Luka 22 - Ilagano Ipya Lya

Bulomane wa kumulaga

¹ Hunaho kilile cha migati iti na kibimbya, icho kikitanagwa Pasaka, chegela.

² Na bagabiji batale na bandiki bubyukoba nzila ya kumulaga; iki bali bubogoha banhu.

³ Shetani akingila muli Yuda uyo akitanagwa Iskariota, ngʼwene umo wa benabo ikumi na babili.

⁴ U wei ufuma, uja, ulomana na bagabiji batale, na batale ba bashilikale nzila umo akungʼwinhila ko kubo.

⁵ Nabo buyega, bulagana kungʼwinha feza.

⁶ Nanghwe ulagana, ukoba ngʼwanya gwa kungʼwinhila ko kubo aho ibita liti ho.

Kulonjiwa kwa Pasaka

⁷ Huna lukashika lushiku lwa migati iyiti na kibimbya, aho yali yigelile kutambila Pasaka.

⁸ Ubatuma Petro na Yohana, uhaya giki, Jagi, mukatulongeje Pasaka, twilye.

⁹ Nabo bungʼwila giki, Utogilwe tukalongeje hali?

¹⁰ Nanghwe ubawila giki, Lolagi, aho ngʼwingila mu nzengo, akumanhya na bingʼwe ngosha uyo abukije luno lwa minzi; munondele mu numba iyo alingile mo;

¹¹ Ningʼwe mukungʼwila namugi giki, Nangi wakuwila giki, Chumba cha ngeni kili hali, umo nalile Pasaka hamo na bahemba bane?

¹² Ngʼwenuyo akungʼolekeja chumba kitale cha mu gorofa chabejabejiwa; ngʼwenumo mulonje.

¹³ Buja, bubona gitumo wali wabawilila: nabo buyilonja Pasaka.

Pasaka ya kumalija

¹⁴ Aho ikanza lyushika, Wei wigasha ku shiliwa, na batungʼwa hamo nanghwe.

¹⁵ Na ubawila giki, Kukukumbula, nakubabulaga no kulya Pasaka iyi hamo na bingʼwe, aho natali kunyajanyajiwa;

¹⁶ Iki namuwila giki, Natalayilya na hado hangi, kushisha aho ilashikilijiwa mu butemi wa Mulungu.

¹⁷ Akachanukula kikombe, aho ulumba, uhaya giki, Dimagi iki, ngʼwelagi mo bose:

¹⁸ Iki namuwila giki, Natalangʼwa na hado hangi ku matwajo ga mizabibu kushisha butemi wa Mulungu aho wizile.

Yesu utuula ho kusangila kwela

¹⁹ Udima ngati, aho ulumba, ugumeganya, ubinha, uhaya giki, Uyu gwene mili gwane, ugwinhagwa ko kulwa nguno yingʼwe; mulitage giko mu kunizukwa Nene;

²⁰ Na kikombe nacho giko hanuma ya kulagila, uhaya giki, Kikombe iki chene ilagano ipya mu mininga gane, agitwa kulwa nguno yingʼwe.

²¹ Aliyo, lolagi, nkono gwa ngʼwenuyo alininha ko guli hamo na Nene ha meza;

²² Iki Ngʼwana wa munhu ajile gitumo yaalagilwa; aliyo alasangwa ngʼwenuyo alininha ko.

²³ Nabo bandia kwibugilija benekele na benekele giki, ni nani mubo uyo alite mhayo uyu.

²⁴ Ikabiza ho na halali mubo giki, ni nani mubo uyo wiganikwa kubiza ntale.

²⁵ Ubawila giki, Batemi ba bana mahanga bubasuga; nabo abali na budula kubo, bitanwa batungilija.

²⁶ Aliyo ku bingʼwe iti giko; aliyo uyo ntale mu bingʼwe abize giti liu ndo, na uyo ntongeji abize giti uyo akwinhilijaga.

²⁷ Iki ntale ni nani, uyo wigasha ku shiliwa, nulu uyo akwinhilijaga? Angu, ati uyo wigasha ku shiliwa? aliyo Nene ndi hagati yingʼwe giti uyo akwinhilijaga.

²⁸ Aliyo bingʼwe muli abo mukashingaga hamo na Nene mu makugengʼwa gane.

²⁹ Na Nene namubikila butemi, gitumo Baba waanibikila Nene;

³⁰ Mulye na kungʼwa ku meza yane mu butemi wane; na kwigasha ha masumbi ga butemi, mulabyulekanya misango ngʼanda ikumi na ibili ja Israeli.

Yesu uhanga giki, Petro akunema

³¹ Seba uhaya giki, Simoni, Simoni, lolaga, Shetani amutogilwe bingʼwe kumusungula giti ngano;

³² Aliyo Nene nakulombelaga bebe, kuzunya kwako kutizuleba; nangho aho ukumala kugaluka, ubalambye baduguyo.

³³ Nanghwe ungʼwila giki, Seba, namalilile kuja hamo na Bebe nulu mu jela nulu mu kucha.

³⁴ Uhaya giki, Nakuwila bebe, Petro, nghungulume aho itali kuhila lelo iyi, ukunilema nghangala idatu giki, utanimanile.

³⁵ Wali ubawila giki, Aho nali numutuma muti na kabogoshi ka feza, nulu mhinda, nulu shilatu, angu, mukagayiwa kinhu? Buhaya giki, Yaya.

³⁶ Ubawila giki, Aliyo hambunyu uyo ali na kabogoshi ka feza akatwale, na mhinda nayo chene; nuyuyo ati nalyo lilushu ajinje kizwalo chakwe aligule.

