Luka 19 - Ilagano Ipya Lya

Kagalukile ka ngʼwa Zakayo

¹ Aho wingila Yeriko, akubitaga mo.

² Na lolaga, walali ho munhu akitanagwa lina lyakwe Zakayo, ngʼwene ntale wa batobisha, hangi ubiza nsabi.

³ Nanghwe ukoba kumona Yesu umo ali; aliyo atudula kulwa ibita; iki ubiza nguhi.

⁴ Upela ku butongi, ulinha mu nkuyu giki, Amone; iki wali uhaya kubitila nzila yeniyo.

⁵ Aho Yesu ushika henaho, ulangamila, umona, ungʼwila giki, Zakayo, ikaga wangu; iki lelo shinigelile kwikala mu kaya yako.

⁶ Nanghwe wiyanguhilija kwika, ungʼwegeleja na kuyega.

⁷ Aho bubona, bose buduguma, buhaya giki, Waja kugeniha hali munhu wa shibi.

⁸ Zakayo wimila, ungʼwila Seba giki, Lolaga Seba, nusu ya shikolo shane nabinha bahabi; hangi ulu nanyekejaga munhu ose kinhu nulu kimo, nalinshokeja nghangala ine.

⁹ Yesu ungʼwila giki, Lelo iyi bupiji wizaga ha kaya iyi, iki uyu nanghwe ali ngʼwana wa ngʼwa Abrahamu.

¹⁰ Iki Ngʼwana wa munhu wizile bukobakoba na kupija icho chaajimila.

Kigemenghejo cha ratili ikumi ja feza

¹¹ Aho batali budegeleka mihayo iyi, Wei ongeja kubawila kigemenghejo, iki walali hihi na Yerusalemi, na hangi iki benabo biganika giki, butemi wa Mulungu buhaya kwilonga haho na haho.

¹² Kulwa mhayo uyu uhaya giki, Munhu umo wa nyatemi akaja lugendo ku si ya kule akipandikile butemi, na kushoka.

¹³ Ubitana banhu ikumi ba mu basese bakwe, ubinha ratili ikumi ja feza, ubawila giki, Kwabagi kushisha naliza.

¹⁴ Aliyo bazengi bakwe bunkolwa, butuma nhungʼwa ba kunkubija, buhaya giki, Tutantogilwe ngʼwenuyo kutusuga.

¹⁵ Ikabiza aho ushoka hanuma ya kupandika butemi ubo, ulagila bitanwe kuli wei basese benabo wali ubinha feza, amane buli munhu umo wabyalanigije mu bukwabi wakwe.

¹⁶ Huna wegela wa kwandia, uhaya giki, Seba, ratili yako yiyongejaga ho ratili jingi ikumi.

¹⁷ Nanghwe ungʼwila giki, Wabegije, bebe nsese wa wiza; iki wali ngʼwishigwa mu kado, bizaga na busugi wa mizengo ikumi.

¹⁸ Huna wiza wa kabili, uhaya giki, Seba, ratili yako yabyagije ho ratili itano.

¹⁹ Nu ngʼwene ungʼwila giki, Sugaga nangho mizengo itano.

²⁰ Na ungi wiza, uhaya giki, Seba, iyi ratili yako, iyi nalulindaga ibikilwe mu kitambala cha luyilo.

²¹ Iki nukogoha, iki bebe uli munhu nambu; ukasolaga isho utashituulile ho, ukagesaga isho utabibile.

²² Nanghwe ungʼwila giki, Kufuma mu nomo gwako nakukulekanya nsango, bebe nsese nghunga. Walumanile giki, nene ndi munhu nambu, nakasolaga isho natatuulile ho, nakugesaga isho natabibile;

²³ Ni buli lulu, walutinhile feza yane ku bakabanya ba feza, na nene aho niza ni nayipandika yane hamo na kwiyongeja kwaho.

