Luka 23 - Ilagano Ipya Lya

Yesu ngʼwibanza lya ngʼwa Pilato (Mt. 27.1-2, 11-14; Mk. 15.1-5; Yh. 18.28-40; 19.1-16)

¹ Huna bubuka bose ba ibanza lyabo, buntwala kuli Pilato.

² Bandia kumula, buhaya giki, Ngʼwenuyu twamona akugomyaga ihanga lyiswe, na kubalemeja banhu kuntobela Kaisari kodi, akwihayaga ngʼwenekele giki, ali Kristo, ntemi.

³ Pilato umuja, uhaya giki, U Bebe hu uli ntemi wa Bayudaya? Unshokeja uhaya giki, Ili chene, wahayaga.

⁴ Pilato ubawila bagabiji batale na mabita giki, Natubona bubihya bose muli munhu uyu.

⁵ Aliyo bugagana buhaya giki, Akubahumbulaga banhu, akalangaga mu Buyudaya yose, kufuma Galilaya kushisha nu kunu.

Yesu ku butongi wa Herode

⁶ Aho Pilato wigwa ya Galilaya, ubuja ulu munhu Uyu ali muna Galilaya.

⁷ Aho umana giki, ali wa busugi wa ngʼwa Herode, untuma kuli Herode, iki ngʼwenuyo nanghwe walali mu Yerusalemi mu shiku jenijo.

⁸ Aho Herode umona Yesu, uyega no; iki kufuma kale walatogilwe kumona, iki waangʼwigwaga nghulu jakwe, hangi wisagilwa kubona kimanikijo chitwe nanghwe.

⁹ Umuja mihayo mingi, aliyo Wei atanshokegije mhayo.

¹⁰ Bagabiji batale na bandiki bali bimila, bugagana niyo no kumula.

¹¹ Aho Herode na bashilikale bakwe bumbyeda na kungimba kichilu, bunzwika kizwalo cha kungʼwekangʼweka, huna unshosha kuli Pilato.

¹² Lwise lwene Herode na Pilato bunonya bunwani; iki i kwandia bali bali na wanishi benekele na benekele.

Yesu nulu Barabba

¹³ Aho Pilato wali ubitana hamo a bagabiji batale na basugi na banhu,

¹⁴ Ubawila giki, Ngʼwangʼwenhaga munhu uyu kuli nene, giti umo akubagomyaga banhu; nane lolagi, namugilija mu miso gingʼwe, natabonile bubihya muli munhu uyu mu yose iyo mulimula;

¹⁵ Nulu Herode yaya, iki namutuma kuli wei: hangi Iola, atitile mhayo gwa kungʼwigelelwa kucha:

¹⁶ Kulwa iyo, nantule, huna nakuntaligulila.

¹⁷ Iki uhadikijiwa na chimile kubataligulilila ntungwa umo a ha Pasaka.

¹⁸ Buhoyokela bose hamo, buhaya giki, Ngʼwinjage uyu, ututaligulilile Barabba;

¹⁹ Ngʼwenuyo munhu uwaatungwa mu jela kulwa bugomi uwilwa mu nzengo, na kulwa bubulagi.

²⁰ Kulwa iyo Pilato ulungalunga nabo hangi, iki walatogilwe kuntaligulila Yesu.

²¹ Aliyo buyoga buhaya giki, Ni akomagwe, ni akomagwe.

²² Ubawila lukangala lwa kadatu giki, Ni nguno ki? Ngʼwenuyu witaga bubi ki? Natabonile kubihya muli wei kwa kumulaga; kulwa iyo nakuntula, huna nakuntaligulila.

²³ Aliyo boi bugagana na malaka matale, bungʼwikumbilija giki, Wei akongʼwe. Na malaka gabo na ga bagabiji batale gutinda.

²⁴ Pilato utina lubanza yitwe gitumo bunomba.

²⁵ Ubataligulilila uyo waatungwa mu jela kulwa bugomi na bubulagi, ngʼwenuyo balunombaga; aliyo u Yesu ungʼwinha ko bangʼwitile gitumo batogelilwe.

Yesu ukongʼwa

²⁶ Aho balintwala bundima Simoni muna Kurene afumile mu ngunda, bunseseja nsalaba, agubuche hanuma ya ngʼwa Yesu.

²⁷ Ibita itale lya banhu, na lya bakima abali bitula kikuba, na kunila nghungu, lyunondela.

²⁸ Aliyo Yesu ubagalukila, uhaya giki, Bingʼwe bashike ba Yerusalemi, mutanililage Nene, aliyo ngʼwilile benekele na bana bingʼwe.

