Luka 21 - Ilagano Ipya Lya

Inongho lya nkima nchilwa

¹ Huna ubucha miso, ubabona basabi balituula sha kwinha shabo ngʼwibikilo.

² Umona nu nchilwa umo nghabi utuula mo tusenti tubili.

³ Uhaya giki, Nghana namuwila giki, Nchilwa ngʼwenuyu nghabi, watuulaga mo ningi kutinda bose;

⁴ Iki benaba bose kufuma mu bukwija wabo batulilaga mo mu sha kwinha kuli Mulungu; aliyo wei mu bukunese wakwe watuulaga mo shose sha bupanga isho walali nasho.

Lulomelo lwa ha Lugulu lwa Mizeituni (Mt. 24 na 25; Mk. 13 ) Kukundulwa kwa hekalu

⁵ Aho bamo bali bilunjalunja ya hekalu umo yaagalili lwa na mawe ga wiza, na shikolo shaafunyiwa, uhaya giki,

⁶ Ishi mulishilola, shiku jiliza, aho litalalekwa ho iwe limo higulya ya iwe liye, ilo litalakandulwa.

⁷ Bumuja buhaya giki, Nangi, mihayo iyi ilabiza nanali lulu? Na kimanikijo kilabiza ki aho yeniyi ikuhaya kubiza ho?

Ya kushoka kwakwe

⁸ Uhaya giki, Ilanghanagi mutizulembalemva; iki bingi baliza mu lina lyane, balabyuhaya giki, Nene ndi ngʼwene; hangi giki, Ikanza lyegelaga. Mutizubalondela.

⁹ Aliyo aho muligwa nghulu ja bulugu, na mawiyubukiji, mutizuhaha; iki iyi shigelile kubiza ho tame; aliyo nghalilo itiza haho na haho.

¹⁰ Hunaho ubyubawila giki, Ihanga lilubukila ihanga liye, na butemi bulubukila butemi wiye;

¹¹ Galabiza ho manyahinga matale na mayala na mahuya mu mapande gangi na gangi; mahahya na shimanikijo shitale kufuma ngʼwigulu shilabiza ho.

¹² Aliyo isho shose aho shitiniza, balamudima na kumuluhyaluhya; balangʼwinha ko bingʼwe ku mabilingilo na mu jela, na kumutwala mu butongi wa batemi na bagavana kulwa nguno ya lina lyane.

¹³ Aliyo yeniyo ilagaluka kubiza bukaniji wingʼwe.

¹⁴ Kulwa iyi, ngʼwidimye mu ngholo jingʼwe giki, mutizidedekanya tame i ya kushosha;

¹⁵ Iki Nene nakungʼwinha nomo na masala, ayo banishi bingʼwe bose bataladula kugahalalija nulu kugahangija.

¹⁶ Aliyo mulinhiwa ko nulu na babyaji bingʼwe, na bana ba ngʼwingʼwe, na badugu bingʼwe, na banwani bichingʼwe, na bamo ku bingʼwe balamubulaja.

¹⁷ Na banhu bose balamukolwa kulwa nguno ya lina lyane.

¹⁸ Aliyo nulu luywili lwa mitwe yingʼwe lutalajimila na hado.

¹⁹ Mu kwiyumilija kwingʼwe mulabupija bupanga wingʼwe.

²⁰ Aliyo aho mulabona Yerusalemi yupindiwa na mabita ga bashilikale, hunaho managi giki, Kukenagulwa kwayo kuli hihi.

²¹ Hunaho abali mu Buyudaya bapelele ku ngulu; nabo abali mugati yayo bafume moi; nabo abali mu magunguli, batizingila mo.

²² Iki jenijo jene shiku ja kuhwima njigu, mihayo yose yaandikwa ishikilijiwe.

²³ Balasangwa abali nda na bakonhyaga mu shiku jenijo! iki bulabiza buzwangani butale ku si, na bupelanu ku banhu aba.

²⁴ Balagwishiwa na bugi wa lilushu, baladingʼwa busese kutwalwa kushisha ku mahanga gose; nayo Yerusalemi ilapandagilwa na bana mahanga, kushisha ikanza lya bana mahanga aho lilashikilijiwa.

²⁵ Hangi shilabiza ho shimanikijo mu limi na ngʼweji na sonda; na ha si mahanga galatawatawa hamo na kwiganilija kulwa kulunduma kwa nyanza na mahuli;

²⁶ Banhu balagwa ngholo budedebala kulwa boba na kulwa kulolela iyo ikwizaga mu si; iki mabudula ga ngʼwigulu galanegenyiwa.

²⁷ Hunaho balamona Ngʼwana wa munhu akwizaga ngʼwilunde na budula na ikujo itale.

²⁸ Aliyo mihayo yeniyi aho ilandia kubiza ho langamilagi, mubuche mitwe yingʼwe: iki kukomolwa kwingʼwe kuli hihi.

Kigemenghejo cha nti ntini

²⁹ Akabawila kigemenghejo giki, Gulolagi nti ntini na miti yose;

³⁰ Aho ngʼwibona yafuluma mumanile benekele giki, Ikanza lya magesa lili hihi.

³¹ Na bingʼwe giko, aho mulibona mihayo iyi ikwitaga, managi giki, butemi wa Mulungu buli hihi.

³² Nghana namuwila giki, Kibyalilwe iki kitalabita kushisha iyi yose ilabiza ho.

³³ Igulu na si shilabita, aliyo mihayo yane italabita.

Ya kwikala miso

³⁴ Ali lulu, ilanghanagi ngholo jingʼwe jitizudidohiwa na bulaku na kukolwa walwa, na kukoyakoyela bupanga ubu, lushiku lwenulo lutizumufumbukija:

³⁵ Iki giti ilunda, lulabiziila bose abali higulya ha si yose.

³⁶ Kulwa iyo, ikalagi miso mu buli ikanza, mulilomba, mubize ababalwa ngʼwigelelilwe kupila mu iyi yose ilihaya kubiza ho, na hangi kwimila mu butongi wa Ngʼwana wa munhu.

³⁷ Buli lushiku limi ubyulanga mu hekalu; na bujiku waafumaga uja ukalala mu lugulu lukitanagwa lwa Mizeituni.

³⁸ Na banhu bose biipunaga dilu makingo kuja kuli Wei mu hekalu kundegeleka.