako bebe? Ngʼwibeleja bebe, injaga tange ngamba uguli mo mu liso lyako, hunaho ukubona chiza kwinja kapalala akali mo mu liso lya nduguyo.

⁴³ Iki guti ho nti gwa wiza ugukutwajaga matwajo ga bubi; nulu guti ho nti gwa bubi ugukutwajaga matwajo ga wiza.

⁴⁴ Iki buli nti gumanika mu matwajo gago, iki banhu batayobaga matwajo ga ntini ku mihwa, nulu batayobaga mizabibu ku masanzu.

⁴⁵ Munhu wa wiza akufunyaga ya wiza kufuma mu bubiki wa wiza wa mu ngholo yakwe, na munhu wa bubi akufunyaga ya bubi kufuma mu bubiki wa bubi wa mu ngholo yakwe, iki mu iyo yokala mu ngholo, nomo gukwilungalungaga.

⁴⁶ Ni buli mukunitanaga Seba, Seba, na mutitaga iyo nakumuwilaga?

⁴⁷ Uyo ose uwiza kuli Nene na kwiyigwa mihayo yane, na kwiyita, nakungʼolekeja uyo wiyikolile nanghwe:

⁴⁸ Ngʼwenuyu wiyikolile na munhu uyo alizenga numba, usimba, ushimya, utuula musingi ha itale; aliyo ihuma aho lyiza, nduluma yuyipama numba yeniyo, na itudula kuyinegenya, iki izengelile ha itale.

⁴⁹ Aliyo uyo wigwa na kwiyita yaya, wiyikolile na munhu uyo wali uzenga numba ha si, atatuulile musingi; na nduluma yuyipama, nayo yugwa haho na haho, na kugwa kwayo kwali kutale.