Luka 5 - Ilagano Ipya Lya

Yesu ubitana bahemba ba kwandia

¹ Yubiza aho banhu bunshiteleja kwigwa mhayo gwa Mulungu, Wei wali wimila haho na nyanza ya Genesareti,

² Ubona mato abili gali ha ngʼwalo gwa nyanza, aliyo bategi bali bingile mo bakojaga mitego yabo.

³ Wingila mu lyato limo, i lya ngʼwa Simoni, umuja alyegeleje hado kwinga ha ngʼwalo; nanghwe wigasha ubalanga banhu ali mu lyato.

⁴ Aho umala kulungalunga ungʼwila Simoni giki, Egelejage ko ku bujiba, muponye mitego yingʼwe mutege.

⁵ Simoni ushosha ungʼwila giki, Seba twakoyaga bujiku pe, tutabulagile kinhu: aliyo nahene kulwa kuhaya kwako nakuguponya ntego.

⁶ Aho bita giko, bugwasha ibipi itale lya ndilo, na ntego gwandia kutinika.

⁷ Na bubashinyela bichabo a ba mu lyato lingi, bize kubagunanha. Nabo biza bokaja mato gose abili, nose gandia kutubila.

⁸ Aho Simoni Petro ubona mhayo uyu, ugwa ku mazwi ga ngʼwa Yesu, uhaya giki, Ingaga hali nene, Seba, iki nene ndi munhu wa shibi.

⁹ Iki kukumya kutale kwandima, na bose abali bali nanghwe, kulwa wingi wa ndilo ijo bagwashaga.

¹⁰ Giko Yakobo na Yohana, bana ba ngʼwa Zebedayo, abali bali na busangi na Simoni, bubiza chene. Na Yesu ungʼwila Simoni giki, Utizogoha, kufuma lelo ulabyugwasha banhu.

¹¹ Nabo aho bukoja mato gabo ha ngʼwalo, buleka shose bunondela.

Yesu umpija wa mbiji

¹² Na yubiza aho walali mo mu nzengo nebe, lolaga, ngosha okalile mbiji, aho umona Yesu ugwa achimigije ha si, ungʼwikumbilija uhaya giki, Seba, ulu utogilwe wadula kuneja.

¹³ Nanghwe utama nkono gwakwe, unkuumya, uhaya giki, Natogwa; elaga. Haho na haho mbiji jungʼwinga.

¹⁴ Na unagila atizungʼwila munhu ose; aliyo, Jaga, ukiyoleche kuli ngabiji, ufunye shinhu sha kwejiwa kwako, gitumo Musa ulagila, ibize bukaniji

¹⁵ Aliyo lukumo lwakwe lwiyongeja kukumuka; na mabita matale gubyiza kundegeleka, na kupijiwa bulwile wabo.

¹⁶ Aliyo Wei wisunda ngʼwipande iliti na banhu, ubyulomba.

Yesu umpija nemehazu

¹⁷ Na yubiza ha lushiku lulebe aho alilanga, Bafarisayo na balangi ba shilagilo bali bigashije haho, abali bafumilile mu buli igunguli lya mu Galilaya, na Buyudaya, na kufuma Yerusalemi: na budula wa Seba wali buli ho kubapija.

¹⁸ Na lolaga, biza bagosha bamukije munhu ha bulili alemahalile, nabo bukoba ha kungʼwingigija na kuntuula ku butongi wakwe.

¹⁹ Aho batabonile ha kungʼwingigija kulwa ibita, bulinha kwigulya ha numba, bumitija mu madafali ga higulya, bungʼwicha hagati hamo na kabulili kakwe ku butongi wa ngʼwa Yesu.

²⁰ Aho ubona kuzunya kwabo, ungʼwila giki, Ee, munhu, shibi shako shalekejiwa.

²¹ Huna bandiki na Bafarisayo bandia kwidedekanya, buhaya giki, Ni nani Uyu alihaya buduki kuli Mulungu? Nani wadula kulekeja shibi ulu ati Mulungu wike?

²² Aliyo Yesu umana kwidedekanya kwabo, ushosha ubawila giki, Mulidedekanya mu ngholo jingʼwe ni buli?

²³ Changu kili he, kuhaya giki, Shibi shako shalekejiwa, nulu kuhaya giki, Bukaga, ushiminze?

²⁴ Aliyo ngʼwitegeleje giki, Ngʼwana wa munhu ali na budula mu si kulekeja shibi,—ungʼwila nema,—Nakuwila bebe giki, Bukaga, ubuche kabulili kako, uje ku kaya yako.

²⁵ Haho na haho wimila ku butongi wabo, ukabucha ako walalalilile, uja kaya, alinkuja Mulungu.

²⁶ Na busangabazu bubadima bose, bunkuja Mulungu; bokala na boba, buhaya giki, Lelo twabonaga shamahano buli.

Yesu ungʼwitana Levi

²⁷ Hanuma ya iyi utuma uja, umona ntobisha, lina lyakwe Levi, igashije ngʼwitobelo, ungʼwila giki, Nilondelage.

²⁸ Nanghwe uleka shose, ubuka, unondela.

²⁹ Na Levi umegeja buhondo butale mu kaya yakwe: na bali bubiza ho batobisha bingi, na banhu bangi hoi abali bigashije hamo nabo ku shiliwa.

³⁰ Huna bandiki babo na Bafarisayo bubadugumila bahemba bakwe buhaya giki, Ni buli mukulyaga na kungʼwa hamo na batobisha na ba shibi?

³¹ Yesu ushosha ubawila giki, A bapanga bati na nguno ya kunkoba naguji, aliyo abalwalile.

³² Nene natizile kwitana batungilija, aliyo ba shibi bashike mu koya.

Mhayo gwa kudila nzala

³³ Aliyo bungʼwila giki, Ni buli bahemba ba ngʼwa Yohana bakadilaga nzala nghangala ningi na kulomba, na bahemba ba Bafarisayo nabo giko; aliyo bahemba bako bakulyaga na bungʼwa?

³⁴ Ubawila giki, Ngʼwadula kubadija nzala biye ba ntoji, aho ntoji atali ali hamo nabo?

³⁵ Aliyo shiku jiliza aho ntoji alamala kwinjiwa mubo, hunaho lulu baladila nzala mu shiku jenijo.

³⁶ Ubalungalungila mu kigemenghejo. Ati ho munhu uyo usumila kidaso cha kizwalo kipya ha kizwalo kikulukulu; ulu wita giko, ukitandula i kipya, na hangi kidaso ichufuma ha kipya kwigwindanya na kikulukulu.

³⁷ Hangi ati ho munhu uyo utuula minzi ga mizabibu mapya mu mhinda nghulukulu; ulu wita giko, minzi ga mizabibu mapya gakutumula mhinda, nago gakwidika, na mhinda jikukenaguka.

³⁸ Aliyo minzi ga mizabibu mapya shigelile kutuulwa mu mhinda mhya, huna lulu bubili washo shikala shipanga.

³⁹ Hangi ati ho munhu aho wangʼwaga minzi ga mizabibu ga kale atogilwe mapya; iki uhaya giki, A ga kale gali ga wiza kutinda.