³⁷ Iki namuwila giki, Uyu gwaandikwa shigelile kushikilijiwa muli Nene giki, Wali ubalwa hamo na bagomi: iki iyo bigelelilwe Nene ili na ngelelo.

³⁸ Buhaya giki, Seba, lolaga, malushu gaya abili. Ubawila giki, Gigelaga.

³⁹ Utuma uja ku lugulu lwa Mizeituni gitumo chimile chakwe umo chali kili, na bahemba bakwe nabo bunondela.

Yesu ulomba mu Gethsemane

⁴⁰ Aho ushika kwipande ilo ubawila giki, Lombagi mutizingila mu kugengʼwa.

⁴¹ Nanghwe ubisunda kakule ho giti ka kuponya iwe; utuja mazwi ulomba,

⁴² Uhaya giki, Baba, ulu utogilwe, uningije ho kikombe iki; nahene iti iyo natogilwe Nene, aliyo yako Bebe yitwe.

⁴³ Malaika ungʼwilongela kufumila ngʼwigulu, unguzuhya.

⁴⁴ Nanghwe iki ubiza mu buganghizu, ongeja no kulomba; ngʼuyilo gwakwe gubiza giti magili ga mininga, gakugwaga hasi.

⁴⁵ Aho ubuka mu kulomba, wiza ku bahemba bakwe, ubasanga bashutulile kulwa bupina.

⁴⁶ Ubawila giki, Mulishutula ni buli? bukagi, mulombe, mutizingila mu kugengʼwa.

Yuda ushika na ibita kundima

⁴⁷ Aho walatali ulungalunga, lolaga, ibita na uyo akitanagwa Yuda, umo wabo ikumi na babili, abatongelile; ungʼwegela Yesu ambipe.

⁴⁸ Aliyo Yesu ungʼwila giki, Yuda, ulingʼwinha ko Ngʼwana wa munhu mu kumbipa?

⁴⁹ Benabo abali bali hamo nanghwe, aho bubona iyuhaya kubiza ho, buhaya giki, Seba, tubateme na malushu?

⁵⁰ Umo wabo untema nsese wa ngabiji ntale, umuta kutu gwa bulyo.

⁵¹ Yesu ushosha uhaya giki, Lekagi giko. Unkinda ha kutu gwakwe, umpija.

⁵² Yesu ubawila bagabiji batale, na batale ba hekalu, na banamhala abali bungʼwizila giki, Ngʼwizaga giti kuli nsambo, na malushu na milanga?

⁵³ Aho nalubizaga hamo na bingʼwe buli lushiku mu hekalu, mutanigololelaga makono kunidima; ali gisi, ili lyene ikanza lyingʼwe, na budula wa giiti.

Petro unema Yesu

⁵⁴ Bunghaja, buntwala, bungʼwingija mu numba ya ngabiji ntale. Aliyo Petro unondela kakule ho.

⁵⁵ Aho bali bupemba moto hagati ya kibuga, bigasha kihamo, Petro wigasha mugati yabo.

⁵⁶ Hunaho ntumami nkima umo, aho umona igashije ha bulengela wa moto, unkalalila, uhaya giki, Ambu, ngʼwenuyu wali hamo nanghwe.

⁵⁷ Aliyo unema Wei, uhaya giki, Nkima bebe, natamanile Ngʼwenuyo.

⁵⁸ Hanuma ya kakanza kado, ungi umona, uhaya giki, Nu bebe uli ngʼwichabo. Aliyo Petro uhaya giki, Munhu bebe, nati nene.

⁵⁹ Hanuma ya ikanza giti lya saa imo, ungi ugagana, uhaya giki, Nghana ngʼwenuyu wali hamo nanghwe; iki nu wei ali muna Galilaya.

⁶⁰ Aliyo Petro uhaya giki, Munhu bebe, natamanile iyi ulihaya. Kuhayumanila aho atali ulungalunga, nghungulume yuhila.

⁶¹ Hunaho Seba ugaluka, unola Petro; na Petro ugwizukwa mhayo gwa Seba uyo wali wangʼwila giki, Lelo aho nghungulume itinahila, ukunilema nghangala idatu.

⁶² Ufuma hanze ulila no shisoji.

⁶³ Na bagosha bundima Yesu, bungimba kichilu, buntulagula.

⁶⁴ Aho bunkundikija miso, bubyumpala ha bushu, bumuja buhaya giki, Mani jaga; nani uyo wakutula?

⁶⁵ Na yingi mingi bungʼwila mu budukaguji.

Yesu ngʼwibanza lya banamhala

⁶⁶ Aho wela, banamhala ba banhu bikuminga hamo na bagabiji batale na bandiki; buntwala ngʼwibanza lyabo, buhaya giki,

⁶⁷ Ulu Bebe uli Kristo, tuwilage? Ubawila giki, Nulu namuwile mutuguzunya na hado;

⁶⁸ Hangi nulu nakumubuja, mutunishokeja na hado nulu kunilekela.

⁶⁹ Aliyo kufuma haha Ngʼwana wa munhu akubikala igashije ku nkono gwa bulyo gwa budula wa Mulungu.

⁷⁰ Bose buhaya giki, U Bebe bu uli Ngʼwana wa Mulungu lulu? Ubawila giki, Gitumo mulihayila ndi Ngʼwene.

⁷¹ Nabo buhaya giki, Tuli na nimo ki hangi na bukaniji? iki biswe benekele twigwaga kufuma mu nomo gwakwe.