Luka 2 - Ilagano Ipya Lya

Yesu ubyalwa

¹ Ikabiza mu shiku jenijo, kilagilo chali chufuma kuli Kaisari Augusto giki, ba si jose bandikwe mina gabo.

² U kwandikwa uku kwali kuli kwa kwandia aho Kurenio walali gavana wa Suria.

³ Banhu bose buja kwandikwa, buli munhu ku nzengo gwakwe.

⁴ Yusufu nanghwe winga Galilaya kufuma mu nzengo gwa Nazareti, ulinha uja Buyudaya, ku nzengo gwa ngʼwa Daudi, ugwitanwa Bethlehemu, iki walali wa numba na luganda ya ngʼwa Daudi;

⁵ Akandikwe hamo na Mariamu nke wakwe, uyo walanungije, nanghwe walali nda nhale.

⁶ Ikabiza aho bali batali bali ko, shiku jakwe ja kubyala jushikila,

⁷ Nanghwe umyala ngʼwana wakwe ngosha tangi, uningha mu ngʼwenda gwa chelele, na unaja ngʼwituli, iki hali hati ho hanhu ha kubigelwa mu numba ya bageni. Bamalaika na badimi

⁸ Bali bubiza ho badimi mu si yeniyo, bakwikalaga mu matogolo, bakulilanghanaga idale lyabo mu bujiku.

⁹ Huna malaika wa Seba wimila uko bali, na ikujo lya Seba lyubakila libatinganilile, na bogoha na kogoha kutale.

¹⁰ Na malaika ubawila giki, Mutizogoha, iki nangʼwenhela nghulu ja wiza ja buyegi butale, ijikubiza ku banhu bose;

¹¹ Iki lelo, mu nzengo gwa ngʼwa Daudi, ngʼwabyaiilagwa Mpija, ngʼwene Kristo Seba.

¹² Na kimanikijo ku bingʼwe kikubiza giki, mukumona ngʼwana ngʼwelele alingililwe mu ngʼwenda gwa chelele, alalile ngʼwituli.

¹³ Kuhayumanila bubiza ho hamo na malaika ngʼwenuyo bingi ba ibita lya ngʼwigulu, balinkumilija Mulungu, buhaya giki,

¹⁴ Ikujo libize kuli Mulungu higulya no, na mhola ibize mu si mu banhu abanyeja.

¹⁵ Na yubiza aho bamalaika bakwinhaga kubo bajile ngʼwigulu, badimi biwila giki, Tuje Bethlehemu, tukabone mhayo uyu ugwitagwa, uyo Seba watumanikijaga.

¹⁶ Nabo bihuta buja bukabasanga Mariamu na Yusufu, na ngʼwana ngʼwelele alalile ngʼwituli.

¹⁷ Aho bumona, bugukumucha mhayo uyo bali buwilwa gwa ngʼwana ngʼwenuyu.

¹⁸ Na bose abali bigwa bukumya iyo buwilwa na badimi.

¹⁹ Aliyo Mariamu wibika mihayo iyi yose, uyidedekanya mu ngholo yakwe.

²⁰ Huna badimi bushoka, balinkuja na kunumba Mulungu, kulwa mihayo yose iyo bigwaga na bibonaga, gitumo bali bawililwa.

Kusalwa kwa ngʼwa Yesu

²¹ Aho shiku inane jali jushikila ja kunsala ngʼwana, bungʼwilika lina lyakwe Yesu, ilo wali wilikwa na malaika aho walatali kutungilwa nda.

²² Aho shiku ja kwejiwa kwabo jali jushikila, gitumo shilagilo sha ngʼwa Musa umo shili, bungʼwenha Yerusalemi kungʼwinha kuli Seba,

²³ Gitumo yaandikwa mu shilagilo sha Seba giki, Buli ngʼwana ngosha uyo wahangula nda ya ngʼwa nina alitanwa ngʼwela kuli Seba;

²⁴ Na bafunye kitambo gitumo yuhayiwa mu shilagilo sha Seba giki, nghuulu ibili nulu tukune tubili twa mhunda.

Kukumilija kwa ngʼwa Simeoni na Anna

²⁵ Na mu Yerusalemi walali mo munhu, lina lyakwe Simeoni, munhu ngʼwenuyu walali ntungilija na wa logohano, hangi akukulindilaga kulungujiwa kwa Israeli, na Moyo Ngʼwela ubiza hali wei.