²⁹ Iki lolagi, shiku jiliza, aho balahaya giki, Bali na lubango bagumba, na nda jitinabyala, na mbele jitinonhya.

³⁰ Hunaho balandia kujiwila ngulu giki, Mutugwile ho; na kugawila matumbi giki, Mutukundikijage.

³¹ Iki ulu bita mihayo iyi mu linti ibisi, mu lyumu ikubiza kinahe?

³² Butwalwa na bangi babili bakenaguji, kubulagwa hamo nanghwe.

³³ Aho bushika kwipande ilikitanagwa lupanga, bunkomela kwene, na bakenaguji abo, umo ku nkono gwa bulyo nu ungi ku nkono gwa lumoso.

³⁴ Yesu uhaya giki, Baba, ubalekeje; iki batamanile iyo bakwitaga. Nabo bugabanha shizwalo shakwe bushesa.

³⁵ Banhu bimila bakulolaga. Na basugi hamo nabo, bunugulanugula, buhaya gild, Walubapijaga bangi: ni ipijage ngʼwenekele, ulu Wei ali Kristo wa Mulungu u nsolwa wakwe.

³⁶ A bashilikale nabo bungimba kichilu, bungʼwegela, bungʼwinhilija bugota bululu,

³⁷ Buhaya giki, Ulu Bebe uli ntemi wa Bayudaya, wipije Bebe ngʼwenekele.

³⁸ Hangi chandikile chali kili ho higulya yakwe, ichandikwa mu nuguta ja Kigriki, na Kirumi na Kihebrania giki, UYU NGʼWENE NTEMI WA BAYUDAYA.

Ngʼwibi umo ubiza nzunya

³⁹ Umo wabo a bakenaguji abusungwa unduka, uhaya giki, Ambu, Bebe uli Kristo? Wipije Bebe ngʼwenekele na biswe.

⁴⁰ U ungi ushosha, unemeja, uhaya giki, Bebe, utungʼogohaga nulu Mulungu, bebe uli mu nsango gumo nanghwe?

⁴¹ Hangi biswe twagunyiwagwa nghana; iki biswe tuliyanukula mhela iyigelelilwe iyo tukitaga; aliyo Ngʼwenuyu walatitaga mhayo gutigelile.

⁴² Huna ungʼwila Yesu giki, Seba, nizukagwe aho uliza mu butemi wako.

⁴³ Yesu ungʼwila giki, Nghana nakuwila giki, Lelo ukubiza hamo na Nene mu ngunda gwa Mulungu.

Kucha kwa ngʼwa Yesu

⁴⁴ Hunaho yushika giti saa itandatu, yubiza giiti ku si yose kushisha saa kenda.

⁴⁵ Limi lyali lilabula; na iselema lya mu hekalu ly utanduka hagati.

⁴⁶ Huna Yesu ulila na ilaka itale, uhaya giki, Baba, nagutuula moyo gwane mu makono gako. Aho umala kuhaya yeniyi, wiyinha ko bupanga.

⁴⁷ Aho ntale wa bashilikale igana ubona iyo yali yubiza ho, unkuja Mulungu, uhaya giki, Nghana munhu Ngʼwenuyo walali ntungilija.

⁴⁸ Na mabita gose agibilingila kuyilola mihayo iyi, aho bubona iyo yali yubiza ho, bushoka balitulagula shikuba shabo.

⁴⁹ Nabo bose abali bimane bakwe, na bakima abali budimana nanghwe kufuma Galilaya, bimila kule bilolela yeniyi.

Yesu ujikwa

⁵⁰ Na lolaga, ngosha umo lina lyakwe Yusufu, namhala wa ibanza, munhu wa wiza, hangi ntungilija;

⁵¹ (Ngʼwenuyo walatazunije longʼwe yabo nulu kitile kabo), azengile Arimathaya, nzengo gwa Bayudaya, walalindilile butemi wa Mulungu;

⁵² U ngʼwene uja kuli Pilato, ugulomba mimba gwa ngʼwa Yesu.

⁵³ Ugusungula, ugulingila mu ngʼwenda gwa kitani, ugulaja mu nze iyali yupunzwa mu kiganga, umo mimba gutinalajiwa na kamo.

⁵⁴ Lwise lwene lwali luli lushiku lwa kulonjalonja, na Sabato yali yuhaya kugegeleja.

⁵⁵ Bakima abali biza hamo nanghwe kufuma Galilaya, bunondela, bukibona kigila, na mimba gwakwe umo gwali gulajiwa mo.

⁵⁶ Bushoka, bushilonja ndago na maguta ga ngazu, na ha Sabato bifula giti kilagilo umo kili.