²⁴ Ubawila abo bimilile ho giiti, Ntajagi ratili iyo, mungʼwinhe uyo ali na ratili ikumi.

²⁵ Nabo bungʼwila giki, Seba, ali najo ratili ikumi.

²⁶ Hwi chene ndimu wila giki, Buli munhu ali nasho, alinhiwa; aliyo uyo ati nasho, alatagijiwa na isho ali nasho.

²⁷ Aliyo benabo banishi bane, abali batatogilwe nene kubasuga, benhagi kunu, mubabulagile mu miso gane.

Yesu wingila Yerusalemi adamhilile kayobe (Zak. 9.9; Mt. 21.1-11; Mk. 11.1-11; Yh. 12.12-19)

²⁸ Aho wamala kuhaya mihayo iyo, uja ku butongi ulinha kuja Yerusalemi.

²⁹ Ikabiza aho wegela Bethfage na Bethania hihi na lugulu lukitanagwa lwa Mizeituni, utuma babili ba mu bahemba bakwe,

³⁰ Uhaya giki, Jagi mukingile mu nzengo uguli ku butongi, aho mulingila mugo mukubona kana ka nzobe kakungilwe, ako katinadamhilwa na munhu: kakungulilagi, mukenhe.

³¹ Na ulu munhu ose alamubuje giki, Mulikakungulila ni buli? hayagi giki, Seba ali na nimo nako.

³² Nabo abali batungʼwa buja, busanga gitumo walubawilaga.

³³ Aho balikakungulila kana ka nzobe, beneko bubawila giki, Mulikungulila kana ka nzobe ni buli?

³⁴ Buhaya giki, Seba ali na nimo nako.

³⁵ Bukenlia kuli Yesu; buponeja ho mienda yabo ha kana ka nzobe, bundamhija ho Yesu.

³⁶ Aho akujaga bamba mienda yabo ngʼwipalapala.

³⁷ Aho wali utumbya lulu ku ntulumenho gwa lugulu lwa Mizeituni, ibita lyose lya bahemba bandia kuyega na kunkumilija Mulungu na ilaka itale kulwa shitile shose sha budula isho bali bubona;

³⁸ Buhaya giki, Ali na lubango Ntemi uwiza mu lina lya Seba; mhola ngʼwigulu, na ikujo higulya no.

³⁹ Bamo ba Bafarisayo abali bali ngʼwibita bungʼwila giki, Nangi, bahamage bahemba bako.

⁴⁰ Nanghwe ushosha, ubawila, Namuwila giki, Benaba ulu bufulika, mawe gakuhamuka.

Yesu uyitilila Yerusalemi

⁴¹ Nanghwe aho wegela, ugubona nzengo, ugulilila,

⁴² Uhaya giki, Ninga ulu ni wali umanile, nu bebe, mu lushiku ulu lwako, iyo yigelelilwe mhola yako: aliyo haha yibisile ku miso gako.

⁴³ Iki shiku jilakwiziila, aho banishi bako balakupindiligija ndugu, balakupindya, balakuchibila mhande jose.

⁴⁴ Balakugwisha ha si, na bana bako abali mugati yako; batalaleka muli bebe iwe higulya ya iwe liye, iki wali utamanile ikanza lya kugenihilwa kwako.

Yesu uyeja hekalu hangi

⁴⁵ Huna wingila mu hekalu, wandia kubapeja abakujinjaga na kugula mo;

⁴⁶ Ubawila giki, Gwaandikwa giki, Numba yane ilabiza numba ya kulomba; aliyo bingʼwe ngʼwayigalucha yabiza ipilinga lya basambo.

⁴⁷ Akabiza ubyulanga buli lushiku mu hekalu; aliyo bagabiji batale, na bandiki na batale ba banhu, bukoba kunyagaji.

⁴⁸ Na batubona icho bangʼwitile; iki banhu bose buhandikila kuli Wei kundegeleka.