²⁶ Nanghwe wali umanikijiwa na Moyo Ngʼwela giki, atalabona kucha kushisha amone Kristo wa Seba tame.

²⁷ Wali wingila mu hekalu, atongelilwe na Moyo; na babyaji aho bali bungʼwenha mo u ngʼwana Yesu, bangʼwitile gitumo shimile sha shilagilo umo shili,

²⁸ Ngʼwenuyo unela mu makono gakwe, na unumba Mulungu, uhaya giki,

²⁹ Seba, haha lulu wanizunilija nsese wako ninge mu mhola, gitumo Bebe waahaya;

³⁰ Iki miso gane gabonaga bupiji wako,

³¹ Ubo wabulongije mu miso ga banhu bose;

³² I lisana lya kubakundulila bana mahanga, na ikujo lya banhu bako Israeli.

³³ Na Yusufu na nina buyikumya mihayo iyuhayiwa ya kuli Wei.

³⁴ Na Simeoni ubasungulila lubango, ungʼwila nina Mariamu giki, Ngʼwenuyu watuulwa ho bagwe na bimile bingi mu Israeli, hangi kubiza kimanikijo ikilahalalijiwa.

³⁵ Na bebe nangho, lilushu likupulunghanya bupanga wako; giki, maganiko ga ngholo ningi gakundulwe.

³⁶ Walali ho Anna, nghangi nkima, ngʼwana wa ngʼwa Fanueli, wa luganda lwa ngʼwa Asheri, uyo wagiguluhile no, wali wikala na ngoshi miaka mpungati kufuma bunhya wakwe.

³⁷ Na walali nchilwa hamo miaka makumi anane na ine, ngʼwenuyu walatingaga mu hekalu, aliyo utumamila mu kudila nzala na kulomba bujiku na limi.

³⁸ Nanghwe wiza mu kakanza kenako, unumba Seba, unghaya ku bose abakulindilaga kukomolwa mu Yerusalemi.

³⁹ Aho bumala mihayo yose gitumo shilagilo sha Seba umo shili, bushoka Galilaya, ku nzengo gwabo Nazareti.

⁴⁰ Ngʼwana ukula, uguzuhiwa mu moyo, izulile na masala, na kigongo cha Mulungu chubiza hali Wei. Nyanda Yesu hagati ya balangi

⁴¹ Na babyaji bakwe baajaga buli ngʼwaka Yerusalemi ku kilile cha Pasaka.

⁴² Aho ushisha miaka ikumi na ibili, bulinha kuja Yerusalemi gitumo chimile cha kilile umo kili.

⁴³ Na aho bujikalicha i shiku, aho balishoka, ngʼwana ngʼwenuyo Yesu wikendeleja mu Yerusalemi, na Yusufu na nina batayimanile.

⁴⁴ Aliyo iki bubamhija giki, ali ngʼwibita, buja lugendo lwa lushiku lumo, bunkobakoba mu badugu babo na bimane babo.

⁴⁵ Aho bungayiwa, bushokanya Yerusalemi, bakunkobaga.

⁴⁶ Na yubiza hanuma ya shiku idatu bumpandikila mu hekalu, igashije hagati ya balangi, ubadegeleka na kubabuja.

⁴⁷ Bose abungʼwigwa budedebala kulwa kwitegeleja kwakwe na mashosho gakwe.

⁴⁸ Nabo aho bumona buzunzumala; na nina ungʼwila giki, Ngʼwana wane, watwitilaga biswe giko ni buli? lolaga, so na nene twalukukobaga na isungu.

⁴⁹ Nanghwe ubawila giki, Ngʼwalunikobaga ni buli? ngʼwali mutamanile giki, shinigelile kubiza mu mihayo ya ngʼwa Baba?

⁵⁰ Nabo bali batitegeleja mhayo uyo wali ubawila.

⁵¹ Nanghwe wika hamo nabo, ushika Nazareti, ubalyehela; na nina wibika mihayo iyi yose mu ngholo yakwe.

⁵² Na Yesu ongeja mu masala na kukula, na mu kuganja kuli Mulungu na banhu.