Luka 3 - Ilagano Ipya Lya

Bulomeji wa ngʼwa Yohana Matija

¹ Mu ngʼwaka gwa ikumi na itano gwa busugi wa ngʼwa Kaisari Tiberio, Pontio Pilato walali gavana wa Buyudaya, na Herode walali ntemi wa Galilaya, na Filipo, ngʼwana wa ngʼwawe, walali ntemi wa It urea na si ya Trakoniti, na Lusania walali ntemi wa Abilene.

² Mu shiku ja bugabiji butale wa ngʼwa Anna na Kayafa, mhayo gwa Mulungu gwiza kuli Yohana, ngʼwana wa Zakaria, mu bu.

³ Nanghwe ushika mu si iyo yose ibimbikanilwe na Yordani, ubyulomela kubatija kwa koya kwa kushika mu kulekejiwa kwa shibi.

⁴ Gitumo gwaandikwa mu kitabo cha mihayo ya nghangi Isaya, uhaya giki, Ilaka lya ngʼwenuyo akuhamukaga mu bu giki, Bejabejagi ipalapala lya Seba, gololagi nzila jakwe.

⁵ Buli itubilo lilokajiwa, na buli lugulu na itumbi shilalenganijiwa, ahigomagomile halagololwa, na nzila ja magagala jilasheshiwa.

⁶ Na ba mibili bose balabona bupiji wa Mulungu.

⁷ Huna lulu ubyugawila mabita agali giza kubatijiwa nanghwe giki, Bingʼwe bubyile wa shipili, nani wali umuhugula kubupela bupelanu ubuhaya kwiza?

⁸ Kulwa iyi itagi matwajo agigelelilwe na koya; nulu mutizandia kuhaya mu mioyo yingʼwe giki, Tuli na nkulugenji wiswe, Abrahamu; iki namuwila giki, Mulungu wadula mu mawe aya kunjukija Abrahamu bana.

⁹ Na haha mbasa yatuulagwa ha nji gwa miti: kulwa iyi buli nti gose ugututwajaga matwajo ga wiza gukengʼenhwa, guponyiwa mu moto.

¹⁰ Na mabita gumuja, guhaya giki, Twite kinahe lulu?

¹¹ Ushosha ubawila giki, Uyo ali na nghanjo ibili, angabe imo uyo ati nayo; na uyo ali na shiliwa, nanghwe ite chene.

¹² Batobisha nabo biza kubatijiwa, bungʼwila giki, Nangi, a biswe twite kinahe?

¹³ Ubawila giki, Mutatobishage kukilanya isho ngʼwalagililwe.

¹⁴ Bashilikale nabo bumuja, buhaya giki, Na biswe twite kinahe? Ubawila giki, Mutizungʼwibonela munhu ose nulu kumula ya bulomolomo, hangi bizagi ngʼwafujiwa na mhela yingʼwe.

¹⁵ Hunaho banhu bubyuhanahana, bungʼwidedekanya Yohana mu ngholo jabo giki, Ulu ngʼwenuyo ngʼwene Kristo, himba yaya;

¹⁶ Yohana ushosha ubawila bose giki, Nene hene ndimubatija na minzi; aliyo izile Uyo anikilile nguzu, Ngʼwenuyo natigelelilwe nulu kuntaligulila mikoba ya shilatu shakwe; Ngʼwenuyo akumubatija na Moyo Ngʼwela na moto;

¹⁷ Uyo ihehelo lyakwe lili mu nkono gwakwe, akulweja gete lubuga lwakwe, ngano alajibika mu kikolo chakwe; aliyo mela alagatwima na moto ugutujima.

¹⁸ Ubalomela banhu evangeli mu buganikiji wingi bungi na bungi.

¹⁹ Aliyo ntemi Herode aho wali uhugulwa nanghwe kulwa nguno ya ngʼwa Herodia u nke wa ngʼwa Filipo ngʼwana wa ngʼwawe, na kulwa mihayo ya bubi yose iyo Herode wali wita,

²⁰ Ongeja ku iyo na mhayo uyu, umfunga Yohana mu jela.

Kubatijiwa kwa ngʼwa Yesu

²¹ Yubiza aho banhu bose bali bubatijiwa, na Yesu aho ubatijiwa na ulomba, igulu lyukunduka,

²² Na Moyo Ngʼwela ungʼwikila mu chikolile cha mili giti nghuulu, na ilaka lyufuma ngʼwigulu lyuhaya giki, Bebe uh Ngʼwana wane ntogwa; muli Bebe nayejiwa gete.

Kibyalilwe cha ngʼwa Yesu

²³ Na Yesu Ngʼwenekele aho wandia kulanga walali wa miaka giti makumi adatu, uhanahanwa giki, ali ngʼwana wa ngʼwa Yusufu, u wa ngʼwa Eli,

²⁴ U wa ngʼwa Mathati, u wa ngʼwa Levi, u wa ngʼwa Melki, u wa ngʼwa Yanna, u wa ngʼwa Yusufu,

²⁵ U wa ngʼwa Matathia, u wa ngʼwa Amosi, u wa ngʼwa Nahumu, u wa ngʼwa Esli, u wa ngʼwa Nagai.

²⁶ U wa ngʼwa Maathi, u wa ngʼwa Matathia, u wa ngʼwa Semei, u wa ngʼwa Yusufu, u wa ngʼwa Yuda.

²⁷ U wa ngʼwa Yoana, u wa ngʼwa Resa, u wa ngʼwa Zorobabeli, u wa ngʼwa Salathieli, u wa ngʼwa Neri.

²⁸ U wa ngʼwa Melki, u wa ngʼwa Adi, u wa ngʼwa Kosamu, u wa ngʼwa Elmadamu, u wa ngʼwa Eri,

²⁹ U wa ngʼwa Yoshua, u wa ngʼwa Eliezeri, u wa ngʼwa Yorimu, u wa ngʼwa Mathati, u wa ngʼwa Levi,

³⁰ U wa ngʼwa Simeoni, u wa ngʼwa Yuda, u wa ngʼwa Yusufu, u wa ngʼwa Yonamu, u wa ngʼwa Eliakimu.

³¹ U wa ngʼwa Melea, u wa ngʼwa Maina, u wa ngʼwa Matatha, u wa ngʼwa Nathani, u wa ngʼwa Daudi,

³² U wa ngʼwa Yesai, u wa ngʼwa Obedi, u wa ngʼwa Boazi, u wa ngʼwa Salmoni, u wa ngʼwa Naasoni,

³³ U wa ngʼwa Aminadabu, u wa ngʼwa Aramu, u wa ngʼwa Esromu, u wa ngʼwa Faresi, u wa ngʼwa Yuda,

³⁴ U wa ngʼwa Yakobo, u wa ngʼwa Isaaka, u wa ngʼwa Abrahamu, u wa ngʼwa Tera, u wa ngʼwa Nahori,

³⁵ U wa ngʼwa Saruhu, u wa ngʼwa Ragau, u wa ngʼwa Faleki, u wa ngʼwa Eberi, u wa ngʼwa Saia,

³⁶ U wa ngʼwa Kainani, u wa ngʼwa Arifaksadi, u wa ngʼwa Shemu, u wa ngʼwa Nuhu, u wa ngʼwa Lameki,

³⁷ U wa ngʼwa Mathusala, u wa ngʼwa Enoka, u wa ngʼwa Yaredi, u wa ngʼwa Maleleeli, u wa ngʼwa Kainani,

³⁸ U wa ngʼwa Enosi, u wa ngʼwa Sethi, u wa ngʼwa Adamu, u wa ngʼwa Mulungu.